Bibilia nĩ yarathĩte atĩ mĩrimũ mĩũru nĩ ĩngĩgaatherema kũndũ na kũndũ matukũ-inĩ ma kũrigĩrĩria. (Luka 21:11) Mĩrimũ ta ĩyo ndĩkoragwo ĩrĩ ihera kuuma kũrĩ Ngai. O na ũrĩa kũrĩ nĩ atĩ, ica ikuhĩ Ngai akĩhũthĩra Ũthamaki wake nĩ ekũniina mathĩna mothe ma mwĩrĩ o hamwe na mĩrimũ ĩyo ĩtheremaga kũndũ na kũndũ.

•  Hihi Bibilia nĩ yarathĩte ũhoro wĩgiĩ mĩrimũ?

•  Hihi Ngai anaherithia andũ akĩhũthĩra mĩrimũ?

•  Hihi mĩrimũ ĩrĩa ĩrĩ kuo ũmũthĩ nĩ ihera kuuma kũrĩ Ngai?

•  Kũrĩ hĩndĩ mĩrimũ ĩgaathira?

•  Mĩhari ya Bibilia yarĩtie ũhoro wĩgiĩ mĩrimũ

 Bibilia ndĩkoragwo ĩgwetete mĩrimũ ta COVID-19, mũrimũ wa mũkingo, TB, malaria, kana Spanish flu. No nĩ yarathĩte ũhoro wĩgiĩ “mĩrimũ mĩũru” na “mũrimũ wa kũrehe gĩkuũ.” (Luka 21:11; Kũguũrĩrio 6:8) Mĩrimũ nĩ ũndũ ũmwe ũngĩkonania tũrĩ “matukũ-inĩ ma kũrigĩrĩria” na matukũ macio nomo metagwo “ithirĩro rĩa mũtabarĩre wa maũndũ.”—2 Timotheo 3:1; Mathayo 24:3.

 Bibilia nĩ ĩgwetete maita maigana ũna Ngai aahũthĩrire mũrimũ kũherithia andũ. Kwa ngerekano, nĩ aatũmire andũ amwe manyitwo nĩ mũrimũ wa mangũ. (Ndari 12:1-16; 2 Athamaki 5:20-27; 2 Maũndũ ma Matukũ ma Tene 26:16-21) O na kũrĩ ũguo, mũrimũ ũcio ndwatheremire kũrĩ andũ othe nginya arĩa mataarĩ na mahĩtia. Handũ ha ũguo, andũ arĩa maakoragwo mehĩtie no o tu maarwaraga mĩrimũ ĩyo.

 Aca. Andũ amwe moigaga atĩ Ngai nĩwe ũrarehe mĩrimũ nĩguo aherithie andũ. No Bibilia ndĩnyitaga ũndũ ũcio mbaru. Tũroiga ũguo nĩkĩ?

 Ũndũ ũmwe nĩ atĩ, ndungata imwe cia Ngai mahinda-inĩ ma tene na mahinda-inĩ maya cianarwara. Kwa ngerekano, Timotheo nĩ ‘aarwaraga kaingĩ,’ o na gũtuĩka aarĩ mwĩhokeku harĩ Ngai. (1 Timotheo 5:23) No Bibilia ndiugaga atĩ aarwaraga tondũ wa kwaga gwĩtĩkĩrĩka nĩ Ngai. Na njĩra o ta ĩyo, matukũ-inĩ maya ndungata imwe njĩhokeku cia Ngai nĩ irwaraga kana ikagwatio mĩrimũ. Na kaingĩ manyitagwo nĩ mĩrimũ ĩyo nĩ ũndũ wa gũkorũo handũ harĩa hatagĩrĩire ihinda-inĩ rĩrĩa rĩtagĩrĩire.—Kohelethu 9:11.

 Makĩria ma ũguo, Bibilia ĩrutanaga atĩ ihinda rĩa Ngai rĩa kũherithia andũ arĩa aganu rĩtikinyĩte. Handũ ha ũguo, Bibilia ĩĩtaga matukũ maya tũratũũra “mũthenya wa ũhonokio,” na ũguo nĩ kuuga atĩ Ngai nĩ arahe andũ othe mweke wa kũmũkuhĩrĩria nĩguo makaahonokio. (2 Akorintho 6:2) Njĩra ĩmwe arahũthĩra gũteithia andũ mamũkuhĩrĩrie nĩ kũgerera wĩra wa kũhunjia ndũmĩrĩri njega ya ‘ũhoro ũrĩa mwega wa Ũthamaki’ thĩinĩ wa thĩ yothe.—Mathayo 24:14.

 Ĩĩ. Bibilia nĩ yarathĩte atĩ nĩ kũrĩ hĩndĩ gũtarĩ mũndũ ũkoigaga atĩ nĩ mũrwaru na ihinda rĩu nĩ rĩkuhĩrĩirie. Rungu rwa wathani wa Ũthamaki wake, Ngai nĩ akaaniinĩra andũ othe mathĩna ma mwĩrĩ. (Isaia 33:24; 35:5, 6) Nĩ akaaniina mĩnyamaro, ruo, na gĩkuũ. (Kũguũrĩrio 21:4) Ningĩ nĩ akaariũkia arĩa makuĩte, na makenere gũkorũo na ũgima mwega wa mwĩrĩ gũkũ thĩ gũtarĩ na mathĩna.—Thaburi 37:29; Atũmwo 24:15.

 Kũguũrĩrio 6:8: “Na rĩrĩ, ngĩona mbarathi ya rangi mũtheũku, na ũrĩa wamĩikarĩire aarĩ na rĩĩtwa Gĩkuũ. Na ooimĩtwo thutha nĩ Mbĩrĩra. Na makĩheo wathani [wa kũũragana] na mũrimũ wa kũrehe gĩkuũ.”

 Ũrutani: Ũrathi ũcio wĩgiĩ atwarithia a mbarathi wonanagia atĩ nĩ kũngĩgaakorũo na mĩrimũ mĩũru mahinda-inĩ maya.