Bun ki briew kim ju leit shuh sha ki jinglehniam namarba kim ïoh jingtngen ne jingïarap bakynja mynsiem. Te, balei phi dei ban wan sha ki jingïalang jong ki Nongsakhi U Jehobah? Phin shem aïu hangta?

Ka jingkmen ban don lang bad ki briew kiba ieid bad kiba phikir. Ha ka spah snem banyngkong, ïa ki Khristan la pyn-ïaid beit-ïaid ryntih ha ki balang, bad ki ju ïalumlang ban mane ïa U Blei, ban pule ïa ki jingthoh bad ban pynshlur iwei ïa iwei. (Hebru 10:24, 25) Ha kum kita ki jingïalang, ki sngew ba ki don hapdeng ki paralok kiba ieid bad kiba shisha; kita ki dei ki para bangeit jong ki. (2 Thessaloni 1:3; 3 Ioannis 14) Ngi bud ïa ki juh ki nuksa bad ngi ïoh ïa ka juh ka jingkmen.

Ka jingmyntoi ban tip kumno ban bud ïa ki jinghikai jong ka Baibl. Kumba long ha ki por mynshuwa, ki khyllung, ki khynnah, ki samla bad ki rangbah ki ïalumlang. Ki nonghikai batbit ki ju pyndonkam ïa ka Baibl ban ïarap ïa ngi ban sngewthuh kumno ban pyndonkam ïa kine ki jinghikai ha ka jingim jong ngi ba man la ka sngi. (Deuteronomi 31:12; Nehemaiah 8:8) Baroh ki lah ban shim bynta ha ki jingrwai bad ki jingïaphylliew jingmut paidbah ban ailad ïa ngi ban pynpaw ïa ka jingkyrmen ba ngi don.​—Hebru 10:23.

Ka jingngeit jong phi ha U Blei kan nang skhem. U apostol Paul u la ong ha kawei na ki balang: “Nga kwah hir hir ban iohi ia phi, . . . ba ha phi yn pyniasngew tngen lem ia nga bad phi, da la ka jingngeit jingngeit . . . ka jong phi ruh bad ka jong nga de.” (Rom 1:11, 12) Ka jingïakynduh tista jong ngi bad la ki para bangeit ha ki jingïalang ka pynskhem ïa ka jingngeit jong ngi bad ïa ka jingraikut jong ngi ban im katkum ki jinghikai jong ka Baibl.

Ngi khot sngewbha ïa phi ban wan sha ka jingïalang jong ngi, phin sa mad hi dalade ïa kine kiei kiei. Ngin kmen shikatdei eh ban pdiang sngewbha ïa phi. Ha baroh ki jingïalang, ym ju lum jingkynshew.

• Ha kano ka rukom la pynshong nongrim ïa ki jingïalang jong ngi?

• Ka jingwan sha ki jingïalang kan ai jingmyntoi aïu ïa ngi?