Embo lotete lOvakorinto 11:1-34
11 Ningeni ovahopaeneni vange ngaashi ame handi hopaenene Kristus.
2 Ohandi mu pandula molwaashi ohamu dimbuluka nge moinima aishe nohamu diinine omahongo oo nde mu honga.
3 Ndele onda hala mu shiive kutya Kristus oye omutwe womulumenhu keshe, nomutwe womukainhu omulumenhu, nomutwe waKristus oKalunga.
4 Omulumenhu keshe oo ta ilikana ile ta xunganeke a djala sha komutwe ota fifa ohoni omutwe waye.
5 Ndele omukainhu keshe oo ta ilikana ile ta xunganeke ina djala sha komutwe ota fifa ohoni omutwe waye, osheshi kungaho okwa fa omukainhu a kululwa ongwala.
6 Ngeenge omukainhu ita djala sha komutwe, na tetife ko eexwiki daye. Ndele ngeenge oshi fifa ohoni okutetifa ko eexwiki daye ile okukululwa ongwala, na djale sha komutwe.
7 Omulumenhu ke na okudjala sha komutwe molwaashi ye oshifeka nefimano laKalunga, ndele efimano lomulumenhu omukainhu.
8 Osheshi omulumenhu ina dja momukainhu, ndele omukainhu oye a dja momulumenhu.
9 Shimwe vali, omulumenhu ina shitilwa omukainhu, ndele omukainhu oye a shitilwa omulumenhu.
10 Onghee hano, omukainhu oku na okudjala sha komutwe shi kale edidiliko kutya oha dulika komutwe waye nomolwovaengeli.
11 Palongekido lOmwene, ovakainhu itava dulu okukala po pehe na ovalumenhu, novalumenhu itava dulu okukala po pehe na ovakainhu.
12 Ngaashi ashike omukainhu a dja momulumenhu, omulumenhu naye okwa dalwa komukainhu; ndele oinima aishe oya shitwa kuKalunga.
13 Tokoleni nye vene: Mbela osha yuka ngoo omukainhu a ilikane kuKalunga ina djala sha komutwe?
14 Mbela inamu didilika kutya paushitwe oshinima shi fifa ohoni komulumenhu okukala e na eexwiki dile?
15 Ndele oshi li efimano komukainhu ngeenge oku na eexwiki dile osheshi ponhele yokudjala sha komutwe, okwa pewa eexwiki.
16 Ngeenge ope na umwe itatu kumwe nasho, kape na vali omulandu umwe u lili momaongalo aKalunga.
17 Ndele eshi handi mu pe omalombwelo oo itandi mu pandula, molwaashi ihamu ongala pamwe mu tungafane, ndele okuteyafana po.
18 Onda uda kutya mokati keni ohamu kala omashilafano ngeenge mwa ongala pamwe, naasho ondi shi shii.
19 Ndele mokati keni otamu ka dja oimhanga opo ovo va hokiwa kuKalunga ve limonikile mo.
20 Ngeenge mwa ongala pamwe, kashi fi lela okulya Ouvalelo wOmwene.
21 Osheshi ngeenge tamu li ouvalelo, vamwe ohava hovele okulya komesho yefimbo, naashi tamu ka hovela vamwe ova fya ondjala ofimbo vamwe va kolwa.
22 Mbela kamu na omaumbo oko tamu dulu okulila nokunwina? Ile omwa dina eongalo laKalunga notamu fifa ohoni ovo vehe na sha? Oshike vali ndi na okutya? Mbela nandi mu pandule? Itandi mu pandula nande omolwelihumbato olo.
23 Ohandi mu hongo osho nda hongwa kOmwene, kutya onguloshi oyo Omwene Jesus a li ta ka kengelelwa okwa kufa omungome,
24 nokonima eshi a pandula okwe u pambula, ndele ta ti: “Omungome ou otau faneke olutu lange olo tali yandjwa molweni. Kaleni hamu shi ningi okudimbuluka nge.”
25 Konima eshi va mana okulya ouvalelo, okwa kufa eholo, ndele ta ningi sha faafana, nokwa ti: “Eholo eli otali faneke ehangano lipe olo la pamekwa kohonde yange oyo tai tilwashi molweni. Alushe ngeenge tamu nu mo, kaleni hamu shi ningi okudimbuluka nge.”
26 Alushe ngeenge tamu li omungome notamu nu meholo eli, otamu hepaulula efyo lOmwene fiyo ote uya.
27 Onghee hano, keshe ou ta li omungome ile ta nu meholo lOmwene, ndele ina wana, oku na ondjo molwaashi ina fimaneka olutu nohonde yOmwene.
28 Tete omunhu ne likonakone, opo nee ta dulu okulya omungome nokunwa meholo.
29 Onghee hano, ou ta li nota nu, ndele ke shii kutya osho ta li oshi lile po olutu lOmwene, ote lilile note linwine etokolo.
30 Osho osho sha ningifa vamwe vomunye va kale va nghundipala, tava vele navamwe nokuli ova fya.*
31 Ashike ngeenge otwe likonakona kutya otwa tya ngahelipi, itatu ka tokolwa.
32 Ndele ngeenge otwa tokolwa, otwa pewa outekuduliko kuJehova opo tuha ka tokolwe pamwe nounyuni.
33 Onghee hano, ovamwatate, ngeenge tamu ongala pamwe mu lye ouvalelo, teelelafaneni.
34 Ngeenge ope na ou a fya ondjala, na lye keumbo lavo opo muha tokolafane eshi mwa ongala pamwe. Ndele shi na sha noinima imwe, ohandi uya ndi ungaunge nayo ngeenge nde uya.
Eshangelo lopedu
^ Sha hala okutya, va fya pamhepo.
