Alguns algen ta leba txeu ténpu pa prende ku ses éru. Ami éra si tanbê. N nase i N kria na Barselona, ki é sugundu sidadi más grandi di Spanha. Nha família ta moraba na un lugar ki txoma Somorrostro ki tinha un bon párti di kes bera-mar di sidadi. Somorrostro éra konxedu pa krimi i pa kunpra i bende dróga.

 Nha pai ku nha mai tinha 9 fidju. Ami éra kel más grandi. Nos éra txeu póbri, pur isu nha pai manda-m trabadja na un klubi di ténis. N tinha 10 anu i N ta trabadjaba 10 óra pur dia. Nton, N fika sen bai skóla sima txeu minís di nha idadi. Kantu ki N tinha 14 anu, N kumesa ta trabadja na un lugar ki ta fazeda kuzas ku féru.

 Na anu di 1975, es txoma-m pa trópa, ki éra obrigatóriu na Spanha. N kria fazeba algun kuza novu na nha vida, pur isu N oferese pa N faze párti di Lijion Spanhol di Stranjeru na Melila, ki ta fikaba na un tiritóriu di Spanha, na nórti di Áfrika. Na kel ténpu la, N fika konpletamenti nvolvidu na mundu suju di dróga i bebida alkólika.

 Kantu ki N sai di kel Lijion, N volta pa Barselona i N kria un grupu violéntu. Nu ta furtaba kalker kuza ki nu atxaba. Dipôs nu ta bendeba kes kuza, asi pa nu pode atxaba dinheru pa nu kontinuaba ta uza dróga. N kumesa ta uza drógas sima LSD i anfetamina. Tanbê, N fika txeu nvolvidu na séksu, na bebida i na djuga batóta. Kel manera mariadu di vive li pô-m bira kada bês más violéntu. Sénpri N ta andaba ku un faka, un matxadu ô un maxin. I nunka N ka ta xintiba medu di uza-s si N mesteba.

 Un dia, mi ku nha grupu violéntu nu furta un karu i pulísia bai nos tras. Éra sima séna di un filmi. Nu fuji uns 30 kilómetru na kel karu ki nu furta. Má dipôs pulísia kumesa ta da-nu tiru. Nton, nos kondutor tevi un asidenti ku kel karu i nos tudu nu kóre. Ta da pa ntende pamodi ki nha pai kóre ku mi di kaza kantu el da kónta di kel ki kontise.

 Duránti 5 anu, N vive na rua. N ta durmiba na pórtas di kaza, na kamions, na bankus di prasa i na simitérius. Ti na un kavérna, N vive pa un ténpu. Nha vida ka tinha ninhun obijetivu nton N ta xintiba ma ka ta nportaba si N staba bibu ô mortu. N ta lenbra ma un dia, dipôs ki N uza dróga, N korta nhas pulsu i nhas brasu. Ti inda N tene sinal di kes pankada.

 Kantu ki N tinha 28 anu, nha mai bai djobe-m i el pidi-m pa N volta pa kaza. N konkorda i N promete-l ma N ta mudaba nha vida. Má leba ténpu pa N kunpri kel ki N promete-l.

 Un dia di tardi, dôs Tistimunha di Jeová konku na nos pórta. Timenti N staba ta obi-s, nha pai grita la di déntu kaza pa N da-s ku pórta na róstu. Má kómu N ka gostaba di seta órdi di ningen, N finji ma N ka obi. Kes Tistimunha di Jeová da-m três livru pikinoti, i N toma kontenti. N pergunta-s undi ki es ta fazeba ses runion. Uns dia dipôs, N bai pa Salon di Reinu.

 Primeru kuza ki N repara éra modi ki tudu algen staba bistidu dretu. Má ami N staba ku kabélu kunpridu, ku barba grandi i ku ropa bédju. Nton, N ka xinti dretu na ses meiu, pur isu N fika na rua di Salon di Reinu. Má N fika spantadu kantu N odja Juan bistidu di fatu. Nos éra koléga i el ta fazeba párti di un grupu violéntu. Dipôs N fika ta sabe ma dja tinha un anu ki el bira Tistimunha di Jeová. Odja-l la, da-m forsa pa N entra i sisti runion. É si ki tudu kumesa ta muda na nha vida.

 N seta un studu di Bíblia i lógu N ntende ma si N krê biraba amigu di Deus, N tinha ki muda nha manera di ser violéntu i kel vida di konportamentu mariadu ki N tinha. Faze kes mudansa li foi difísil. N prende ma pa N agrada Jeová Deus, N mesteba ‘troka nha manera di pensa pa N pode transforma’. (Romanos 12:2) Mizerikórdia di Deus mexe txeu ku mi. Sikrê ku tudu nhas éru, N xinti ma el sta daba mi xansi di muda nha stilu di vida konpletamenti. Kel ki N prende sobri Jeová Deus entra na fundu di nha korason. N odja klaru ma tinha un Kriador ki ta preokupaba ku mi. — 1 Pedro 5:6, 7.

 Kel-la motiva-m pa N kumesa ta faze mudansas. Pur izénplu, na nha studu di Bíblia kantu nu staba ta pâpia sobri fuma, N fla nha kabésa: ‘Si Jeová Deus krê pa N linpa di tudu sujidadi, nton N ten ki para di fuma!’ (2 Coríntios 7:1) N poi kes sigaru tudu na lixu!

 Tanbê N mesteba para di uza i di bende dróga. Faze kel-la leba más ténpu i sforsu. I N sabia ma pa N konsigiba, N tinha ki kortaba amizadi ku nhas koléga. Ses influénsia ka sta djudaba mi faze prugrésu na nha amizadi ku Deus. Dipôs, N kumesa ta kunfia más na Deus i na nhas novu amigu na kongregason. Ses amor i preokupason ku mi éra un kuza ki nunka N ka xintiba antis. Sima mês ba ta pasa, N konsigi larga dróga i N ‘troka nha manera di ser pa un otu novu’. (Efésios 4:24) Kel-la djuda-m bira más amigu di Deus. N batiza kómu Tistimunha di Jeová na agostu di 1985.

 Bíblia midjora nha vida txeu. El liberta-m di kel stilu di vida mariadu ki staba ta distrui nha korpu i ruspetu pa nha kabésa. Más di 30 di kes koléga ki N tinha, móre jóven pamodi SIDA ô pamodi otu duénsa ligadu ku dróga. N ta xinti txeu gratidon pamodi N aplika prinsípius di Bíblia, ki djuda-m ivita pa kes kuza la ka kontise ku mi tanbê.

 Kes faka i matxadu ki N ta andaba ku es pa faze violénsia, fika tudu na pasadu. Nunka N ka imajinaba ma un dia N ta trokaba kes kuza la pa Bíblia i uza-l pa djuda algen. Gósi mi ku nha mudjer nu ta inxina Palavra di Deus pa ténpu interu.

 Nha pai ku nha mai nunka ka bira Tistimunha di Jeová, má es fika kontenti ku bensons ki N resebe pamodi N studa Bíblia. Nha pai ti dja kustuma difende Tistimunhas di Jeová na frenti di tudu se kolégas. El tinha sertéza ma nha fé pô-m faze grandis mudansa i nha vida bira midjór. Txeu bês nha mai ta flaba ma N devia studaba Bíblia más sédu. El tinha tudu razon!

 Kuzas ki N pasa pa el inxina-m ma ka ten lójika buska filisidadi na dróga i na otus vísiu. Gósi N ta xinti filisidadi di verdadi óras ki N ta inxina otus algen kes kuza ki sta na palavra di Deus i ki salva nha vida.