Ndakũrĩire kũndũ kũhooreru na kũruru nja wa taũni ya Tampere, Finland. Famĩlĩ itũ ndĩarĩ ya andũ a ndini mũno no nĩ twendete gĩthomo na mĩtugo mĩega. Mami nĩ Mũnjĩrĩmani, na rĩmwe na rĩmwe ndĩ mũnini nĩ ndathiaga gĩcigo-inĩ kĩa Njĩrĩmani ya Ithũĩro kũrĩa cũcũ na guka maaikaraga.

 Ndũũrĩte nyendete mathaako kuuma ndĩ mwana. Rĩrĩa ndarĩ mũnini, ndathaakaga mĩthaako ya mĩthemba yothe, no ndĩ na kĩndũ mĩaka 14 ngĩthuura gwĩkĩrĩra mũno mũthaako wa tennis. Ngĩkinyia mĩaka 16, ndemenyeragia maita merĩ kana matatũ o mũthenya​—maita merĩ ndakoragwo na mũndũ wa kũũmenyeria ngacoka ngemenyeria ndĩ wiki hwaĩ-inĩ. Nĩ ndakenagio nĩ maũndũ matiganĩte ma mũthaako ũcio; gũthaaka tennis kwarĩ njĩra ya gwĩthima hinya wa meciria na wa mwĩrĩ. O na gũtuĩka nĩ ndakenagĩra gũkorũo hamwe na arata akwa na kũnyua njohi rĩmwe na rĩmwe, ndirĩ ndekora thĩna-inĩ wa kũhũthĩra ndawa cia kũrebia kana kũnyua njohi gũkĩria gĩthimi. Gũthaaka tennis nĩkuo kwarĩ ũndũ ũrĩa mũnene ũtũũro-inĩ wakwa.

 Ndambĩrĩirie gũthaaka macindano-inĩ ma ATP ndĩ na mĩaka 17. a Thutha wa kũhootana macindano-inĩ maigana ũna, nĩ ndagĩire ngumo bũrũri wothe. Ndĩ na mĩaka 22, ndarĩ ũmwe wa athaaki 50 a tennis arĩa maarĩ njorua thĩinĩ wa thĩ.

 Ihinda-inĩ rĩa mĩaka mĩingĩ, nĩ ndathiire kũndũ gũtiganĩte thĩinĩ wa thĩ gũthaaka mũthaako wa tennis. Nĩ ndonire kũndũ gũtiganĩte kwega, no ningĩ nĩ ndamenyire mathĩna maingĩ marĩa marĩ thĩinĩ wa thĩ ta wĩki-naĩ, ũhũthĩri wa ndawa cia kũrebia, na mathĩna mangĩ marĩa matũrigicĩirie. Kwa ngerekano, tũrĩ bũrũri-inĩ wa Amerika (US) nĩ harĩ icigo cia taũni imwe twerirũo tũtigaceere nĩ ũndũ wa wĩki-naĩ mũnene. Maũndũ macio mothe nĩ maathumbũraga. Makĩria ma ũguo, o na gũtuĩka ndekaga ũndũ ũrĩa ndendete, no ndaiguaga itaiganĩire.

 Mũirĩtu ũrĩa twarĩ ndũgũ nake wetagwo Sanna, nĩ aambĩtie kwĩruta Bibilia na Aira a Jehova. Nĩ ndamakire hanini kuona akĩgucĩrĩrio nĩ maũndũ ma ndini, no ndiamũgiririe kwĩruta. Mwaka-inĩ wa 1990 nĩ twahikanirie, na mwaka ũrĩa warũmĩrĩire akĩbatithio agĩtuĩka Mũira wa Jehova. No niĩ ndieyonaga ndĩ mũndũ wa ndini, o na gũtuĩka nĩ ndetĩkĩtie atĩ nĩ kũrĩ Ngai. Nĩ ndaririkanire atĩ cũcũ witũ ũrĩa warĩ Mũnjĩrĩmani nĩ aathomaga Bibilia mũno, o na nĩ aandutĩte kũhoya.

