Ndaaciarirũo mwaka wa 1960, na mami aarĩ na mĩaka 17 hĩndĩ ĩyo. Baba aatigire mami itaciarĩtwo. Tũrĩ na mami twatũũraga na cũcũ na guka thĩinĩ wa taũni ya Burg, bũrũri-inĩ ũrĩa tene wetagwo German Democratic Republic, kana East Germany. Andũ aingĩ matietĩkĩtie Ngai na kwoguo famĩlĩ itũ yarĩ na mawoni o ta macio. Tũtietĩkĩtie o na hanini atĩ nĩ kũrĩ Ngai.

O ũrĩa mahinda maathiaga, noguo ndũgũ itũ na guka yathiaga ĩmatĩte. Nĩ twarutaga tũmawĩra tũingĩ nake. Wĩra ũmwe aaheaga nĩ kũhaica mĩtĩ igũrũ nĩguo ndĩmĩhũrũre. Ndaatũũraga ndĩ mũkenu ngĩruta mawĩra macio.

Ndĩ na mĩaka mũgwanja ũndũ ũmwe wa kĩeha nĩ wahanĩkire. Ndakoretwo ndambĩrĩria mwaka wa kerĩ cukuru. Rĩrĩa ndainũkaga, ngĩhaica gĩkĩngĩ gĩa thitima. Ndĩ igũrũ mita inyanya, ngĩringwo nĩ thitima ngĩringĩka. Ndeiguĩrĩire thibitarĩ ndĩ mũgandu moko mũno. Ndaahĩte moko ũũru mũno, na ironda iria ndaarĩ nacio ciarĩ njũru ũũ atĩ no mũhaka ingĩarengirũo moko nĩguo ndigakue. Ũndũ ũcio nĩ wekĩrire mami, cũcũ na guka ihooru inene. No tondũ ndarĩ mũnini mũno ndiataũkagĩrũo wega ũrĩa gũkorũo itarĩ na moko kũngĩahutirie mũtũũrĩre wakwa.

Rĩrĩa ndaheirũo rũtha rwa kuuma thibitarĩ, ngĩcoka cukuru. Arutwo arĩa angĩ nĩ maathekagĩrĩra, makanjikania kana makanyugutĩra indo tondũ nĩ moĩ wega ndingĩahotire kwĩgitĩra. Nĩ ndaatuuragwo mũno nĩ maũndũ macio. Thutha-inĩ ngĩtwarũo cukuru ya gũkomwo ya kũrũmbũiya ciana iria ikoragwo na mawathe ĩtagwo Birkenwerder. Tondũ cukuru ĩyo yarĩ kũraihu na mũciĩ, mami, cũcũ na guka matingĩonire mbeca cia gũka kũnjerera. Mĩaka ikũmi ĩrĩa yarũmĩrĩire, tuonanaga nao o rĩrĩa twahinga cukuru.

Ngĩambĩrĩria kwĩruta gwĩka maũndũ ngĩhũthĩra magũrũ. Ta hũra mbica nyitĩte gĩciko kana hũma na ciara cia magũrũ ngĩrĩa irio? Ũndũ wa magegania nĩ atĩ nĩ ndahotire gwĩkaga ũguo. Ningĩ nĩ nderutire gwĩkiinya magego na gwĩcanũra njuĩrĩ o ngĩhũthĩra magũrũ. O na ngĩaria, ndahũthagĩra magũrũ o ta ũrĩa mũndũ ahũthagĩra moko akĩenda kuonania ũndũ. Na njĩra nguhĩ, magũrũ makwa nĩmo maarĩ moko makwa.

 Ndĩ tinĩnja nĩ ndaakenagio mũno nĩ gũthoma magegania ma ng’ano cia gwĩcirĩria cia sayansi. Rĩmwe na rĩmwe ndahũũraga mbica ndĩ na moko mathondeketwo wega nĩ ataaramu, mangĩahotithirie gwĩka maũndũ mothe. Ndĩ na mĩaka 14 ngĩambĩrĩria kũnyua thigara. Igĩtũma nyambĩrĩrie kwĩhe ũmĩrĩru o na ngaigua hana o ta andũ arĩa angĩ. Nĩ ta ndoigaga ũũ: ‘O na niĩ no hote gũcinyua, arĩa macinyuaga nĩ andũ agima, marĩ na moko kana matarĩ.’

