Ũhoro Mwega Ũrĩa Waandĩkirũo nĩ Johana 17:1-26
17 Thutha wa Jesu kwaria maũndũ macio, agĩtiira maitho akĩrora igũrũ, akiuga: “Awa, ihinda nĩ rĩakinya. Goocithia mũrũguo nĩguo mũrũguo akũgoocithie,+
2 o ta ũrĩa ũmũheete wathani igũrũ rĩa andũ othe,+ nĩguo ahe arĩa othe ũmũheete+ muoyo wa tene na tene.+
3 Naguo muoyo wa tene na tene nĩ atĩrĩ,+ nĩ makũmenye wee Ngai ũrĩa ũmwe wa ma,+ na mamenye ũrĩa watũmire, nĩwe Jesu Kristo.+
4 Nĩ ngũgoocithĩtie gũkũ thĩ,+ na ngarĩkia wĩra ũrĩa ũũheete ndute.+
5 Awa, rĩu ngoocithia ndĩ hakuhĩ nawe na riri o ta ũrĩa ndakoragwo naguo ndĩ hakuhĩ nawe thĩ ĩtanombwo.*+
6 “Nĩ nguũrĩtie* rĩĩtwa rĩaku kũrĩ andũ arĩa waheire kuuma thĩinĩ wa thĩ.+ Maarĩ aku, ũkĩhe, na nĩ marũmĩtie* kiugo gĩaku.
7 Rĩu nĩ mamenyete atĩ maũndũ marĩa mothe waheire moimĩte kũrĩ wee;
8 tondũ nĩ ndĩmaheete ciugo iria waheire,+ na magaciĩtĩkĩra na nĩ mamenyete na ma atĩ ndokire ndũmĩtwo nĩwe,+ na nĩ metĩkĩtie atĩ nĩwe wandũmire.+
9 Ndĩrahoya nĩ ũndũ wao; ti thĩ ndĩrahoera, ĩndĩ ndĩrahoya nĩ ũndũ wa arĩa waheire, tondũ nĩ aku;
10 nacio indo ciakwa ciothe nĩ ciaku na ciaku nĩ ciakwa,+ na nĩ ngoocithĩtio gatagatĩ-inĩ kao.
11 “Ndirĩkoragwo thĩinĩ wa thĩ,+ ĩndĩ o marĩkoragwo thĩinĩ wa thĩ, no niĩ ndĩroka kũrĩ wee. Awa Mũtheru, magitagĩre+ nĩ ũndũ wa rĩĩtwa rĩaku mwene rĩrĩa ũũheete, nĩguo makoragwo marĩ kĩndũ kĩmwe* o ta ũrĩa ithuĩ tũrĩ kĩndũ kĩmwe.*+
12 Hĩndĩ ĩrĩa ndĩrakoragwo hamwe nao, nĩ ndĩramagitagĩra+ nĩ ũndũ wa rĩĩtwa rĩaku mwene, rĩrĩa ũũheete; na nĩ ndĩmagitĩrĩte,+ na gũtirĩ o na ũmwe wao ũũrĩte o tiga mũrũ wa kwanangwo,+ nĩguo rĩandĩko rĩhinge.+
13 No rĩu ndĩroka kũrĩ wee, na ndĩroiga maũndũ maya gũkũ thĩ, nĩguo gĩkeno gĩakwa gĩtuĩke gĩkinyanĩru thĩinĩ wao.+
14 Nĩ ndĩmaheete kiugo gĩaku, no thĩ nĩ ĩmathũũrĩte, tondũ o ti a thĩ ĩno,+ o ta ũrĩa o na niĩ itarĩ wa thĩ ĩno.
15 “Ndirakũhoya ũmarute thĩinĩ wa thĩ, no ndĩrakũhoya ũmagitagĩre kuumana na ũrĩa mũũru.+
16 O ti a thĩ ĩno,+ o ta ũrĩa niĩ itarĩ wa thĩ ĩno.+
17 Matherie* na ũhoro ũrĩa wa ma;+ kiugo gĩaku nĩkĩo ma.+
18 O ta ũrĩa wandũmire thĩinĩ wa thĩ, o na niĩ nĩ ndĩmatũmĩte thĩinĩ wa thĩ.+
19 Nĩ ndĩretheria nĩ ũndũ wao, nĩguo o nao matherio nĩ ũhoro wa ma.
20 “Ndirahoya nĩ ũndũ wa aya oiki, no nĩ ũndũ wa nginya arĩa marĩgĩaga na wĩtĩkio harĩ niĩ kũgerera kiugo kĩao,
21 nĩguo othe makorũo marĩ kĩndũ kĩmwe,+ o ta ũrĩa wee Awa ũkoragwo ũrĩ na ũiguano na niĩ,+ na niĩ ngakorũo na ũiguano nawe, atĩ o nao makoragwo marĩ na ũiguano na ithuĩ, nĩguo thĩ ĩtĩkie atĩ nĩwe wandũmire.
22 Nĩ ndĩmaheete riri ũrĩa ũũheete, nĩguo makorũo marĩ kĩndũ kĩmwe o ta ũrĩa ithuĩ tũrĩ kĩndũ kĩmwe.+
23 Niĩ ngakorũo na ũiguano nao nawe ũgakorũo na ũiguano na niĩ, nĩgetha matuĩke kĩndũ kĩmwe biũ,* nĩguo thĩ ĩmenye atĩ nĩ wandũmire na atĩ nĩ ũmendete o ta ũrĩa ũnyendete.
24 Awa, ndĩrenda atĩ arĩa ũũheete makoragwo hamwe na niĩ harĩa ndĩ,+ nĩgetha meroragĩre riri ũrĩa ũũheete, nĩ gũkorũo wanyendire mbere ya kĩambĩrĩria gĩa thĩ.+
25 Awa Mũthingu, thĩ ndĩrĩ ĩrakũmenya,+ no niĩ nĩ ngũmenyete,+ nao aya nĩ marĩkĩtie kũmenya atĩ nĩwe wandũmire.
26 Nĩ ndĩmamenyithĩtie rĩĩtwa rĩaku na no ngũrĩmenyithania,+ nĩguo wendo ũrĩa ũnyendete naguo ũkorũo thĩinĩ wao na niĩ ngorũo na ũiguano nao.”+
Tũũhoro twa magũrũ-inĩ
^ Kana “andũ matanombwo.”
^ Kana “menyithanĩtie.”
^ Kana “mathĩkĩire.”
^ Kana “tũrĩ na ũrũmwe.”
^ Kana “makoragwo na ũrũmwe.”
^ Kana “Maamũre.”
^ Kana “magĩe na ũrũmwe mũkinyanĩru.”