 Mũthenya ũmwe, rĩrĩa twĩ na Sanna twathiĩte gũceerera mũthuri ũmwe na mũtumia wake arĩa maarĩ Aira a Jehova, mũthuri ũcio wetagwo Kari nĩ aanyonirie ũrathi wa Bibilia wĩgiĩ ‘matukũ ma kũrigĩrĩria.’ (2 Timotheo 3:1-5) Ũndũ ũcio nĩ wahutirie mũno, tondũ nĩ ndonire atĩ nĩ wataaragĩria gĩtũmi kĩa maũndũ gũkorũo marĩ moru mũno thĩinĩ wa thĩ. Mũthenya ũcio, tũtiaaririe maũndũ maingĩ megiĩ ndini. No kuuma hĩndĩ ĩyo, nĩ twambĩrĩirie gũteeretaga na Kari ũhoro wa Bibilia, na nĩ ndonire atĩ maũndũ mothe marĩa nderutaga maarĩ ma ma. Nĩ ũndũ wa gũkorũo na mĩhang’o mĩingĩ na gũthiaga kaingĩ, ndwarĩ ũndũ mũhũthũ gũcemanagia na Kari kaingĩ, no we ndaakuaga ngoro. Aanyandĩkagĩra marũa akanjokeria ciũria iria ndorĩtie tũkĩĩruta. Ciũria ciothe nditũ ciĩgiĩ ũtũũro nĩ ciacokagio na njĩra njega thĩinĩ wa Bibilia, na o kahora ngĩambĩrĩria kuona ũndũ ũrĩa mũnene Bibilia yaragĩrĩria​—atĩ Ũthamaki wa Ngai nĩ ũkaahingia muoroto wa Ngai. Kũmenya rĩĩtwa rĩa Ngai, Jehova, na kuona maũndũ marĩa atwĩkĩire nĩ kwahutirie mũno. (Thaburi 83:18) Ũndũ ũrĩa wahutirie makĩria warĩ ũrĩa aaheanire igongona rĩa ũkũũri​—Ngai ndeekire ũguo nogetha ahingie watho no nĩ wendo oonanirie. (Johana 3:16) Ningĩ nĩ ndamenyire atĩ ndarĩ na mweke wa gũtuĩka mũrata wa Ngai na gũtũũra tene na tene thĩinĩ wa paradiso ĩrĩ na thayũ. (Jakubu 4:8) Ngĩambĩrĩria kwĩyũria atĩrĩ, “Ingĩonania atĩa atĩ ndĩ na ngatho?”

 Nĩ ndecũranirie mũno ũhoro wa ũtũũro wakwa. Nĩ nderutaga kuuma Bibilia-inĩ atĩ gĩkeno kĩrĩa kĩnene kiumanaga na kũheana, na nĩ ndaiguaga ngĩenda kwĩra andũ arĩa angĩ maũndũ marĩa njĩtĩkĩtie. (Atũmwo 20:35) Ndĩ mũthaaki, ndakoragwo kũraihu na mũciĩ thikũ 200 harĩ mwaka ngĩthaaka macindano-inĩ. Andũ othe thĩinĩ wa famĩlĩ itũ meeciragia o ũhoro wakwa​—ũhoro wa kwĩmenyeria gwakwa, maũndũ marĩa ndekaga o mũthenya, na wĩra wakwa. Ngĩona atĩ nĩ ndabataraga gwĩka ũgarũrũku.

