“O nge Muntu ya ke waka kisambu, bantu ya mitindu yonso ta kwisa na nge.”—Nkunga 65:2.

Bantu ya nkaka ke tubaka nde bo ke sambaka sambu kisambu ke salaka nde bo kudiwa mbote ata bo ke zabaka nde ata muntu mosi ve ke waka mpenza bisambu na bo. Kansi kisambu kele ve kima mosi yina beto ke salaka kaka na kudiwa mbote sambu na kununga bampasi. Biblia ke ndimisa beto nde “Yehowa * kele pene-pene ya bantu yonso yina ke bingaka yandi, ya bantu yonso yina ke bingaka yandi na kieleka. . . . Yandi ke waka kudila na bo sambu na kulomba lusadisu.”—Nkunga 145:18, 19.

Beto lenda ndima nde Yehowa Nzambi ke waka bisambu ya bansadi na yandi. Na zola yonso yandi ke tuba nde: “Beno ta binga mono, beno ta kwisa, mpi beno ta samba mono, ebuna mono ta wa beno.”—Yeremia 29:12.

“Kwamina na kisambu.”—Baroma 12:12.

Biblia ke siamisa beto na ‘kusamba ntangu yonso’ mpi na “konso dibaku ti mitindu yonso ya bisambu.” Ya kieleka, Yehowa Nzambi ke zola nde beto samba yandi.—Matayo 26:41; Baefezo 6:18.

Sambu na nki Nzambi ke zola nde beto samba yandi? Beto baka mbandu: Tata ke vandaka na kiese “kana mwana na yandi me lomba yandi lusadisu.” Ya kieleka, tata lenda zaba na ntwala mambu yina mwana na yandi kele na yo mfunu to mutindu yandi ke kudiwa. Kansi ntangu yandi ke wa mwana na yandi ke lomba yandi lusadisu, tata ke monaka nde mwana na yandi ke tudilaka yandi ntima mpi kele pene-pene na yandi. Mutindu mosi mpi, ntangu beto ke sambaka Yehowa Nzambi, yandi ke monaka nde beto ke tudilaka yandi ntima mpi beto ke zolaka kuvanda pene-pene na yandi.—Bingana 15:8; Yakobo 4:8.

‘Losa basusi na nge yonso na yandi sambu yandi ke kudibanzaka sambu na nge.’—1 Piere 5:7.

Nzambi ke zolaka nde beto samba yandi sambu yandi ke zolaka beto mpi ke kudiyangisaka sambu na beto. Yandi me zaba mambu yonso yina ke pesaka beto mpasi mpi ke yangisaka beto mpi yandi ke zola kusadisa beto.

Ntotila Davidi vandaka kulomba lusadisu ya Yehowa Nzambi luzingu na yandi ya mvimba mpi yandi vandaka kusonga Yehowa bangindu na yandi mpi mutindu yandi vandaka kudiwa. (Nkunga 23:1-6) Inki mutindu Nzambi vandaka kutadila Davidi? Nzambi vandaka kuzola yandi mpi vandaka kuwa bisambu na yandi. (Bisalu 13:22) Mutindu mosi mpi, Nzambi ke waka bisambu na beto sambu yandi ke kudiyangisaka sambu na beto.

Yai kele mambu yina nsoniki mosi ya mukanda ya bankunga tubaka. Yandi ndimaka nde Nzambi vandaka kuwa bisambu na yandi. Kuzaba diambu yina sadisaka yandi mingi. Yandi kudiwaka pene-pene ya Nzambi mpi yandi zwaka ngolo ya kunwana ti bampasi ya luzingu mpi mawa.—Nkunga 116:1-9.

Kana beto ke ndima nde Nzambi ke wa bisambu na beto, beto ta landa kusamba yandi. Beto tadila mbandu ya Pedro. Yandi ke zingaka na nordi ya Espagne. Mwana na yandi ya bakala yina vandaka ti bamvula 19 fwaka na aksida. Pedro waka mawa mingi mpi yandi songaka Nzambi mutindu yandi vandaka kudiwa. Yandi vandaka kusamba mbala na mbala sambu Nzambi kupesa yandi kikesa mpi lusadisu. Inki salamaka na nima? Yandi ke tuba nde: “Yehowa pesaka mvutu na bisambu na mono na nzila ya kikesa mpi ya lusadisu yina bampangi Bakristu pesaka mono ti nkento na mono.”

Ata mwana ya Pedro vutukaka ve na luzingu, kisambu sadisaka yandi mpi dibuta na yandi mingi kibeni. Nkento na yandi María Carmen ke tuba nde: “Kisambu sadisaka mono na kukanga ntima na mpasi na mono. Mono zabaka nde Yehowa Nzambi bakisaka mono sambu ntangu mono vandaka kusamba, mono vandaka kudiwa na ngemba mpi pima na kati na mono.”

Biblia mpi mambu yina bantu mingi me kutanaka ti yo na luzingu ke monisa pwelele nde Nzambi ke waka bisambu. Kansi yo kele mpi pwelele nde yandi ke pesaka ve mvutu na bisambu yonso. Sambu na nki Nzambi ke pesaka mvutu na bisambu ya nkaka kansi na bisambu yonso ve?