Hihi nĩ ũrĩ waigua ũrigĩtwo nĩ ũrĩa ũgwĩka ũrĩ hakuhĩ na mũndũ ũracakaya nĩ ũndũ wa gũkuĩrũo nĩ mũndũ endete?Rĩmwe no tũrigwo nĩ ũrĩa tũgwĩka kana tũkuuga, kwoguo tũkaumania na gũkira. No nĩ harĩ maũndũ tũngĩka na tũhote kũmateithia.

Kaingĩ ũndũ ũrĩa ũbataranagia nĩ wee gũkorũo hamwe nao na kũmeera ciugo ta “Nĩ sori mũno.” Thĩinĩ wa ũndũire ũtiganĩte, kũhĩmbĩria mũndũ kana kũmũnyita guoko nĩ njĩra njega ya kũmuonia atĩ nĩ ũramũrũmbũiya. Angĩkorũo ũcio ũkuĩrĩirũo nĩ arenda kwaria, mũthikĩrĩrie na kinyi. Ũndũ wa bata makĩria, teithia famĩlĩ ĩyo ĩkuĩrĩirũo hihi na njĩra ya kũmarutĩra wĩra ũrĩa matarahota ta kũruga, kũmarorera ciana, kana kũmateithĩrĩria mĩbango-inĩ ya mathiko. Ciĩko ta icio no iteithie mũno o na gũkĩra ciugo njega.

Thutha wa ihinda, no warie ũhoro wĩgiĩ ũcio ũkuĩte, hihi warĩrĩrie ngumo njega iria aarĩ nacio kana maũndũ mwakeneire mũrĩ hamwe. Ndeereti ta ĩyo no ĩtũme ũcio ũkuĩrĩirũo acanjamũke. Kwa ngerekano, Pam ũrĩa wakuĩrĩirũo nĩ mũthuri wake Ian mĩaka ĩtandatũ mĩhĩtũku oigaga ũũ: “Rĩmwe andũ nĩ manjĩraga maũndũ mega Ian eekire na mamwe o na ndiamoĩ, na magatũma njigue wega ngoro.”

Athuthuria nĩ monete atĩ andũ aingĩ arĩa makuĩrĩirũo  maheagwo ũteithio mũingĩ o thikũ-inĩ cia mbere, no thutha ũcio makariganĩra, na arata ao magacokerera maũndũ mao ma o mũthenya. Kwoguo, o na thutha ũcio tigagĩrĩra atĩ nĩ ũraranĩria kaingĩ na mũrata ũcio waku ũkuĩrĩirũo. * Andũ aingĩ arĩa maracakaya nĩ makenagĩra mweke ũcio mũno tondũ kĩeha kĩrĩa makoragwo nakĩo nĩ kĩnyihanyihaga.

Ta wĩcirie ngerekano ya mũirĩtu wa kuuma Japan wĩtagwo Kaori, ũrĩa wakuire ngoro mũno nĩ gũkuĩrũo nĩ mami wao, na thutha wa mĩeri 15 agĩkuĩrũo nĩ mwarĩ wa nyina ũrĩa mũkũrũ. Ũndũ ũrĩa mwega nĩ atĩ, arata ake nĩ maathire na mbere kũmũteithia matekũmũtiganĩria. Ũmwe wao wĩtagwo Ritsuko na nĩ mũkũrũ gũkĩra Kaori nĩ aatuĩkire mũrata wake wa hakuhĩ. Kaori oigire ũũ: “Kwaria ma ũndũ ũcio ndwangenagia. Ndiendaga mũndũ o na ũrĩkũ oe ithenya rĩa mami na ndieciragia kũrĩ mũndũ ũngĩhaana take. O na kũrĩ ũguo, nĩ ndaiguire ndenda Ritsuko mũno nĩ ũndũ wa ũrĩa aanũmbũyagia, o na ndaamwĩtaga mami. O kiumia nĩ twathiaga kũhunjia tũrĩ hamwe na tũgathiĩ mĩcemanio ya Gĩkristiano. Nĩ aanyitaga ũgeni tũkanyuanĩra cai hamwe, akandehera irio, na akanyandĩkĩra marũa na kandi maita maingĩ. Muonere mwega wa Ritsuko nĩ wandeithirie mũno.”

Mĩaka ikũmi na ĩĩrĩ nĩ mĩhĩtũku kuuma mami wa Kaori aakua, na ũmũthĩ Kaori marĩ na mũthuri wake makoragwo marĩ ahunjia a hĩndĩ ciothe. Oigaga ũũ: “Ritsuko no athiaga na mbere kũnũmbũiya. Rĩrĩa ndacoka mũciĩ, ndiagaga kũmũceerera na nĩ ngenagĩra gũkorũo hamwe nake tondũ nĩ anjĩkagĩra ngoro.”

Ngerekano ya mũndũ ũngĩ wagunĩkire na ũteithio ta ũcio nĩ Poli, ũrĩa nĩ Mũira wa Jehova bũrũri-inĩ wa Cyprus. Mũthuri wa Poli wetagwo Sozos, aarĩ mũtugi na nĩ aigire kĩonereria kĩega arĩ mũrĩithi wa kĩũngano gĩa Gĩkristiano na njĩra ya kũnyitaga ũgeni kaingĩ ciana iria itarĩ aciari na atumia a ndigwa kwao mũciĩ makorũo hamwe na marĩanĩre. (Jakubu 1:27) Ũndũ wa kĩeha nĩ atĩ, Sozos arĩ na mĩaka 53 nĩ aakuire nĩ ũndũ wa kansa ya tombo. Poli oigire ũũ: “Ndaatigirũo nĩ mũthuri wakwa ũrĩa twaikarĩte nake mĩaka 33 thĩinĩ wa kĩhiko.”

Thutha wa mathiko, Poli marĩ na mũriũ wake ũrĩa mũnini wĩtagwo Daniel wa mĩaka 15, nĩ maathamĩire Canada. Marĩ kũu makĩambĩrĩria kũnyitanĩra na kĩũngano kĩa Aira a Jehova. Poli aririkanaga ũũ: “Arata a kĩũngano kĩu ndaathire matiamenyaga maũndũ marĩa twakoretwo tũhĩtũkĩire na moritũ marĩa twarĩ namo. No maũndũ macio matiamagirĩrĩirie gũtũkuhĩrĩria na gũtũũmĩrĩria kũgerera ciugo ciao cia wendo na gũtũhe ũteithio. Ũteithio ũcio warĩ wa bata mũno, makĩria ihinda-inĩ rĩu mũriũ wakwa aabataraga ithe. Arĩa maatongoragia kĩũngano-inĩ nĩ monanagia atĩ nĩ maakenagio mũno nĩ Daniel. Ũmwe wao aatigagĩrĩra atĩ Daniel arĩ hamwe nao agĩthiĩ gwĩkenia hamwe na arata kana gũthaka mũbira.” Ũmũthĩ Daniel marĩ na mami wao marathiĩ na mbere na ũtũũro wao o wega.

Ma nĩ atĩ, nĩ kũrĩ njĩra nyingĩ tũngĩhũthĩra gũteithia na kũũmĩrĩria arĩa maracakaya. Bibilia o nayo nĩ ĩtũũmagĩrĩria kũgerera kĩĩrĩgĩrĩro kĩega mũno kĩa mahinda mokĩte.