Mbaara ya Hari-Magedoni nĩ mbaara ya mũthia gatagatĩ ka thirikari cia andũ na Ngai. Thirikari icio o hamwe na arĩa macinyitaga mbaru itũire ikararagia Ngai nginya rĩu na njĩra ya kũrega kwĩnyihĩria wathani wake. (Thaburi 2:2) Mbaara ya Hari-Magedoni nĩ ĩkaaniina wathani wa andũ.—Danieli 2:44.

 Kiugo “Hari-Magedoni” kĩonekaga o riita rĩmwe Bibilia-inĩ thĩinĩ wa Kũguũrĩrio 16:16. Ibuku rĩa Kũguũrĩrio rĩonanagia na njĩra ya ũrathi atĩ “athamaki a mabũrũri mothe” nĩ magaacokanĩrĩrio “kũndũ kũrĩa gwĩtagwo na Kĩhibirania, Hari-Magedoni” nĩ ũndũ wa “mbaara ya mũthenya ũrĩa mũnene wa Ngai, Mwene-Hinya-Wothe.”—Kũguũrĩrio 16:14.

 Nĩa makaarũa Hari-Magedoni? Jesu Kristo nĩwe ũgaatongoria mbũtũ ya igũrũ nĩguo ahoote thũ cia Ngai. (Kũguũrĩrio 19:11-16, 19-21) Thũ icio nĩ hamwe na andũ arĩa makararagia wathani wa Ngai na arĩa mamũnyararaga.—Ezekieli 39:7.

 Hihi Hari-Magedoni ĩkaarũĩrũo mabũrũri-inĩ ma irathĩro? Aca. Mbaara ya Hari-Magedoni ndĩkaarũĩrũo gĩcigo-inĩ kĩmwe, no ĩgaakorũo thĩinĩ wa thĩ yothe.—Jeremia 25:32-34; Ezekieli 39:17-20.

 Hari-Magedoni (Kĩhibirania Har Meghiddohnʹ), nĩ kuuga “Kĩrĩma kĩa Megido.” Megido rĩarĩ itũũra rĩa Isiraeli ya tene. Historĩ nĩ ĩgwetaga ũhoro wa mbaara ciarũĩirũo hakuhĩ na itũũra rĩu, na imwe nĩ ciandĩkĩtwo thĩinĩ wa Bibilia. (Atiirĩrĩri Bũrũri 5:19, 20; 2 Athamaki 9:27; 23:29) No rĩrĩ, Hari-Magedoni ndĩngĩkorũo ĩrũgamĩrĩire handũ hau hakuhĩ na Megido. Hau hatikoragwo na kĩrĩma kĩnene, na Gĩtuamba kĩa Jezireeli gĩothe kĩrĩa kĩrĩ hakuhĩ naho gĩtingĩiganĩra arĩa magaakorũo makĩrũa na Ngai. Ithenya rĩa ũguo, Hari-Magedoni nĩ ũndũ wa thĩ yothe, ndũrĩrĩ igĩcokanĩrĩra kuonania mũrũgamo wacio wa mũthia wa kũregana na wathani wa Ngai.

 Maũndũ magaakorũo matariĩ atĩa hĩndĩ ya mbaara ya Hari-Magedoni? O na gũtuĩka tũtiũĩ ũrĩa Ngai akaahũthĩra hinya wake, nĩ agaakorũo na maũndũ o ta marĩa aahũthagĩra tene, ta mbura ya mbembe, ithingithia, mbura ya mũiyũro, mwaki na ũbiriti, heni, na mĩrimũ. (Ayubu 38:22, 23; Ezekieli 38:19, 22; Habakuku 3:10, 11; Zekaria 14:12) Nĩ ũndũ wa gũtukanĩrũo, thũ imwe cia Ngai nĩ ikooragana cio nyene, no mũthia-inĩ nĩ ikaamenya atĩ nĩ Ngai ũrarũa nacio.—Ezekieli 38:21, 23; Zekaria 14:13.

 Hihi Hari-Magedoni nĩ ĩkaaniina thĩ? Ndĩkaanina thĩ ĩno tũikaraga, tondũ nĩyo mũciĩ wa andũ wa tene na tene. (Thaburi 37:29; 96:10; Kohelethu 1:4) Ithenya rĩa kũniina andũ, Hari-Magedoni nĩ kũmahonokia ĩkaamahonokia, tondũ “kĩrĩndĩ kĩnene” kĩa ndungata cia Ngai nĩ gĩkaahonoka.—Kũguũrĩrio 7:9, 14; Thaburi 37:34.

 Makĩria ma kũrũgamĩrĩra thĩ ĩno tũikaraga, rĩmwe na rĩmwe kiugo “thĩ,” thĩinĩ wa Bibilia kĩrũgamagĩrĩra andũ arĩa makararagia Ngai. (1 Johana 2:15-17) Na njĩra ĩyo, Hari-Magedoni nĩ ĩkaarehe “ithirĩro rĩa thĩ.”—Mathayo 24:3, The Holy Bible in Gĩkũyũ Language.

 Hari-Magedoni ĩgooka rĩ? Hĩndĩ ĩrĩa Jesu aaragĩrĩria ũhoro wa “thĩna mũnene” ũrĩa ũkaarigĩrĩria na mbaara ya Hari-Magedoni, oigire ũũ: “Naguo ũhoro wa mũthenya ũcio, kana wa ihinda rĩu, gũtirĩ mũndũ ũũĩ, o na araika arĩa marĩ Igũrũ, o na kana Mũriũ, no Ithe witũ wiki.” (Mathayo 24:21, 36) O na kũrĩ ũguo, Bibilia nĩ yonanagia atĩ Hari-Magedoni ĩkaambĩrĩria hĩndĩ ya gũkorũo kuo kwa Jesu na njĩra ataroneka na maitho, kũrĩa kwambĩrĩirie mwaka wa 1914.—Mathayo 24:37-39.