Olutuwiliki olo okangudu kanini kOvakriste va pyokoka, ovo hava yandje ewiliko kEendombwedi daJehova mounyuni aushe. Oli na oinakuwanifwa yopavali:

•   Ohali yandje omalombwelo a kanghamena kOmbiibeli okupitila moishangomwa, pokwoongala nosho yo meefikola dEendombwedi daJehova. — Lukas 12:42.

•   Ohali pashukile oilonga yEendombwedi daJehova yomounyuni aushe, mokuunganeka oilonga yetu yokuudifa moipafi nosho yo nghee omayambidido taa longifwa.

 Olutuwiliki ohali shikula oshihopaenenwa osho sha tulwa po ‘kovayapostoli nokovakulunhu vomuJerusalem’ vomefelemudo lotete, ovo va li hava ningile ko eongalo alishe lopaKriste omatokolo a fimana. (Oilonga 15:2) Ngaashi ashike ovalumenhu ovo ovadiinini, oilyo yOlutuwiliki kai fi ovawiliki vehangano letu. Ohava kongo ewiliko mOmbiibeli, ve shii kutya Jehova Kalunga okwa nangeka po Jesus Kristus e li Omutwe weongalo. — 1 Ovakorinto 11:3; Ovaefeso 5:23.

 Oilyo yOlutuwiliki oyo Kenneth Cook, Jr., Gage Fleegle, Samuel Herd, Geoffrey Jackson, Stephen Lett, Gerrit Lösch, Mark Sanderson, David Splane nosho yo Jeffrey Winder. Ohava longele keembelewa detu da kula moWarwick, New York, mo U.S.A.

 Olutuwiliki ola fikama po meekomitiye hamano, odo hadi pashukile oilonga yetu i lili noku lili. Oshilyo keshe shOlutuwiliki ohashi pashukile oshikondo shimwe, ile shi dulife po.

•   Okomitiye yOvaunganeki: Ohai pashukile oinima yopamhangu nosho yo oiponga yopaushitwe, eenghalo omo Eendombwedi daJehova tadi hepekwa omolweitavelo lado nosho yo eenghalo vali dimwe, odo da pumbwa okweendelelwa po da kuma Eendombwedi daJehova.

•   Okomitiye yOnghalonawa yOvanhu: Ohai pashukile eemhumbwe doukwaneumbo waBetel.

•   Okomitiye yOkunyanyangida: Ohai pashukile okunyanyangida nokutuma oishangomwa yopaMbiibeli nosho yo okutunga eenhele dokwoongalela, eembelewa dokutoloka noitaimbelewa.

•   Okomitiye yOilonga: Ohai pashukile oilonga yetu yokuudifa ‘onghundana iwa yOuhamba.’ — Mateus 24:14.

•   Okomitiye yOkuhonga: Ohai yandje ewiliko lopamhepo olo hali yandjwa pokwoongala, meefikola, oinima oyo ya kwatwa momawi nomouvidio.

•   Okomitiye yOkushanga: Ohai yandje ewiliko lopamhepo okupitila moishangomwa oyo ya pilindwa, oyo tai hangwa konhele yetu yokointaneta nokupashukila oilonga yokutoloka.

 Natango, Olutuwiliki ohali ongala oshivike keshe, opo li kundafane eemhumbwe dehangano. Oilyo ohai kundafana osho Omishangwa tadi ti pokwoongala oko nohai pitike omhepo iyapuki yaKalunga i va wilike, opo va ninge omatokolo e li pandunge. — Oilonga 15:25.

 Ovakriste ovo ve shii okulineekelwa, ovo hava yambidida eekomitiye dOlutuwiliki. (1 Ovakorinto 4:2) Ove na eshiivo nowino moilonga oyo hai pashukilwa kokomitiye oko va tulwa nohava ongala oshivike keshe. Nonande ovakwafeli ihava ningi omatokolo, ohava yandje omayele mawa nouyelele wa yela nawa, hava tula moilonga omatokolo okomitiye nokutala exumokomesho lao. Ohava pewa yo oshinakuwanifwa kOlutuwiliki va ka talele po ovamwatate novamwameme moitukulwa i lili noku lili mounyuni, ile va yandje oipopiwa ngaashi pokwoongala kwokomudo, ile mefiku lokupewa eedjapo kOfikola yaGilead.