Ndaciarĩirũo itũũra-inĩ rĩa Santo Domingo, bũrũri-inĩ wa Dominican Republic, ndĩ wa kĩhinga nda harĩ ciana inya. Aciari akwa marĩ athomu biũ na meendaga gũtũrerera kũndũ kwega. Mĩaka ĩna itanaciarũo, aciari akwa nĩ macemanirie na amishonarĩ a ndini ya Mormon. Nĩ ũndũ wa kũgucĩrĩrio nĩ ũrĩa anake acio meehumbaga wega, aciari akwa magĩtua itua o narua atĩ famĩlĩ itũ ĩngĩarĩ thĩinĩ wa famĩlĩ cia mbere gĩcigĩrĩra-inĩ kĩu kũingĩra thĩinĩ wa Kanitha wa Mormon.

O ũrĩa ndaakũraga, noguo ndakenagĩra maũndũ makonainie na kanitha na ngatĩa mawoni ma Kanitha wa Mormon megiĩ mũtũũrĩre wa famĩlĩ na mĩtugo. Nĩ nderahagĩra gũkorũo ndĩ wa ndini ya Mormon na ngĩĩigĩra muoroto wa gũtuĩka mũmishonarĩ.

Ndĩna mĩaka 18, tũrĩ famĩlĩ nĩ twathamĩire Amerika nĩguo hote gũthiĩ na mbere na gĩthomo gĩakwa gĩa korenji. Thutha wa kĩndũ mwaka ũmwe, tata na mama arĩa makoragwo marĩ Aira a Jehova nĩ mookire gũtũcerera Florida. Nĩ maatũnyitire ũgeni tũthiĩ nao kĩrũrũngano-inĩ kĩarĩ na ũrutani wa Bibilia. Nĩ ndagegire mũno nĩ kuona atĩ andũ othe arĩa twaikaranĩtie nao nĩ maahumbũragia Bibilia na makandĩka maũndũ. Nĩ ũndũ ũcio ngĩhoya karamu na karatathi na niĩ ngĩambĩrĩria kwandĩka.

Thutha wa kĩrũrũngano kĩu tata na mama makiuga nĩ ũndũ wa wendi wakwa wa gũtuĩka mũmishonarĩ, nĩ mekũndeithia kwĩruta Bibilia. Ngĩona rĩu rĩrĩ rĩciria rĩega tondũ maita maingĩ ndaathomaga Ibuku rĩa Mormon gũkĩra Bibilia.

Hingo ciothe tũkĩaria nao thimũ-inĩ, tata na mama maanjĩkagĩra ngoro ningithanie mawĩtĩkio makwa na morutani ma Bibilia.  Wendi wao warĩ ndĩmenyere niĩ mwene atĩ ũyũ nĩ ũhoro wa ma.

inlineNĩ kũrĩ maũndũ maingĩ megiĩ wĩtĩkio wa ndini ya Mormon ndaarũmagĩrĩra, ĩndĩ ndiarĩ na ma ũrĩa Maandĩko moigaga igũrũ rĩgiĩ maũndũ macio. Tata nĩ aandũmĩire ngathĩti ya Amkeni! ya Novemba 8, 1995, ĩrĩa ĩcabĩtwo nĩ Aira a Jehova, ĩrĩa yarĩ na icunjĩ imwe ciarĩrĩirie wĩtĩkio wa Mormon. Nĩ ndaamakire nĩ kuona atĩ ndiamenyete morutani maingĩ ma Mormon. Ũndũ ũcio watũmire thuthurie thĩinĩ wa Rĩarĩro rĩa intaneti rĩa Mormon nĩguo njĩkĩre mũkonde atĩ ũhoro ũrĩa warĩ thĩinĩ wa Amkeni! warĩ wa ma. Warĩ ũhoro wa ma, na nĩ wekĩrirũo mũkonde makĩria rĩrĩa ndaathire gũceera nyũmba-inĩ ya indo cia tene itũũra-inĩ rĩa Utah.

Ndatũũraga njĩtĩkĩtie atĩ Ibuku rĩa Mormon na Bibilia nĩ itwaranaga. No rĩrĩa ndambĩrĩirie gũthoma Bibilia na kĩyo, nĩ ndonire ngũrani ya morutani ma Mormon na ũhoro ũrĩa ũrĩ thĩinĩ wa Bibilia. Kwa ngerekano, thĩinĩ wa Ezekieli 18:4 Bibilia yugaga atĩ muoyo nĩ ũkuaga. Ĩndĩ Ibuku rĩa Mormon, thĩinĩ wa Alma 42:9 riugaga ũũ: “Gũtirĩ hĩndĩ muoyo ũngĩkua.”

