NTENDULA YA BAVERSE YA BIBLIA
Nkunga 37:4—“Mona Kiese na MFUMU NZAMBI”
“Wa kiese mingi kibeni na Yehowa, ebuna yandi ta pesa nge banzala ya ntima na nge.”—Nkunga 37:4, Mbalula ya Nsi-Ntoto ya Mpa.
“Mona kiese na MFUMU NZAMBI, yandi ta pesa nge kima ya nge zola.”—Nkunga 37:4, Bible en Kituba.
Ntendula ya Nkunga 37:4
Muyimbi-bankunga siamisaka bantu ya ke sambilaka Nzambi na kuvanda na kiese sambu bo kele ti kinduku ya ngolo ti yandi. Bantu yonso ya kele ti kinduku yai lenda tula ntima nde Yehowa a Nzambi ta lungisa bampusa na bo ya mbote.
“Wa kiese mingi kibeni na Yehowa.” Bo lenda balula mpi bangogo yai nde “wa kiese na kusadila MFUMU,” to “wa kiese na mambu yina MFUMU me sila nge.” Na kutuba ya pete, beto fwete “wa kiese ya kuluta mingi” na kusambila Nzambi ya kieleka. (Nkunga 37:4, noti na nsi ya lutiti) Sambu na nki beto lenda tuba mutindu yina?
Bantu yina ke sambilaka Yehowa ke tadilaka mambu bonso yandi, mutindu bo me sonikaka yo na Biblia. Bo ke sukaka ve kaka na kuzaba Nzambi kansi bo ke zabaka mpi nde yo kele mbote na kulemfukila yandi. Yo yina, bo ke vandaka ti kansansa ya mbote mpi ke tinaka bifu mpi balukanu mingi ya mbi na luzingu. (Bingana 3:5, 6) Mu mbandu, kana yo ke monana nde bantu ya lukasi to ya ke vandaka ve masonga ke nunga, bo ke bikaka ve nde makasi to kulula kubebisa ngemba na bo ya mabanza. (Nkunga 37:1, 7-9) Bansadi ya Nzambi ke vandaka na kiese ya kuzaba nde ntama mingi ve yandi ta sukisa mambu yonso ya mbi mpe yandi ta futa bantu ya mbote sambu na bikalulu na bo ya mbote. (Nkunga 37:34) Bo ke waka mpi kiese mingi na kuzaba nde Tata na bo ya zulu ke ndimaka bo.—Nkunga 5:12; Bingana 27:11.
“Yandi ta pesa nge banzala ya ntima na nge.” Bo lenda balula mpi bangogo yai nde “yandi ta pesa mvutu na bisambu na nge” to “yandi ta pesa nge mambu yina nge ke zola mingi.” Ya kieleka, Yehowa ta pesa beto ve konso kima yina beto ke lomba yandi. Bonso kibuti ya mbote, Yehowa me zaba mambu yina kele mbote mingi sambu na bana na yandi. Diaka, mambu ya beto ke lombaka mpi mutindu beto ke zingaka fwete wakana ti bansiku mpi luzolo na yandi. (Bingana 28:9; Yakobo 4:3; 1 Yoane 5:14) Kana yo kele mutindu yina, beto lenda samba “Muntu ya ke waka kisambu” mpi kutula ntima nde yandi ta wa beto.—Nkunga 65:2; Matayo 21:22.
Mambu ya Bo Ke Tubila na Baverse ya Kele na Ntwala mpi na Nima ya Nkunga 37:4
Ntotila Davidi ya Izraele ya ntama muntu sonikaka Nkunga 37. Yandi sonikaka Nkunga yai na kulanda alfabe, to style ya bo ke bingaka acrostiche. b
Mbala mingi bo sadilaka Davidi mambu na mutindu ya mbi. Ntotila Saule mpi bantu ya nkaka yina vandaka kuzola kufwa yandi vandaka kuzomba yandi. (2 Samuele 22:1) Ata mpidina, Davidi vandaka ntangu yonso kutula ntima ya mvimba na Nzambi na yandi. Davidi zabaka nde nsuka-nsuka Yehowa ta pesa bantu ya mbi ndola. (Nkunga 37:10, 11) Ata yo vandaka kumonana nde bo ke nunga, bonso “matiti ya mpa ya mubisu,” nsuka-nsuka bo ta vila.—Nkunga 37:2, 20, 35, 36.
Nkunga 37 ke swaswanisa avenire ya bantu yina ke zitisaka bansiku ya Nzambi ti mambu yina ta kumina bantu yina ke zitisaka ve Nzambi. (Nkunga 37:16, 17, 21, 22, 27, 28) Yo yina, Nkunga yai ke sadisa beto na kubaka mayele mpi na kuvanda bantu yina Nzambi ke ndimaka.
Tala video yai ya nkufi sambu na kumona na bunkufi mambu yina kele na mukanda ya Bankunga.
a Yehowa kele mutindu bo ke sonikaka mbala mingi zina ya Nzambi na ndinga ya Kiebreo. Sambu na kuzaba sambu na nki bambalula mingi ya Biblia ke sadilaka titre MFUMU to MFUMU NZAMBI, tala disolo “Yehowa Kele Nani?”
b Na style to modele yai ya kusonika, verse ya ntete to kimvuka ya ntete ya baverse ke yantika ti kisono ya ntete ya alfabe ya Kiebreo, kimvuka ya ke landa ke yantika na kisono ya zole, mpi buna na buna. Mbala ya nkaka mutindu yai ya kusonika vandaka kusadisa bantu na kukanga yo na ntu.
Nge Lenda Sepela Mpi Ti
NZOZULU YA NKENGI
Keti Nzambi Ke Waka Bisambu na Beto?
Biblia ke ndimisa beto nde Nzambi ke waka bisambu na beto kana beto ke samba yandi na mutindu ya mbote.
MASOLO MPI BAVIDEO
Kivuvu ya Kieleka Sambu na Bilumbu ya Ke Kwisa
Inki mambu ya Biblia me tubaka nde yo ta salama ya kele ve bonso yina bantu me tubaka nde yo ta salama mpi yina bo me tubaka nde bo ta sala?
NTENDULA YA BAVERSE YA BIBLIA
Ntendula ya Matayo 11:28-30—“Beno Kwisa na Mono, . . . Ebuna Mono Ta Pesa Beno Ntangu ya Kupema”
Keti Yezu tubaka nde bampasi yonso mpi mambu yonso ya nku ta mana kaka na ntangu yina?
MALONGI YA BIBLIA
Bisadilu ya Kulonguka Biblia
Pona bisadilu yina ta sadisa nge na kulonguka Biblia mbote mpi na mutindu ya me fwana.
MALONGI YA BIBLIA
Meka Kulonguka Biblia ti Beto
Longuka Biblia ti Mbangi Mosi ya Yehowa kukonda kufuta mbongo.