Tondũ ndiendaga gũikara itarĩ na ũndũ wa gwĩka, nĩ ndatuĩkire mũmemba wa gĩkundi gĩetagwo Free German Youth, kĩrĩa kĩaheagwo mbeca nĩ thirikari na ngĩtuĩka karani. Kĩu kĩarĩ gĩturũa kĩa bata mũno gĩkundi-inĩ kĩu. Ningĩ nĩ ndaingĩrire gĩkundi-inĩ gĩa kũina, na nĩ ndoigaga marebeta na ngakorũo mathako-inĩ ma andũ arĩa marĩ mawathe. Thutha wa gĩthomo, ngĩambĩrĩria kũruta wĩra kambuni-inĩ ĩmwe. O ũrĩa mĩaka yathiaga noguo ndemenyeririe gwĩkĩra moko ma gũthondekwo kaingĩ tondũ nĩ ndendaga kũigua ndĩ mũndũ ta arĩa angĩ.

Mũthenya ũmwe njetereire mũgithi nĩguo thiĩ wĩra-inĩ, mũthuri ũmwe agĩũka harĩa ndaarĩ. Akĩnjũria kana nĩ ndĩ ndeciria atĩ Ngai no ahote kũnjokeria moko. Ũndũ ũcio ũkĩngegia mũno. Hatarĩ nganja nĩ ingĩendire gũkorũo na moko no ndionaga ũndũ ũcio ta ũngĩhotekeka. Ndaarĩ na ma biũ atĩ gũtirĩ Ngai. Kuuma hĩndĩ ĩyo ngĩambĩrĩria kwĩhithĩra mũthuri ũcio.

Matukũ maigana ũna thutha ũcio, mũndũ ũmwe twarutaga wĩra nake akĩnyita ũgeni kwao. Tũkĩnyua kahũa aciari ake makĩambĩrĩria kwaria igũrũ rĩgiĩ Ngai, ũrĩa wĩtagwo Jehova. Rĩarĩ riita rĩa mbere kũigua atĩ Ngai nĩ arĩ rĩĩtwa. (Thaburi 83:18) O na kũrĩ ũguo, ndeĩraga ũũ ngoro-inĩ: ‘Gũtirĩ Ngai o na mangiuga ũrĩa etagwo. Ngũmaiguithia nginya manjĩtĩkie.’ Tondũ ndaarĩ na ma atĩ nĩ ngũmahoota, ngĩtĩkĩra kwaragĩrĩria Bibilia. Ũndũ ũrĩa wamakirie nĩ atĩ ndiahotire kũmahe ihooto cia gũtũma metĩkie atĩ gũtirĩ Ngai.

O ũrĩa twathiaga tũgĩthuthuragia morathi ma Bibilia noguo wĩtĩkio wakwa wa atĩ gũtirĩ Ngai wathiaga ũgĩthiraga. Morathi maingĩ ma Ngai nĩ mahingĩte o na gũtuĩka maandĩkirũo mĩaka mĩingĩ mĩhĩtũku. Mũthenya ũmwe tũkĩĩruta Bibilia, nĩ twaringithanirie ũrĩa maũndũ matariĩ thĩinĩ wa thĩ na morathi ma Mathayo 24, Luka 21, na 2 Timotheo 3. O ta ũrĩa ndagĩtarĩ aroraga maũndũ matiganĩte nĩguo amenye mũrimũ wa mũndũ, noguo maũndũ matiganĩte marĩa maarathĩtwo maandeithirie kuona atĩ tũratũũra matukũ-inĩ marĩa Bibilia ĩtaga “matukũ marĩa ma kũrigĩrĩria.” * Nĩ ndaakenire mũno kuona atĩ maũndũ macio marahinga ngĩyonagĩra.

Ngĩgĩa na itũmi cia kũigana atĩ maũndũ marĩa nderutaga nĩmo ma. O na gũtuĩka ndaanyuĩte thigara kĩrũmanĩrĩrio makĩria ma mĩaka ikũmi, ngĩambĩrĩria kũhoya Jehova na ngĩcitiga. Thutha wa kwĩruta Bibilia kĩndũ ta mwaka ũmwe ũguo, ngĩbatithĩrio thĩinĩ wa kĩraĩ kĩnene Ĩpuro 27 1986. Ndabatithirio  na hitho tondũ wĩra wa Aira a Jehova nĩ wagirĩtio bũrũri-inĩ wa East Germany.

Tondũ wĩra wa Aira a Jehova nĩ wagirĩtio, twacemanagia tũkundi tũnini mĩciĩ-inĩ ya andũ. Nĩ ũndũ ũcio, ndioĩ Aira a Jehova aingĩ. Thutha ũcio, iterĩgĩrĩire ngĩtĩkĩrio nĩ thirikari thamĩre West Germany. Bũrũri-inĩ ũcio wĩra wa Aira a Jehova ndwagirĩtio! Ndĩ kũu nĩ ndathiaga ithomo nene cia Bibilia na ngĩmenyana na Aira a Jehova aingĩ mũno. Ũcio warĩ ũndũ mwega mũno.

