Khyndiat sngi shuwa ba un ïap, u Jisu u la pynbna: “Ïa kane ka Khubor Babha shaphang ka Hima yn ïalap ha satlak ka pyrthei kum ka sakhi ha ki jait bynriew baroh. Tang hadien kata kan wan ka jingkut.” [Matheus (Mathaios) 24:14, Baibyl Khasi Katholik] Hynrei kumno yn pyndep ïa kane ka kam ïalap ha shityllup ka pyrthei?​—Loukas 8:1.

Ngi pyrshang ban kynduh ïa ki briew ha ïing jong ki. U Jisu u la ai jinghikai ïa la ki synran ban ïalap ïa ka khubor babha na ka ïing sha ka ïing. (Mathaios 10:11-13; Kam 5:42; 20:20) Ha ka spah snem banyngkong la mangkyrpang ïa ki jaka ba ki nongïalap kin ïalap. (Mathaios 10:5, 6; 2 Korinth 10:13) Kumjuh ruh mynta, la pynïaid ryntih ïa ka kam ïalap jong ngi, bad ïa kawei pa kawei ka balang la mangkyrpang ïa ki jaka ba kin pyndep. Kane kan ïarap ïa ngi ban pyndep ïa ka hukum jong u Jisu “ban ialap ha u paitbah, bad ban phla.”​—Kam 10:42.

Ngi ïaleh katba lah ban ïakynduh ïa ki briew kat haba ki don. U Jisu ruh u la pyni nuksa da kaba u ïalap sha ki briew ha ki jaka paidbah kum harud duriaw ne ha ka pung shnong. (Markos 4:1; Ioannis 4:5-15) Ngi ruh ngi ïa kren bad ki briew shaphang ka Baibl hangno hangno ruh kat haba lah—ha surok, ha ki ïew, ha ki jaka shongkai pyngngad ne lyngba ka telephone. Ngi sakhi ruh ha ki para marjan, para ba ïatreilang, para klas bad ha ki bahaïing hasem haba ngi ïoh lad. Kine ki jingtrei shitom baroh ki la lah ban pynlong ïa ki phew lak ngut ki briew ha satlak ka pyrthei ban ïohsngew ïa ka khubor “ka jingpynim.”​—Salm 96:2.

Hato phi lah ban pyrkhat badno phi kwah ban ïasam ïa ka khubor babha jong ka Hima U Blei bad kata ka khubor kan mut aïu ïa ka lawei jong ki? Wat ym buh ïa kane ka khubor jong ka jingkyrmen tang ha lade. Ïasam kloi bad ki katba lah!

• Ka “Khubor Babha” aïu kaba ngi dei ban pynbna?

• Kumno ki Nongsakhi U Jehobah ki pyrthuh bud ïa ka rukom ïalap jong u Jisu?