Ntangu nge ke waka bantu ke tuba nde “Nsuka me kuma pene-pene!” nki ke kwisilaka nge na mabanza? Keti nge ke monaka pastere mosi me telama na estrade, ke longa na ndinga ya ngolo mpi ke sala bidimbu ti Biblia na maboko? To keti nge ke yindulaka mbuta-muntu mosi ya kele ti mandefu me telama na bala-bala, me lwata mvwela, me kanga singa na luketu mpi me simba kima mosi ya bo me sonika kilumbu ya nsuka? Kuyindula mambu ya mutindu yai lenda yangisa bantu ya nkaka. Kansi, bankaka lenda tula ntembe to lenda mona mambu yango nsaka.

Biblia ke tuba nde: “Nsuka ta kwisa.” (Matayo 24:14) Yo ke bingaka mpi kilumbu yai nde “kilumbu ya nene ya Nzambi” to “Armagedoni.” (Kusonga 16:14, 16) Mabundu mingi ke longaka mambu ya kuswaswana sambu na kilumbu ya nsuka. Kansi, Biblia ke tuba mambu pwelele sambu na kilumbu yai. Yo ke monisa mambu yina nsuka ke tendula mpi mambu yina nsuka ke tendula ve. Ndinga ya Nzambi ke sadisa beto na kubakisa mbote-mbote kana nsuka me finama to ve. Nkutu, yo ke monisa beto mambu yina beto lenda sala sambu na kuguluka! Bika beto sungika bangindu ya mbi yina bantu ya nkaka ke vandaka na yo sambu na nsuka mpi beto monisa mambu yina nsuka ke tendula. Inki mutindu Biblia ke tendula ngogo “nsuka”?

1. NSUKA KE TENDULA VE NDE NTOTO TA FWA NA TIYA.

   Biblia ke tuba nde: “[Nzambi] tulaka ntoto na zulu ya bafondasio na yo na mpila nde yo nikana ve ata fioti.” (Nkunga 104:5) Verse yai mpi baverse ya nkaka ke ndimisa beto nde Nzambi ta fwa ve ntoto mpi yandi ta pesa ve bantu nzila ya kufwa yo ata fioti!—Longi 1:4; Yezaya 45:18.

2. NSUKA TA KWISA VE NA KINTULUMUKINA.

   Biblia ke monisa nde nsuka ta kwisa ve na kintulumukina. Nzambi me yidikaka ntangu yina nsuka ta kwisa. Biblia ke tuba nde: “Sambu na kilumbu to ngunga yina, ata muntu mosi ve me zaba yo, yo vanda bawanzio na zulu to Mwana kansi kaka Tata. Beno keba, beno bikala ya kusikama, sambu beno me zaba ve ntangu yina ntangu ya bo me tulaka ta bwa.” (Marko 13:32, 33) Baverse yai ke monisa pwelele nde Nzambi (“Tata”) me tulaka “ntangu ya siki-siki” yina nsuka ta kwisa.

3. BANTU VE, KIMA MOSI MPI VE TA BWA NA NTOTO SAMBU YO NATA NSUKA.

   Nsuka ta kwisa nki mutindu? Kusonga 19:11 ke tuba nde: “Mono monaka zulu me kanguka, mpi, tala! mpunda mosi ya mpembe. Mpi muntu yina me fonga na zulu na yo, zina na yandi Kwikama mpi Kieleka.” Verse 19 ke yika nde: “Mpi mono monaka mbisi ya mfinda, bantotila ya ntoto, mpi bimvuka na bo ya basoda, bo me vukana sambu na kunwana bitumba ti muntu yina me fonga na mpunda mpi basoda na yandi.” (Kusonga 19:11-21) Ata baverse yai ke tuba mambu na mutindu ya kifwani, beto ke bakisa nde Nzambi ta tinda makesa ya bawanzio sambu na kufwa bambeni na yandi.

