Mvutu ya ngiufula yai ta sadisa beto na kusoba mutindu beto ke tadilaka luzingu.

Keti yo me fwana na kuyindula nde Nzambi yina salaka bima ya kitoko na ntoto zolaka nde bantu kumona mpasi?

Bantu yina ke sambilaka ve ke tubaka nde Nzambi ke zolaka nde bantu kuzinga na mpasi to nde Nzambi kele ve. Bo ke tubaka beto ke monaka mpasi sambu (1) Nzambi kele ve ti ngolo ya kumanisa bampasi, (2) Nzambi ke zolaka ve kumanisa bampasi, (3) to nde Nzambi kele ve.

Keti bikuma yai mpamba me fwana na kutendula sambu na nki bantu ke monaka mpasi?

Nzambi gangaka beto ve sambu beto mona mpasi.

Yandi ke zolaka nde beto vanda na kiese.

“Kima ya kuluta mbote sambu na bo kele ve, katula kaka kuwa kiese mpi kusala mambu ya mbote na luzingu na bo, mpi nde konso muntu fwete dia, kunwa, mpi kuwa kiese sambu na kisalu na yandi yonso ya ngolo. Yo kele dikabu ya Nzambi.”—LONGI 3:12, 13.

Nzambi gangaka bantu zole ya ntete sambu bo zinga na kiese.

Yandi gangaka bo ve sambu bo mpi bana na bo kuzinga na mpasi.

“Nzambi sakumunaka bo, mpi yandi tubilaka bo nde: ‘Beno buta mingi mpi beno kuma mingi, beno fulusa ntoto.’”—KUYANTIKA 1:28.

Bibuti na beto ya ntete buyaka lutwadisu ya Nzambi.

Yo yina, bo mpi bana yina bo butaka kumaka kumona mpasi.

“Yo yina, mutindu disumu kotaka na nsi-ntoto na nzila ya muntu mosi mpi lufwa na nzila ya disumu, mutindu mosi mpi lufwa me mwanganaka na bantu yonso sambu bo yonso salaka disumu.”—BAROMA 5:12. *

Nzambi gangaka ve bantu ti makuki ya kuditwadisa bo mosi.

Mutindu Nzambi gangaka beto ve sambu na kuzinga na nsi ya masa, yandi gangaka beto mpi ve sambu beto twadisa beto mosi luzingu na beto.

“Muntu yina ke tambula kele ve ti kiyeka ya kutwadisa kitambi na yandi mosi.”—YEREMIA 10:23.

Nzambi ke zolaka ve nde beto mona mpasi.

Yandi ke zolaka nde beto kuditanina, disongidila beto sala ve mambu yina lenda natila beto bampasi.

“Kana nge tula dikebi na bansiku na mono! Ebuna ngemba na nge ta kuma bonso nzadi.”—YEZAYA 48:18.