Marũa ma Mbere Kũrĩ Timotheo 6:1-21
6 Andũ arĩa marĩ rungu rwa icoki rĩa ũkombo nĩ mathiĩ na mbere kuonaga athani ao magĩrĩire kũheo gĩtĩo gĩothe,+ nĩgetha rĩĩtwa rĩa Ngai o hamwe na ũrutani itikanacambio.+
2 Ningĩ-rĩ, arĩa mathagwo nĩ andũ metĩkĩtie matikanamaagĩre gĩtĩo atĩ tondũ nĩ ariũ a Ithe witũ. Ithenya rĩa ũguo, magĩrĩirũo gũtungataga meyendeire o na makĩria, nĩ gũkorũo arĩa magunĩkaga nĩ ũtungata wao mwega nĩ etĩkia na nĩ mendetwo.
Thiĩ na mbere kũrutana maũndũ macio na kũheana motaaro macio.
3 Mũndũ o wothe angĩrutana ũrutani ũngĩ ũtaratwarana na ũrutani ũrĩa wagĩrĩire,*+ ũrĩa uumĩte kũrĩ Mwathani witũ Jesu Kristo, o na kana ũrutani ũrĩa ũratwarana na wĩrutĩri Ngai-rĩ,+
4 nĩ mwĩtĩo arĩ naguo na ndarataũkĩrũo nĩ ũndũ o na ũrĩkũ.+ Aiyũrĩtwo nĩ ngarari na ngucanio ciĩgiĩ ciugo.+ Maũndũ macio marehaga ũiru, ngũĩ, njambanio,* gwĩkũũanĩra ũũru,
5 ngucanio itarathira ciĩgiĩ tũmaũndũ tũnini kuumana na andũ arĩa mathũkĩtio meciria+ na matarĩ na ũhoro ũrĩa wa ma, magĩĩciragia atĩ wĩrutĩri Ngai nĩ njĩra ya kwĩguna.+
6 Nĩ ma, kwĩrutĩra harĩ Ngai o hamwe na kũiganĩra nĩ kũrĩ ũguni mũnene.+
7 Nĩ gũkorũo gũtirĩ kĩndũ twarehire thĩinĩ wa thĩ, na gũtirĩ kĩndũ tũngiuma nakĩo kuo.+
8 Nĩ ũndũ ũcio, tũngĩkorũo na irio na nguo-rĩ,* nĩ tũrĩiganagĩra na indo icio.+
9 No arĩa makoragwo matuĩte itua rĩa gũtonga magũaga magerio-inĩ na mũtego-inĩ+ na merirĩria-inĩ maingĩ ma ũrimũ na moru marĩa matũmaga andũ manangwo na maniinwo.+
10 Nĩ gũkorũo kwenda mbeca nĩ kĩhumo kĩa maũndũ moru ma mĩthemba yothe, na andũ amwe nĩ ũndũ wa gũthingata wendo ũcio nĩ mahĩtithĩtio makehera thĩinĩ wa wĩtĩkio na magethecanga kũndũ guothe na ruo rũingĩ.+
11 No rĩrĩ, wee mũndũ ũyũ wa Ngai, ũragĩra maũndũ macio. Ĩndĩ thingataga ũthingu, wĩrutĩri Ngai, wĩtĩkio, wendo, ũkirĩrĩria, na ũhooreri.+
12 Rũaga mbaara ĩrĩa njega ya wĩtĩkio; rũmia biũ muoyo wa tene na tene ũrĩa wetĩirũo na ũkiumbũra na njĩra njega ũhoro waguo mbere ya aira aingĩ.
13 Ndagwatha mbere ya Ngai ũrĩa ũtũũragia indo ciothe muoyo, na mbere ya Kristo Jesu, o ũcio woimbũrire na njĩra njega arĩ mũira mbere ya Pontio Pilato+
14 atĩ ũrũmagĩrĩre rĩathani rĩu na njĩra theru na ĩtarĩ na ũcuke o nginya hĩndĩ ya kũguũrio kwa Mwathani witũ Jesu Kristo,+
15 ũndũ ũrĩa ũkoonanio nĩ ũrĩa wiki Mũtongoria ũrĩ Hinya na ũrĩ gĩkeno mahinda marĩa matuĩtwo maakinya. Ũcio nĩwe Mũthamaki wa arĩa mathanaga marĩ athamaki na Mwathani wa arĩa mathanaga marĩ athani,+
16 ũrĩa wiki ũtangĩkua,+ o we ũtũũraga ũtheri-inĩ ũtangĩkinyĩrĩka,+ na gũtirĩ mũndũ ũrĩ wamuona kana ũngĩmuona.+ Ũcio arogĩa na gĩtĩo na ũhoti tene na tene. Ameni.
17 Taara* arĩa atongu thĩinĩ wa mũtabarĩre ũyũ wa maũndũ* matigakorũo na mwĩtĩo,* na matikaigage kĩĩrĩgĩrĩro kĩao harĩ ũtonga ũrĩa ũtamenyagĩrũo,+ ĩndĩ maigage kĩĩrĩgĩrĩro kĩao harĩ Ngai, ũrĩa ũtũheaga na ũtaana indo ciothe iria tũkenagĩra.+
18 Meere mekage maũndũ mega, makĩragĩrĩrie harĩ ciĩko njega, matuĩke ataana, mehaarĩirie kũgayagĩra andũ arĩa angĩ indo ciao,+
19 makĩĩigagĩra mũthithũ wa mũthingi mwega wa mahinda marĩa maroka,+ nĩgetha marũmie biũ muoyo ũrĩa wa ma.+
20 Wee Timotheo, gitagĩra kĩrĩa wĩhokeirũo,+ ũgethemaga mĩario ya tũhũ ĩrĩa ĩthahagia maũndũ matheru o na ngarari cia “ũmenyo” wa maheeni.+
21 Nĩ ũndũ wa kwĩyonania na ũmenyo ta ũcio, andũ amwe nĩ meherete wĩtĩkio-inĩ.
Ũtugi mũnene wa Ngai ũroikara hamwe na inyuĩ.
Tũũhoro twa magũrũ-inĩ
^ Kana “ũrĩa ũrĩ ũguni.”
^ Kana “irumi.”
^ Kana “ũikaro.” Ũkk., “kĩndũ gĩa kwĩhumbĩra.”
^ Kana “matikeĩciragie mũno.”
^ Kana “mahinda maya.” Rora Ũthathaũri wa Ciugo.
^ Kana “Atha.”