1. NSUKA YA BALUYALU YA BANTU.

   Biblia ke tuba nde: “Nzambi ya zulu ta tula ntotila mosi yina ta yalaka tii kuna; ntotila yina bantotila ya nkaka ta bedisaka yandi ve, kansi yandi ta fwa bantotila yonso ebuna yandi ta yalaka tii  kuna.” (Daniele 2:44) Mutindu beto me tubila yo na kitini ya 3, Nzambi ta fwa “bantotila ya ntoto, mpi bimvuka na bo ya basoda” yina ta “vukana sambu na kunwana bitumba ti muntu yina me fonga na mpunda mpi basoda na yandi.”—Kusonga 19:19.

2. NSUKA YA BITUMBA, MUBULU MPI MAMBU YA KUKONDA LUNUNGU.

   Biblia ke tuba nde: ‘[Nzambi] ke sukisa bitumba na nsi-ntoto yonso.’ (Nkunga 46:10) Yo ke yika nde: “Bantu ya mbote ti ya kieleka ta zinga na ntoto na beto yai; kansi bantu yonso ya mbi, Nzambi ta katula bo na ntoto; yandi ta tumuna bo mutindu bo ke tumunaka matiti na ntoto.” (Bingana 2:21, 22) Biblia ke tuba diaka nde: “Tala! Mono ke sala bima yonso ya mpa.”—Kusonga 21:4, 5.

3. NSUKA YA MABUNDU YA KE KUSAKA BANTU MPI YA KE LONGAKA MAMBU YA LUVUNU SAMBU NA NZAMBI.

   Biblia ke tuba nde: “Baprofete ke ta masonga ve, banganga-nzambi ke yindula kaka kiese na bo mosi. . . . Kansi nki bo ta sala na nima [ntangu nsuka ta kwisa]?” (Yeremia 5:31) Yo ke yika nde: “Bantu mingi ta songa mono na kilumbu yina nde: ‘Mfumu, Mfumu, keti beto bikulaka ve na zina na nge mpi basisaka ve bademo na zina na nge mpi salaka ve bidimbu mingi ya nkumbwa na zina na nge?’ Kansi mono ta songa bo nde: ‘Mono me zaba beno ve ata fioti! Beno katuka na meso na mono, beno bantu ya ke fwaka bansiku!’”—Matayo 7:21-23.

4. NSUKA YA BANTU YINA KE PESAKA MABOKO NA MAMBU YA NSI-NTOTO YAI.

   Yezu Kristu tubaka nde: “Kikuma yina bo ke sambisa bantu yo yai: Nsemo kwisaka na nsi-ntoto; kansi bantu zolaka mudidi kuluta nsemo, sambu bisalu na bo vandaka ya mbi.” (Yoane 3:19) Na ntangu ya Noa, muntu ya kwikama, Biblia ke tubila mutindu Nzambi fwaka ntete bantu na ntoto ya mvimba. Yo ke tuba nde: “Nsi-ntoto ya ntangu yina fwaka ntangu yo fulukaka na masa. Kansi, na nzila ya ndinga yina mosi, zulu mpi ntoto ya ntangu yai, bo me bumba yo sambu na kufwa yo na tiya mpi bo ke tanina yo tii na kilumbu ya kusambisa mpi ya lufwa ya bantu yina ke vwezaka Nzambi.”—2 Piere 3:5-7.

Simba nde Biblia ke fwanisa “kilumbu ya kusambisa mpi ya lufwa” yina ke kwisa ti mutindu Nzambi fwaka “nsi-ntoto” na ntangu ya Noa. Nsi-ntoto yina Nzambi fwaka vandaka nki? Ntoto bikalaka mutindu mosi, kansi Nzambi ‘fwaka bantu yina ke vwezaka yandi,’ disongidila bambeni na yandi. Mutindu mosi, Nzambi ta fwa mpi bambeni na yandi na “kilumbu ya kusambisa” yina ke kwisa. Kansi, banduku ya Nzambi ta guluka mutindu Noa mpi dibuta na yandi gulukaka.—Matayo 24:37-42.

Yindula mutindu ntoto ta vanda ntangu Nzambi ta katula bantu yonso ya mbi! Yo ke pwelele nde mambu yina Biblia ke tuba sambu na nsuka kele nsangu ya mbote, kansi ve nsangu ya mpasi. Nge lenda kudiyula nde: ‘Keti Biblia ke zabisa beto ntangu yina nsuka ta kwisa? Keti nsuka yango me kuma pene-pene? Inki mutindu mono lenda guluka?’