Yai kele mambu ya Kimvuka mosi ya bantu ya ke salaka bansosa tubaka sambu na mambu ya me tala bansungi ya ke soba. Kana nge ke ndimaka nde Nzambi kele mpi nde yandi ke tudilaka beto dikebi, mambu ya bantu yai me tuba ta sadisa nge na kuyibuka nde Nzambi salaka ntoto na beto ti makuki ya kudikumisa bunkete.

Kansi, mutindu bantu me bebisa ntoto mingi kibeni ke sala nde, ntoto yo mosi kukuka diaka ve kudikumisa bunkete. Sambu na nki beto lenda tula ntima nde Nzambi ta sala kima mosi sambu na ntoto?

Baverse ya kele na lupangu ta ndimisa nge nde ntoto mpi bima ya ke zingaka na zulu na yo ta fwa ve.

• Nzambi muntu salaka ntoto na beto. “Na luyantiku Nzambi gangaka zulu ti ntoto.”​—Kuyantika 1:1

• Ntoto na beto kele ya Nzambi. “Ntoto mpi bima yonso yina kele na kati na yo kele ya Yehowa a.”​—Nkunga 24:1

• Nzambi salaka ntoto sambu yo fwa ve. “Yandi me tedimisaka ntoto na bafondasio na yo; yo ta katuka ve na kisika na yo mvula na mvula.”​—Nkunga 104:5

• Nzambi ke sila nde bigangwa yonso ta zinga mbote na zulu ya ntoto mvula na mvula. “Nzambi ya kieleka,Muntu yina yidikaka ntoto, . . . gangaka yo ve kaka sambu na mpamba, kansi [yandi] salaka yo sambu bantu kuzinga.”​—Yezaya 45:18

• Nzambi ke sila nde bantu ta zinga mvula na mvula na zulu ya ntoto. “Bantu ya lunungu ta baka ntoto, mpi bo ta zinga kimakulu na zulu na yo.”​—Nkunga 37:29

Nzambi salaka ntoto sambu bantu kuzinga na zulu na yo kukonda kubebisa yo. Biblia me tubaka nde, Nzambi me tulaka ntangu yina yandi ta katula mambu yonso ya mbi yina ke bebisaka ntoto.​—Kusonga 11:18

Biblia ke silaka nde nsuka-nsuka Nzambi ta kumisa ntoto na beto paladisu ya kitoko mpi yandi ta kangula diboko na yandi mpi ta “lungisa nzala ya konso kima ya kele na luzingu.”​—Nkunga 145:16