Aira a Jehova matithiaga mbaara-inĩ nĩ ũndũ wa itũmi ici:

1.   Gwathĩkĩra Ngai. Bibilia yugaga atĩ ndungata cia Ngai nĩ ‘igaatura hiũ ciao cia njora ituĩke hiũ cia mĩraũ’ na “matikeruta mbaara rĩngĩ.”—Isaia 2:4.

2.   Gwathĩkĩra Jesu. Mũtũmwo Petero eerirũo nĩ Jesu ũũ: “Cokia rũhiũ rwaku rwa njora handũ haruo, nĩ gũkorũo arĩa othe moyaga rũhiũ rwa njora makaaniinwo o na rũhiũ rwa njora.” (Mathayo 26:52) Kũgerera ciugo icio, Jesu oonanirie atĩ arũmĩrĩri ake matiagĩrĩirũo kuoya matharaita ma mbaara.

    Arutwo a Jesu nĩ mathĩkagĩra watho wa gũkorũo ‘matarĩ a thĩ ĩno’ na njĩra ya kwaga kwĩingĩria o na hanini maũndũ-inĩ ma ũteti. (Johana 17:16) Matingagĩrĩra maũndũ ma mbaara kana kũingĩrĩra matua ma andũ arĩa marenda kũingĩra njeshi-inĩ.

3.   Kwenda andũ arĩa angĩ. Jesu aathire arutwo ake ‘mendanage.’ (Johana 13:34, 35) Kwoguo mangĩgakorũo marĩ ũrũmwe wa thĩ yothe wa aarĩ na ariũ a Ithe ũmwe na gũtirĩ o na ũmwe wao ũngĩkarũa na ũrĩa ũngĩ.—1 Johana 3:10-12.

4.   Kũrũmĩrĩra kĩonereria kĩa Akristiano a Tene. Ibuku rĩa Encyclopedia of Religion and War riugaga ũũ: “Arũmĩrĩri a tene a Jesu nĩ maaregaga mbaara na makarega gũtuĩka mbũtũ cia mbaara,” moonaga gwĩka ũguo arĩ mĩtugo “ĩtangĩtwarana na wendo ũrĩa Jesu aarutanire wa kwenda thũ ciaku.” O ũndũ ũmwe na ũcio, mũthomi ũmwe wa maũndũ ma ndini Mũnjĩrĩmani wĩtagwo Peter Meinhold ooigire ũũ igũrũ rĩa arũmĩrĩri acio a Jesu: “Gũtuĩka mũmbirarũ na gũkorũo ũrĩ Mũkristiano moonekaga marĩ maũndũ merĩ matangĩtwarana.”

 Aira a Jehova nĩ andũ marĩ ũguni kũrĩ mũingĩ na nĩ mendete thayũ na matikoragwo marĩ ũgwati harĩ ũgitĩri wa mabũrũri marĩa maikaraga. Nĩ tũheaga thirikari gĩtĩo, o ta ũrĩa Bibilia yugĩte thĩinĩ wa Maandĩko maya:

•   “Mũndũ o wothe nĩ athĩkagĩre athani arĩa anene.”—Aroma 13:1.

•   “Nĩ ũndũ ũcio-rĩ, rĩhai Kaisari indo cia Kaisari, no indo cia Ngai mũrĩhe Ngai.”—Mathayo 22:21.

 Nĩ ũndũ ũcio, nĩ twathĩkagĩra watho, tũkarĩha magooti na tũkanyitanĩra na thirikari igĩtungatĩra mũingĩ.