Nĩ kĩĩ Gĩtũmĩte Gũkorũo na Ndini Nyingĩ Ũguo cia Gĩkristiano?
Macokio ma Bibilia
Andũ nĩ mahũthĩrĩte morutani ma Jesu Kristo gũthondeka ndini cia “Gĩkristiano.” O na kũrĩ ũguo, Bibilia yonanagia atĩ kũrĩ ndini o ĩmwe tu ya ma ya Gĩkristiano. Reke twĩcirie itũmi ithatũ iria iratũma tuuge ũguo.
Jesu oigire atĩ aarutanaga “ũhoro ũrĩa wa ma,” nao Akristiano a tene meetaga ndini yao “ũhoro ũrĩa wa ma.” (Johana 8:32; 2 Petero 2:2; 2 Johana 4; 3 Johana 3) Maũndũ macio maronania atĩ arĩa magaathagĩrĩria morutani mataringaine na ma Jesu matikoragwo ndini-inĩ ya ma ya Gĩkristiano.
Bibilia yugaga atĩ no mũhaka Akristiano ‘othe maragie marĩ na ũiguano.’ (1 Akorintho 1:10) O na kũrĩ ũguo, ndini nyingĩ cia Gĩkristiano ciagaga kũiguanĩra nginya morutani marĩa mahũthũ ta ũrĩa mĩthiĩre ya Mũkristiano yagĩrĩirũo gũkorũo ĩhaana. Ndini icio ciothe itirutanaga ũhoro wa ma.—1 Petero 2:21.
Jesu aarathire atĩ andũ aingĩ nĩ mangĩkoiga nĩ Akristiano, ĩndĩ makaaga gwathĩkĩra maathani make na atĩ we nĩ angĩkamarega. (Mathayo 7:21-23; Luka 6:46) Andũ amwe nĩ mangĩgatumumario nĩ atongoria a ndini arĩa mahũthagĩra ũthathaiya na njĩra ya kwĩguna o ene. (Mathayo 7:15) O na kũrĩ ũguo, andũ amwe nĩ mangĩkenda Ũkristiano wa maheeni tondũ mangĩkarutwo maũndũ marĩa marenda kũigua handũ ha ũhoro ũrĩa wa ma kuuma Bibilia-inĩ.—2 Timotheo 4:3, 4.
Thĩinĩ wa ngerekano ya ngano na itindiĩ, Jesu nĩ aarathĩte atĩ Ũkristiano wa ma nĩ ũngĩgaakarario na njĩra nene nĩ aregenyũki. (Mathayo 13:24-30, 36-43) Kwa ihinda iraya Akristiano a ma na Akristiano a maheeni matingĩgakũrĩkana. O ta ũrĩa Jesu aarathĩte, ũregenyũki nĩ watheremire mũno thutha wa atũmwo gũkua. (Atũmwo 20:29, 30) O na gũtuĩka morutani ma aregenyũki nĩ matiganĩte, ndini ciothe iria ciĩĩtaga cia Gĩkristiano ‘nĩ ciumĩte nja ya ũhoro wa ma.’—2 Timotheo 2:18.
Jesu ningĩ nĩ aarathĩte atĩ, ngũrani gatagatĩ ka Akristiano a ma na a maheeni nĩ ĩngĩacokire yonekane wega. Ũndũ ũcio ũrekĩka matukũ-inĩ maya ma “ithirĩro rĩa mũtabarĩre ũyũ wa maũndũ.”—Mathayo 13:30, 39.