No rĩrĩa Rũthingo rwa Berlin rwagũithirio, Aira a Jehova magĩtĩkĩrio kũruta wĩra wao. Kwoguo nĩ twahotaga gũthathaiya tũrĩ na wĩyathi. Nĩ ndendaga kuongerera ũtungata wakwa o na gũtuĩka nĩ ndetigagĩra andũ mũno. Ndaiguaga itarĩ kĩene nĩ ũndũ wa wathe wakwa na ningĩ tondũ ndahũthĩrĩte mahinda maingĩ cukuru-inĩ wa andũ arĩa marĩ mawathe. No mwaka-inĩ wa 1992 nĩ ndageririe mweri ũmwe kũhunjia mathaa 60. Nĩ ndahotire na ngĩkena mũno. Kwoguo ngĩtua itua rĩa kũhunjagia mathaa macio o mweri, na ngĩka ũguo mĩaka ĩtatũ.

Njikaraga ngĩririkanaga ciugo ici cia Bibilia: “Nũ ũtarĩ na hinya, na niĩ ngakorũo na hinya?” (2 Akorintho 11:29) O na akorũo ndirĩ moko, ndĩ na meciria na mũgambo na no hote kwaria. Kwoguo ngeragia gwĩka ũrĩa wothe ingĩhota gũteithia arĩa angĩ. Wathe wakwa nĩ ũtũmaga ngahota kũiguĩra tha arĩa marĩ na mawathe. Nĩ njũĩ ũrĩa mũndũ aiguaga ũũru akĩenda gwĩka ũndũ no ndarĩ na ũhoti. Nĩ ngeragia kũũmĩrĩria arĩa mangĩkorũo makĩhiũrania na ũndũ ta ũcio. Gũteithĩrĩria arĩa angĩ na njĩra ta ĩyo nĩ gũtũmaga ngorũo na gĩkeno.

Kwaria ma rĩmwe nĩ njiguaga nguĩte ngoro. Nĩ ndĩriragĩria kũhaana ta andũ arĩa angĩ. O na gũtuĩka nĩ hotaga kũruta mawĩra makwa ma o mũthenya, nĩ hũthagĩra ihinda inene na hinya mũingĩ gũkĩra andũ arĩa angĩ. Ciugo ici cia Afilipi 4:13 nĩcio cindeithagia o mũthenya: “Maũndũ-inĩ mothe nĩ ngoragwo na hinya kũgerera ũrĩa ũheaga hinya.” Jehova nĩ aheaga hinya ũrĩa ndĩrabatara nĩguo hote kũhingia maũndũ ma o mũthenya. Ndoigire ndirĩ hĩndĩ ngatiga Jehova tondũ nĩ menyete atĩ ndarĩ andiganĩria.

Rĩrĩa ndaarĩ mwĩthĩ nĩ nderiragĩria mũno gũkagĩa na famĩlĩ na Jehova nĩ aacokire akĩndathima na mũtumia mwega, ũrĩ wendo na tha wĩtagwo Elke. Kuongerera ũguo, nĩ ngĩte na famĩlĩ ĩngĩ nene ya aarĩ na ariũ a Ithe witũ mendete Jehova thĩinĩ wa thĩ yothe.

Ningĩ kĩĩranĩro kĩa Ngai gĩa gũgatua thĩ paradiso na erũhie “maũndũ mothe” nĩ kĩnyũmagĩrĩria tondũ nĩ ngaagĩa moko rĩngĩ. (Kũguũrĩrio 21:5) Nĩ ndaũkagĩrũo nĩ kĩĩranĩro kĩu wega ndeciria ũrĩa Jesu eekaga rĩrĩa aarĩ gũkũ thĩ. Kwa ngerekano nĩ aahonirie mũndũ warĩ muonju guoko na akĩhonia ũngĩ watinĩtio gũtũ. (Mathayo 12:13; Luka 22:50, 51) Ciĩranĩro cia Jehova na ciama iria Jesu aaringaga nĩ citũmaga ngorũo na ũũma atĩ ica ikuhĩ wathe wakwa nĩ ũkũniinwo.

O na kũrĩ ũguo, gũtirĩ kĩrathimo nyonaga kĩnene gũkĩra kũmenya Jehova. Jehova nĩ anyũmagĩrĩria na akahe hinya. Ndamũtuire baba na mũrata wakwa. Njiguaga ta Mũthamaki Daudi ũrĩa wandĩkire ũũ: “Jehova-rĩ, nĩwe hinya wakwa . . . na ndĩ mũteithĩku: tondũ ũcio ngoro yakwa ĩgagĩkengeũka mũno.” (Thaburi 28:7) Ingĩenda gũtũũra nũmĩtie ũhoro wa ma ũtũũro-inĩ wakwa wothe. Ndĩwamũkĩrĩte o na itarĩ na moko.