Aira a Jehova Makoragwo na Mawoni Marĩkũ Megiĩ Ndigano?

THAAKA

Tũkoragwo na mawoni ta ma Bibilia ũhoro-inĩ wĩgiĩ kĩhiko na ndigano. Ngai akĩambĩrĩria kĩhiko, eendaga ũkorũo ũrĩ ũndũ wa gũtũũra gatagatĩ ka mũthuri na mũtumia. Ũndũ ũrĩa tu ũngĩtũma andũ matigane nĩ ngomanio itagĩrĩire.—Mathayo 19:5, 6, 9.

Hihi Aira a Jehova nĩ mateithagia andũ arĩa marĩ na ihiko irĩ na mathĩna?

Ĩĩ nĩ twĩkaga ũguo kũgerera njĩra ici:

Mabuku maitũ. Kaingĩ mabuku maitũ nĩ makoragwo na ũhoro ũngĩteithia andũ arĩa marĩ ihiko-inĩ o na iria ingĩkorũo na mathĩna manene biũ. Kwa ngerekano, no ũthome icunjĩ ici, “Wajibika Sikuzote Katika Ndoa Yako,” “Jinsi ya Kusamehe,” na “Jinsi ya Kuanza Kuaminiana Tena.”
Rĩrĩa tũcemanĩtie hamwe nĩ ũndũ wa ũthathaiya. Nĩ twaragĩrĩria motaaro ma Bibilia mangĩteithia andũ arĩa marĩ kĩhiko-inĩ rĩrĩa tũcemanĩtie ciũngano-inĩ kana igomano-inĩ nĩ ũndũ wa ũthathaiya.
Athuri a kĩũngano. Athuri a kĩũngano nĩ mateithagĩrĩria andũ arĩa mahikanĩtie na njĩra ya kũmahe ũtaaro kuuma Bibilia-inĩ ta ũrĩa ũrĩ thĩinĩ wa Aefeso 5:22-25.

Hihi athuri a kĩũngano no maheane rũtha atĩ nĩguo Mũira wa Jehova atigane na mũndũ ũrĩa mahikanĩtie nake?

Aca. O na andũ arĩa mahikanĩtie mangĩra athuri a kĩũngano mamahe ũtaaro wĩgiĩ mathĩna ma famĩlĩ, athuri matingĩmatuĩra itua rĩa ũrĩa magĩrĩirũo nĩ gwĩka. (Agalatia 6:5) O na kũrĩ ũguo, mũndũ angĩtigana na ũrĩa mahikanĩtie nake hatarĩ na itũmi cia Kĩĩmaandĩko, ndetĩkĩrĩtio nĩ Maandĩko kũhika kana kũhikania rĩngĩ.—1 Timotheo 3:1, 5, 12.

Aira a Jehova makoragwo na mawoni marĩkũ megiĩ kweheranĩra?

Bibilia ĩkĩraga ngoro andũ arĩa mahikanĩtie maikare hamwe o na rĩrĩa gwĩka ũguo gũtarĩ ũndũ mũhũthũ. (1 Akorintho 7:10-16) Andũ no mahote kũniina mathĩna maingĩ mangĩhoya na kĩyo, marũmĩrĩre motaaro ma Bibilia, na monanie wendo.—1 Akorintho 13:4-8; Agalatia 5:22.

O na kũrĩ ũguo, Akristiano amwe manona atĩ maũndũ nĩ maritũhire gũkĩria njano na magatua itua rĩa kweherera ũrĩa mahikanĩtie nĩ ũndũ wa itũmi ta ici:

Mũndũ kũrega kũhingĩria famĩlĩ yake mabataro.—1 Timotheo 5:8.
Gwĩkwo maũndũ matarĩ mega ta kũhũũrũo.—Thaburi 11:5.
Kũgirio biũ kũhingia maũndũ ma kĩĩroho. Kwa ngerekano, mũndũ no aringĩrĩrie ũrĩa mahikanĩtie nake aune watho wa Ngai, na ũndũ ũcio ũtũme ũcio ũngĩ atue itua rĩa kũmweherera tondũ Bibilia yugaga atĩ no mũhaka “twathĩkĩre Ngai arĩ we mũtongoria, no ti andũ.”—Atũmwo 5:29.