N kria na Warialda, ki é un sidadi pikinoti di Nova Gales di Sul. Warialda é un sidadi di interior undi ta kriadu ovelhas i otus animal i ta simiadu serial i verduras. Kel sidadi é linpu i kuazi ka ten krimi la.

Nos éra 10 fidju i mi éra kel más grandi. Ku 13 anu N kumesa ta trabadja pa N djuda nha família. Dja ki N tinha poku skóla N bai trabadja na un lugar ki ta fazedu plantason i ki ta kriadu animal. I ku 15 anu, N bira un algen ki ta trena kabalus brabu.

Trabadja na kes lugar la ten se ladu sábi, má tanbê ten se ladu mariadu. N gostaba txeu di nha trabadju i di kel anbienti. N ta xintaba na bera di un fogera di noti i N ta odjaba pa lua i pa séu xeiu di stréla timenti N ta xintiba kel txeru sábi ki béntu ta traze di la di florésta di Austrália. Tudu kes kuza spetáklu li ta poba mi ta pensa ma tinha ki ten un algen ki faze-s. Má la, N pasa ta konvive ku maus koléga. Txeu bês N ta obiba palavras mariadu i sénpri N ta konsigiba sigaru. Nton, N kumesa ta fuma i ta fla kes mau palavra.

Kantu N faze 18 anu, N muda pa Sidnei. N tenta entra na trópa, má es ka dexa-m pamodi N tinha poku skóla. N ranja un trabadju i N fika na Sidnei duránti un anu. Foi na kel ténpu la ki N konxe Tistimunhas di Jeová. N seta un konviti pa sisti un di ses runion i lógu N da kónta ma kel ki es ta inxina éra verdadi.

Má lógu dipôs N disidi sai di la. N bai mora na un sidadi di Goondiwindi, na Queensland. N ranja un trabadju i N kaza. Má, infilismenti N kumesa ta bebe.

Mi ku nha mudjer nu tevi dôs fidju. Dipôs ki nhas fidju nase, N kumesa ta pensa na ki direson nha vida staba ta bai. N lenbra di kuzê ki N obi na kel runion di Tistimunhas di Jeová na Sidnei i N disidi faze algun kuza.

N atxa un Sentinéla antigu ku nderésu di filial di Tistimunhas di Jeová na Austrália. N skrebe un karta ta pidi ajuda. Dipôs, un irmon ki ten txeu amor ben vizita-m. I poku ténpu dipôs nu kumesa ta studa Bíblia.

Sima N ba ta studa Bíblia, N kumesa ta odja ma N mesteba faze grandis mudansa na nha vida. N fika dimiradu ku testu di 2 Coríntios 7:1. Kel testu li ta insentiva-nu pa ‘nu linpa di tudu sujidadi di karni’.

N disidi para di fuma i di bebe dimás. Ka foi fásil faze kes mudansa li pamodi dja tinha txeu ténpu ki N ta fazeba kes kuza la. Má N staba disididu na vive sima Jeová ta krê. Un di kes kuza ki más djuda-m foi aplika kel prinsípiu ki nu ta atxa na Romanos 12:2 ki ta fla: ‘I nhos para di sigi kel mundu li, má nhos troka nhos manera di pensa pa nhos pode transforma’. N repara ma N mesteba muda nha manera di pensa i odja nhas ábitu sima Jeová ta odja, sima un kuza mariadu. Ku se ajuda N konsigi para di fuma i bebe dimás.

Má, kel kuza más difísil di faze foi para di fla maus palavra. N sabia kuzê ki Bíblia ta konsedja-nu na Efésios 4:29 ki ta fla: ‘Ka debe sai di nhos bóka ninhun palavra mariadu’. Má sikrê, N ka konsigi faze kel-la lógu. Kuzê ki djuda-m foi midita na Isaías 40:26. Ta pâpia di séu xeiu di strélas, kel testu li ta fla: ‘Nhos labanta odju pa Séu i nhos odja. Ken ki kria kes kuza li? É Kel ki ta pô-s ta sai si ma un izérsitu, pa nunbru; El ta txoma tudu es pa ses nómi. Pamodi se grandi inerjia i di se puder ki ta da medu, nen un di es ka ta falta.’ Nton N pensa: ‘Si Deus ten puder di kria tudu kes kuza la ki N gosta txeu di odja, ku tudu sertéza, el pode da-m forsa pa N faze kes mudansa ki meste pa N pode agrada-l.’ Ku txeu orason i sforsu, N konsigi poku-poku ba ta para di fla kes palavra mariadu.

Na kes lugar ki N trabadja ka tinha txeu algen, pur isu N tinha poku oportunidadi pa N pâpia. Má trenu ki N resebe na runions di Tistimunhas di Jeová inxina-m prende pâpia midjór. I un di kes kuza ki N prende na kes trenu é pâpia ku otus sobri notísias sábi di Reinu di Deus. — Mateus 6:9, 10; 24:14.

Dja ten txeu anu ki N ten alegria di sirbi kómu ansion na kongregason. Pa mi é un priviléjiu faze tudu kel ki N pode pa djuda nhas irmon na fé. Má kel midjór benson é sirbi Jeová djuntu ku nha mudjer ki N gosta txeu i ki é fiel i ku nos fidjus ki N krê txeu.

N ta agradese Jeová pamodi el da-m xansi di prende sobri el sikrê ami é un algen ku poku skóla. (Isaías 54:13) N ta konkorda ku kes palavra di Provérbios 10:22, ki ta fla: ‘É benson di Jeová ki ta poi algen riku’. Mi ku nha família nu tene gana di prende más sobri Jeová i sirbi-l pa tudu ténpu.