 Nĩ ndamenyaga atĩ gũtigana na mũthaako ũcio wandehagĩra mbeca nyingĩ nĩ ũndũ wa maũndũ ma ndini rĩngĩarĩ itua andũ aingĩ matangĩataũkĩirũo. No mweke wa kũmenya Jehova makĩria na kũgĩa na muoyo wa tene na tene warĩ wa goro gũkĩra kĩheo o gĩothe ingĩacindire ngĩthaaka tennis, kwoguo kwarĩ ũndũ mũhũthũ gũtua itua rĩa ũrĩa ingĩekire. Nĩ ndatuĩte itua rĩa kwaga gũthikĩrĩria ũrĩa andũ arĩa angĩ mangĩoigire​—rĩrĩ rĩarĩ itua rĩakwa. Mũhari ũmwe wa Bibilia ũrĩa wanjĩkĩraga ngoro mũno kũregana na hatĩka ta icio nĩ Thaburi 118:6, ũrĩa uugaga ũũ: “Jehova arĩ mwena wakwa; ndigwĩtigĩra. Mũndũ-rĩ, angĩnjĩka atĩa hihi?”

 Ihinda-inĩ rĩu, andũ amwe nĩ maaheire kandarathi ya mbeca nyingĩ ĩrĩa ĩngĩahotithirie gũthiĩ na mbere gũthaaka mũthaako ũcio itarĩ na mĩtangĩko, kwa ihinda rĩa mĩaka mĩingĩ. O na kũrĩ ũguo, nĩ ndatuĩte itua, na kwoguo ngĩrega kandarathi ĩyo na mũthia-inĩ ngĩtiga gũthaakaga macindano-inĩ ma ATP. Ngĩthiĩ na mbere kwĩruta Bibilia, na Julaĩ 2, 1994, ngĩbatithio ngĩtuĩka Mũira wa Jehova.

 Niĩ ndiabatarire kũnyitwo nĩ thĩna mũnene atĩ nĩguo ndĩcirie ũhoro wa Ngai. O na ndiĩyonaga ta mũndũ wacaragia ũhoro wa ma. Ndonaga mũtũũrĩre wakwa ũrĩ mwega na ta gũtarĩ ũndũ ũngĩ ingĩabatarire. O na kũrĩ ũguo, nĩ ta ũhoro wa ma wa Bibilia wetagĩrĩra ndĩwone, na nĩ ndonire atĩ ũtũũro nĩ ũrĩ muoroto makĩria, na ũtũũro wakwa nĩ wagĩrĩte makĩria gũkĩra ũrĩa ingĩecirĩirie! Famĩlĩ itũ nĩ ĩkoragwo na hinya makĩria na ĩgakorũo na ũrũmwe gũkĩra hĩndĩ ĩngĩ o yothe. Na nĩ ngenaga mũno atĩ ariũ akwa atatũ nĩ marũmĩrĩire makinya makwa​—ti marĩ athaaki, no nĩ marĩ Akristiano.

 O na rĩu no ngenagĩra gũthaaka tennis. Mĩaka-inĩ yothe ngoretwo ngĩona mabataro makwa kũgerera kũruta mawĩra makonainie na mũthaako wa tennis, ta ndĩ mũrutani na ndĩ mũrũgamĩrĩri wa kũrĩa mũthaako ũcio ũthaakagĩrũo. No rĩu ndiĩciragia o ũhoro wa mathaako ũtũũro-inĩ wakwa. Tene ndemenyeragia mathaa maingĩ o kiumia nĩguo nduĩke mũthaaki njorua wa tennis. Rĩu, ndĩ mũhunjia wa mahinda mothe, nĩ ngenaga kũhũthĩra mahinda makwa gũteithia andũ angĩ merute na mahũthĩre motaaro ma Bibilia marĩa maagarũrire ũtũũro wakwa. Nĩ ngenaga mũno nĩ ũndũ wa gũkorũo njigĩte ũrata wakwa na Jehova Ngai mbere ũtũũro-inĩ wakwa, o hamwe na wĩra wa kũhe andũ arĩa angĩ kĩĩrĩgĩrĩro kĩega kĩa mahinda mokĩte.​—1 Timotheo 6:19.