Lynnong 5
Kaei ka Jingthmu jong U Blei ïa ka Pyrthei?
1. Balei U Blei u la thaw ïa ka pyrthei?
U Jehobah u la ai ïa ka pyrthei ha u bynriew. Ka dei ka jaka sah jong ngi. Na kata daw, la thaw ïa ki kurim banyngkong, u Adam bad ka Im, ym ban pyndap ïa ka bneng—U Blei u la thaw lypa ïa ki angel ban im ha bneng. (Job 38:4, 7) Hynrei, U Blei u la buh ïa ki briew ha ka paradais ba itynnat kaba la khot ka kper Eden. (Jenesis 2:15-17) U Jehobah u la ai ha u bad ha ki khun ki kti jong u ïa ka jingkyrmen ban im junom ha pyrthei.—Pule Salm 37:29; 115:16.
Ha ka banyngkong, dei tang ka kper Eden kaba long ka paradais. Ki kurim banyngkong ki dei ban pyndap ïa ka pyrthei da la ki khun ki kti. Suki suki, ki dei ban pyndap ïa ka pyrthei baroh kawei bad ban pynlong ïa ka ka paradais. (Jenesis 1:28) Ïa ka pyrthei yn ym pynduh lano lano ruh. Kan ïai long ka jaka sah jong u briew.—Pule Salm 104:5.
Peit ïa ka video Balei U Blei U La Thaw Ïa Ka Pyrthei?
2. Balei ka pyrthei kam long shuh kum ka paradais?
U Adam bad ka Im ki la saitlah ïa U Blei, te U Jehobah u la beh noh ïa ki na kata ka kper. Ka paradais ka la duh noh, bad ym don shuh mano mano ruh ba lah ban wallam biang ïa ka. Ka Baibl ka ong: “Ia ka khyndew la ai ha ka kti jong u bymman.”—Job 9:24.—Pule Jenesis 3:23, 24.
Hato U Jehobah un iehnoh ïa la ka jingthmu banyngkong na ka bynta u bynriew? Em! U long u badonbor tam. Un pynurlong ïa la ka jingthmu. (Isaiah 45:18) Kumba u la thmu un sa pynlong biang ïa kane ka pyrthei sha ka paradais.—Pule Salm 37:11, 34.
3. Kumno yn wallam biang ïa ka paradais?
Ïa ka pyrthei yn sa pynkylla biang sha ka paradais hapoh ka jingsynshar jong u Jisu. Ha ka thma ba la khot ka Armagedon, u Jisu un sa ïalam ïa ki angel U Blei ban pynjot ïa baroh kiba ïalehpyrshah ïa U Blei. Nangta, u Jisu un sa set byndi ïa u Soitan haduh 1,000 snem. Ki briew jong U Blei kin lait im na ka jingshah pynjot namarba u Jisu un ïalam bad ïada ïa ki. Kin sa ïoh ban im junom ha paradais.—Pule Jingpynpaw 20:1-3; 21:3, 4.
4. Lano ki jingjynjar kin kut?
Lano U Blei un pynkut ïa ki jingsniew ha pyrthei? U Jisu u la ai ki “dak” ki ban pyni lano ka jingkut kan wan. Ka jinglong kaba mynta ka pyni ba ka la jan “wai noh kane ka pyrthei [“kine kiei kiei jong ka pyrthei,” NW].”—Pule Mathaios 24:3, 7-14, 21, 22.
Ha ka por ba u Jisu un synshar 1,000 snem na bneng halor ka khyndew, un sa pynkut ïa ki jingjynjar baroh. (Isaiah 9:6, 7; 11:9) U Jisu un long u Syiem bad u Rangbah Lyngdoh u ban weng noh ïa ki pop jong kito kiba ieit ïa U Blei. Ha kane ka rukom, lyngba u Jisu, U Blei un sa pynduh noh ïa ki jingpang, jingtymmen bad jingïap.—Pule Isaiah 25:8; 33:24.
5. Mano ban ïoh shong ha ka paradais?
Ha ka Kingdom Hall, phin ïa kynduh ïa ki briew kiba ieit ïa U Blei bad kiba kwah ban tip kumno ban pynsngewbha ïa u
Ki briew kiba kohnguh ïa U Blei kin ïoh ban sah ha paradais. (1 Ioannis 2:17) U Jisu u la phah ïa la ki synran ban wad ïa ki briew kiba sngewrit bad ban hikai ïa ki kumno ban long ki paralok jong U Blei. Mynta ruh U Jehobah u dang ïai pynkhreh da ki phew lak ngut ki briew ban ïoh im ha paradais. (Sephanaiah 2:3) Ha ka Kingdom Hall jong Ki Nongsakhi U Jehobah, ki briew ki ïoh jinghikai kumno ban long u lok bad u kpa ba kham bha bad ka lok bad ka kmie ba kham bha. Ki khun bad ki kmie ki kpa ki ïa mane lang bad ki ïoh jinghikai kumno ban myntoi na ka khubor babha.—Pule Mikah 4:1-4.
