Arata nĩ mabataraga kwaranĩria nĩguo makũrie ũrata wao. O ũndũ ũmwe na ũcio, Ngai atwĩraga twaranĩrie nake nĩguo tũkorũo na ũrata mwega. Oigĩte ũũ: “Na nĩmũkangayagĩra, na mũcokage kũinamĩrĩra mũ’hoe, na niĩ nĩngamũigua.” (Jeremia 29:12) Rĩrĩa waranĩria na Ngai nĩ ‘ũrĩmũkuhagĩrĩria, nake nĩ arĩgũkuhagĩrĩria.’ (Jakubu 4:8) Bibilia ĩtũheaga ũũma ũyũ: “Jehova-rĩ, arĩa othe mamũkayagĩra, akoragwo hakuhĩ nao.” (Thaburi 145:18) O ũrĩa tũrahoya maita maingĩ, noguo ũrata witũ na Ngai ũrĩthiaga na mbere gũkũra.

Jesu oigire ũũ: “Nĩ mũndũ ũrĩkũ wanyu ũngĩĩtio mũgate nĩ mũriũ, aamũne ihiga? Kana hihi angĩĩtio kĩũngũyũ, aamũne nyamũ-ya-thĩ? Hakĩrĩ ũguo-rĩ, mwagĩkorũo inyuĩ . . . nĩmũũĩ kũhe ciana cianyu iheo njega, ĩ Ithe wanyu wĩ Igũrũ angĩkĩria atĩa kũhe indo njega arĩa mamũhoyaga?” (Mathayo 7:9-11) Ngai atwĩraga tũmũhoe tondũ ‘nĩwe ũrũmbũyanagia na maũndũ maitũ’ na nĩ endaga gũtũteithia. (1 Petero 5:7) Ningĩ nĩ endaga tũmũhoe ũteithio rĩrĩa tũrĩ na mathĩna. Bibilia ĩtwĩraga ũũ: “Tigagai gwĩtanga nĩ ũndũ o na ũrĩkũ: no rĩrĩ, menyithagiai Ngai maũndũ marĩa mothe mwendaga, mũkĩmũhoyaga na mũkĩmũthaithaga, hamwe na kũmũcokeria ngatho.”—Afilipi 4:6.

Arĩa mathuthuragia maũndũ ma ndũire ma andũ nĩ monete atĩ andũ milioni nyingĩ nĩ maiguaga makĩenda kũhoya. O na andũ amwe arĩa matetĩkĩtie Ngai nĩ amwe a andũ acio. * Ũndũ ũcio ũronania atĩ andũ mombĩtwo marĩ na bata wa maũndũ ma kĩĩroho. Jesu oigire ũũ: “Gũkena-rĩ, nĩ arĩa mahũtagĩra maũndũ marĩa ma ũthingu.” (Mathayo 5:6) Ũndũ ũmwe ũngĩtũteithia kũhingia bata ũcio nĩ kwaranagĩria kaingĩ na Ngai.

Tũngĩhoyaga Ngai ta ũguo atwĩraga twĩke-rĩ, tũngĩgunĩka atĩa?