Ndini ya mahinda maya ya Aira a Jehova yaambĩrĩirie mĩaka-inĩ ya 1870. Ihinda-inĩ rĩu, gakundi kanini ka arutwo a Bibilia arĩa maaikaraga hakuhĩ na Pittsburgh, Pennsylvania, Amerika (US), makĩambĩrĩria mũtaratara wa gũthuthuria Bibilia. Maaringithanagia wĩtĩkio wa makanitha na ũrĩa Bibilia ĩrutanaga kũna. Makĩambĩrĩria gũcaba maũndũ marĩa meruta thĩinĩ wa mabuku, ngathĩti cia mohoro, na ngathĩti ĩrĩa rĩu ĩtagwo Mũrangĩri—Yanagĩrĩra Ũthamaki wa Jehova.

 Gakundi-inĩ kau ka arutwo a Bibilia haarĩ na mũthuri wetagwo Charles Taze Russell. O na gũtuĩka Russell nĩ aambĩrĩirie gũtongoria wĩra wa kũrutana Bibilia na nĩwe warĩ mwandĩki wa mbere wa Mũrangĩri, ndaarĩ mwambĩrĩria wa ndini njerũ. Muoroto wa Russell na Arutwo a Bibilia arĩa angĩ, ta ũrĩa gĩkundi kĩu kĩoĩkaine, warĩ gũtwarithia na mbere ũrutani wa Jesu Kristo na kũrũmĩrĩra mĩtugo ya kĩũngano gĩa Gĩkristiano kĩa mahinda ma atũmwo. Tondũ Jesu nĩwe Mwambĩrĩria wa Ũkristiano, tũmuonaga arĩ we mwambĩrĩria wa ndini itũ.—Akolosai 1:18-20.