Lynnong 7
Kaei Ka Hima Jong U Blei?
1. Kaei ka Hima jong U Blei?
Kaei kaba pynlong ïa u Jisu u Syiem uba tbit tam?—MARKOS 1:40-42.
Ka Hima jong U Blei ka dei ka sorkar kaba don ha bneng. Kan sa synshar ha ka jaka jong kiwei pat ki sorkar bad kan sa pynlong ïa ka mon jong U Blei ha bneng bad ha khyndew. Ka khubor jong ka Hima U Blei ka long ka babha. Ka jingkwah jong u briew ka long ban ïoh ïa ka sorkar babha. Ïa kata ka jingkwah jong u yn sa pynhun da ka Hima jong U Blei. Kan sa pynïatylli lang ïa baroh kiba sah ha ka pyrthei.—Pule Daniel 2:44; Mathaios 6:9, 10; 24:14.
Ka hima ka dei ban don u syiem. U Jehobah u la thung ïa u Jisu Khrist, ban long u Syiem jong ka Hima jong U.—Pule Jingpynpaw 11:15.
Peit ïa ka video Kaei Ka Hima Jong U Blei?
2. Kaei kaba pynlong ïa u Jisu u Syiem uba tbit tam?
U Jisu u long u Syiem uba tbit tam namarba u long uba bha bad u ieng skhem ha ka hok. (Mathaios 11:28-30) U don ka bor ban ïarap ïa ki briew namarba u hi un sa synshar ïa ka pyrthei na bneng. Hadien ba u la mihpat, u la kiew sha bneng bad u la shong ha ka kti kamon jong U Jehobah bad ap hangta. (Hebru 10:12, 13) Ha kaba khatduh, U Blei u la ai bor ïa u ban synshar.—Pule Daniel 7:13, 14.
3. Mano ban synshar lang bad u Jisu?
Kawei ka kynhun ba la khot “ki riewkhuid” kan sa synshar lang bad u Jisu ha bneng. (Daniel 7:27) Ki riewkhuid ba la jied nyngkong ki dei ki apostol jong u Jisu. Haduh mynta U Jehobah u dang ïai jied ïa ki briew, kynthei bad shynrang, ban long kum shibynta jong kita ki riewkhuid. Kum u Jisu, ïa ki la pynmihpat da ka met bakynja mynsiem.—Pule Ioannis 14:1-3; 1 Korinth 15:42-44.
Katno ngut ki ban leit sha bneng? U Jisu u la khot ïa ki, ka ‘kynhun ba rit.’ (Loukas 12:32) Ha kaba kut kin don 1,44,000 ngut. Kin sa synshar ïa ka pyrthei lem bad u Jisu.—Pule Jingpynpaw 14:1.
4. Ka la jia aïu haba u Jisu u la sdang ban synshar?
Ka Hima jong U Blei ka la sdang ban synshar naduh u snem 1914. * Ka kam kaba nyngkong eh kaba u Jisu u la leh ka long ban shop ïa u Soitan bad ïa ki ksuid jong u sha ka pyrthei. U Soitan u la bitar lep bad u la sdang ban pynjynjar ïa ka pyrthei baroh kawei. (Jingpynpaw 12:7-10, 12) Naduh kata ka por ki jingjynjar jong u briew ki la kham jur. Ki thma, ki jingkyrduh bam, ki khlam bad ki jingkhynñiuh jumai ki dei shibynta na kata ka “dak” ba shen ka Hima jong U Blei kan sa shimti pura ïa ka pyrthei.—Pule Loukas 21:7, 10, 11, 31.
5. Ka Hima U Blei ka leh aïu?
Lyngba ka jingïalap ha ka pyrthei, ka Hima U Blei ka la pynïatylli ïa u paid byllien na ki jaitbynriew baroh. Man la ka sngi da ki spah ngut ki briew basngewrit ki kylla long ki nongshong shnong ha ka Hima U Blei. Ynda poi ka por ban pynjot ïa kiei kiei kiba sniew jong ka pyrthei, ka Hima U Blei kan sa ïada ïa kine ki briew. Te baroh kiba kwah ban ïoh jingmyntoi na ka Hima U Blei ki dei ban pyrshang ban long kiba kohnguh bad pyndem ha u Jisu.—Pule Jingpynpaw 7:9, 14, 16, 17.
Hapoh ka jingsynshar ba 1,000 snem, ka Hima U Blei kan pyndep ïa ka jingthmu banyngkong jong U Blei na ka bynta u bynriew. Ka pyrthei baroh kawei kan kylla long ka paradais. Ha kaba kut, u Jisu un sa aiti ïa ka Hima sha u Kpa. (1 Korinth 15:24-26) Hato phi kwah mo ban ïathuh lem ha kiwei shaphang ka Hima U Blei?—Pule Salm 37:10, 11, 29.
^ par. 6 Ban tip kham bniah ba kumno ka jingïathuhlypa jong ka Baibl shaphang u snem 1914 peit sla 215-218 jong ka kot Kiei ki Jinghikai Bashisha Jong ka Baibl? (ha ka phareng)
