Kusonga 11:1-19
11 Ebuna yandi pesaka mono lukengi mosi ya kele bonso nti,*+ mpi yandi tubaka nde: “Telama mpi tesa kisika ya santu ya tempelo ya Nzambi, mesa-kimenga, mpi bantu yina ke samba muna.
2 Kansi kibansala yina kele na nganda ya kisika ya santu ya tempelo, bikisa yo mpi kutesa yo ve, sambu bo me pesaka yo na makanda, mpi bo ta niata mbanza ya santu+ na makulu bangonda 42.+
3 Mono ta sala nde bambangi na mono zole kubikula bilumbu 1 260, bo me lwata basaki.”
4 Bo kele banti zole ya baolive+ mpi bima zole ya kutudila minda+ mpi bo me telama na ntwala ya Mfumu ya ntoto.+
5 Kana muntu ke zola kusala bo mbi, tiya ke basika na minoko na bo mpi ke fwa bambeni na bo. Kana muntu ke zola kusala bo mbi, bo fwete fwa yandi mutindu yina.
6 Bo kele ti kiyeka ya kukanga zulu+ sambu mvula kunoka ve+ na bilumbu yina bo ke bikula, mpi bo kele ti kiyeka ya kukitula masa menga+ mpi ya kusala nde bampasi ya mitindu yonso kubwa na ntoto konso ntangu ya bo me zola.
7 Ntangu bo ta manisa kuta kimbangi na bo, mbisi ya mfinda yina ke tombuka katuka na dibulu ya nda ta nwanisa bo, ta nunga bo mpi ta fwa bo.+
8 Mpi bamvumbi na bo ta vanda na bala-bala ya nene ya mbanza ya nene yina bo ke binga na mutindu ya kifwani Sodome mpi Ezipte, kisika bo fwaka mpi Mfumu na bo na zulu ya nti.
9 Bantu, mabuta, bandinga, mpi makanda ta tala bamvumbi na bo bilumbu tatu na ndambu,+ mpi bo ta pesa ve nzila nde bo zika bamvumbi na bo.
10 Bantu yina ke zingaka na ntoto ke mona kiese sambu na bo mpi ke yangalala, mpi bo ta pesana makabu, sambu bambikudi yai zole monisaka bantu yina ke zingaka na ntoto mpasi.
11 Na nima ya bilumbu yina tatu ti ndambu, mpeve ya luzingu yina katukaka na Nzambi kotaka na kati na bo,+ ebuna bo telamaka, mpi boma mingi simbaka bantu yina monaka bo.
12 Mpi bo waka ndinga mosi ya ngolo ke katuka na zulu mpi ke tubila bo nde: “Beno tombuka awa.” Ebuna bo tombukaka na zulu na dituti, mpi bambeni na bo monaka bo.*
13 Na ngunga yina, ntoto nikanaka ngolo, mpi ndambu mosi na kati ya bandambu kumi ya mbanza bwaka; mpi kunikana yina ya ntoto fwaka bantu 7 000, ebuna bantu yina bikalaka waka boma mpi bo pesaka Nzambi ya zulu nkembo.
14 Mawa ya zole+ me luta. Tala! Mawa ya tatu ke kwisa nswalu.
15 Wanzio ya nsambwadi bulaka mpungi.+ Ebuna bandinga ya ngolo wakanaka na zulu, yo ke tuba nde: “Kimfumu ya nsi-ntoto me kuma Kimfumu ya Mfumu na beto+ mpi ya Kristu na yandi,+ mpi yandi ta yala bonso ntotila mvula na mvula.”+
16 Mpi bankuluntu 24+ yina vandaka na bakiti na bo ya kimfumu na ntwala ya Nzambi bwaka baluse na ntoto, ebuna bo sambilaka Nzambi
17 nde: “Beto ke pesa nge matondo, Yehowa* Nzambi, Nkwa-Ngolo Yonso, muntu yina kele+ mpi yina vandaka, sambu nge me baka ngolo na nge ya nene mpi nge me yantika kuyala bonso ntotila.+
18 Kansi makanda waka makasi, mpi makasi na nge kwisaka, ebuna ntangu ya bo me tulaka kwisaka sambu na kusambisa bafwa, mpi kufuta+ bampika na nge bambikudi,+ ti basantu mpi bantu yina ke waka zina na nge boma, bantu ya kukonda mfunu ti bantu ya mfunu, mpi kubebisa bantu yina ke bebisaka ntoto.”*+
19 Ebuna kisika ya santu ya tempelo ya Nzambi yina kele na zulu kangukaka, mpi sanduku ya kuwakana na yandi monanaka na kisika ya santu ya tempelo na yandi.+ Mpi nsemo ya nzasi monanaka, bandinga mpi makelele ya banzasi wakanaka, ntoto nikanaka, mpi mvula ya matadi nokaka.
Banoti na nsi ya lutiti
^ To “nti ya kutesila.”
^ To “vandaka kutala.”
^ Tala Bangindu ya Ngika A5.
^ To “kufwa bantu yina ke fwaka ntoto.”