Makĩria ma ngũrani ya morutani, ndiakenagio nĩ mwĩcirĩrie wa ũndũrĩrĩ ũrĩa warutanagwo nĩ ndini ya Mormon. Kwa ngerekano arũmĩrĩri a Mormon marutagwo atĩ mũgũnda wa Edeni warĩ thĩinĩ wa itũũra rĩa Jackson, Missouri, U.S.A. Na anabii a kanitha ũcio moigaga atĩ hĩndĩ ĩrĩa “Ũthamaki wa Ngai ũkaambĩrĩria gwathana, bendera ya Amerika nĩyo Ngai akaarirũkia thĩinĩ wa thĩ yothe.”

Nĩ ndaagĩire na nganja kana maũndũ macio nĩ mangĩahanĩkire bũrũri-inĩ witũ kana bũrũri-inĩ ũngĩ o wothe. Hwaĩ-inĩ ũmwe rĩrĩa ndahũrĩirũo thimũ nĩ mwanake ũmwe wa ndini ya Mormon ũrĩa wathomagĩra ũmishonarĩ, nĩ ndaririe nake ũhoro ũcio. Ngĩmũria ĩmwe kwa ĩmwe kana bũrũri wake ũngĩng’ethanĩra na bũrũri ũngĩ mbara-inĩ no ahũrane na etĩkia a ndini ya Mormon a bũrũri ũcio. Ndaamakire mũno rĩrĩa anjĩrire no eke ũguo! Nĩ ndathuthurie makĩria morutani megiĩ wĩtĩkio wakwa na ningĩ ngĩaria na atongoria a Kanitha wa Mormon. Makĩnjĩra atĩ macokio ma ciũria ciakwa nĩ kĩriga gĩkaaguũrio mũthenya ũmwe rĩrĩa ũtheri ũgathererũka makĩria.

Nĩ ũndũ wa gũkua ngoro nĩ macokio mao, nĩ ndambĩrĩirie gwĩthugunda na gwĩciria kĩrĩa gĩatũmaga nyende gũtuĩka mũmishonarĩ wa ndini ya Mormon. Ngĩmenya atĩ gĩtũmi gĩakwa gĩa kwenda gũtuĩka mũmishonarĩ kĩarĩ wendi wa gũteithia andũ. Ningĩ igweta rĩrĩa rĩngĩoimanire na gũtuĩka mũmishonarĩ o narĩo nĩ rĩangenagia. Ĩndĩ ndiarĩ na ũmenyo mũingĩ wĩgiĩ Ngai. O na gũtuĩka nĩ ndathomathomangaga Bibilia maita maingĩ, ndiamĩoyaga na ũritũ. Ndiamenyete o na hanini muoroto wa Ngai harĩ thĩ na harĩ andũ.

Gũthomithio Bibilia nĩ Aira a Jehova, nĩ kwandeithirie kũmenya maũndũ maingĩ ta rĩĩtwa rĩa Ngai nĩ rĩrĩkũ, ũrĩa gũtuĩkaga rĩrĩa mũndũ akua, na itemi rĩa Jesu harĩ kũhingio kwa muoroto wa Ngai. Macũngĩrĩro-inĩ ngĩambĩrĩria kũgĩa na ũmenyo mũingĩ wĩgiĩ ibuku rĩrĩ rĩa bata, na ngakenera kũhunjĩria arĩa angĩ ma iria nderutaga. Hingo ciothe nĩ ndamenyaga atĩ Ngai arĩ kuo, no rĩu nĩ ingĩahotire kwaria nake mahoya-inĩ arĩ Mũrata wakwa ũrĩa mũnene mũno. Ndabatithirio ngĩtuĩka Mũira wa Jehova Julaĩ 12, 2004, na thutha wa mĩeri ĩtandatũ ngĩambĩrĩria gũtungatĩra mahinda mothe wĩra-inĩ wa kũhunjia.

Kwa ihinda rĩa mĩaka ĩtano, ndatungatĩire wabici-inĩ nene ya thĩ ya Aira a Jehova Brooklyn, New York. Nĩ ndakeneire mũno gũteithĩrĩria wĩra wa gũcaba Bibilia na mabuku marĩ na ũhoro umĩte thĩinĩ wayo marĩa magunaga andũ milioni nyingĩ thĩinĩ wa thĩ, na no thiaga na mbere gũkenera gũteithia angĩ merute ũhoro wa Ngai.