Púrdua siginifika dexa pasa un éru ô un kuza ki un algen faze kóntra nos. Na Bíblia, palavra gregu traduzidu pa “púrdua” siginifika “dexa pasa.” É sima óras ki un algen ta disidi ka kobra un dívida ki un otu algen tene ku el. Jizus uza kel konparason li kantu el inxina se sigidoris ora. El fla: “Purdua-nu nos pekadu, pamodi nos tanbê nu ta púrdua tudu kel ki tene dívida ku nos”. (Lukas 11:4) Tanbê, na kel ilustrason ki Jizus konta di kel skravu ki ka púrdua, Jizus konpara púrdua ku ka kobra algen un dívida. — Mateus 18:23-35.

 Nu ta mostra ma nu ta púrdua otus algen óras ki nu ka ta guarda rankor. Tanbê, nu ka ta iziji pa es faze algun kuza pa konpensa kel mágua ô algun kuza ki nu perde. Bíblia ta inxina ma é amor ki ta djuda-nu púrdua di verdadi, dja ki amor ‘ka ta liga mal ki fazedu.’ — 1 Coríntios 13:4, 5.

Púrdua ka ta siginifika ma:

•   Bu ta seta kel kuza mariadu ki algen faze kóntra bo. Na verdadi, Bíblia ta kondena kes algen ki ta atxa ma kes kuza mariadu ki es ta faze é normal i ma ka ta prujudika otus. — Isaías 5:20.

•   Bu ta finji ma nada ka kontise. Deus púrdua kes pekadu gravi ki rei Davidi faze, má el ka libra-l di kes mau rezultadu di kes kuza ki el faze. Deus poi kes pekadu di Davidi na Bíblia i pur isu nu ta lenbra di es ti dia di oji. — 2 Samuel 12:9-13.

•   Bu ta dexa otus algen pruveta di bo. Pur izénplu, imajina ma bu inprista un algen dinheru, má el gasta-l i dipôs el ka paga-u sima el prometeba. El ta rapende i el ta pidi-u diskulpa. Bu ta mostra ma bu purdua-l si bu ka guarda rankor, si bu ka fika ta lenbra-l di kel kuza ki el faze i talvês ti bu pode disidi ka kobra-l kel dívida. Má simé, bu pode disidi ka inprista-l dinheru otu bês. — Salmo 37:21; Provérbios 14:15; 22:3; Gálatas 6:7.

•   Bu ta púrdua tudu tipu di éru. Deus ka ta púrdua kes algen ki ta faze kes pekadu kruel i di propózitu, kes ki ka ta rekonhese ses éru, ki ka ta muda ses atitudi i pidi diskulpa pa kes algen ki es prujudika. (Provérbios 28:13; Atus 26:20; Hebreus 10:26) Kes algen ki peka i ki ka rapende ta bira inimigu di Deus. Pur isu, Deus ka ta spéra pa nu púrdua kes algen ki el ka púrdua. — Salmo 139:21, 22.

   I si un algen faze-u un kuza kruel i el nega pidi diskulpa i rekonhese ma kuzê ki el faze é mariadu? Bíblia ta da kel konsedju li: ‘Dexa raiba pa la i ka bu xatia más’. (Salmo 37:8) Sikrê bu ka diskulpa-l, ka bu dexa raiba toma kónta di bo. Kunfia ma Deus ta julga kel algen. (Hebreus 10:30, 31) Bu pode fika konsoladu di sabe ma ka ta dura, Deus ta ben tra di nos korason tudu mágua ô dór ki nu sta pasa pa el. — Isaías 65:17; Apocalipse 21:4.

•   Bu ta “diskulpa” kalker algen ki ta parse ma fadja ku bo. Alvês, prubléma é ka si nu ten ki púrdua un algen ô nau. Na alguns kazu nu meste rekonhese ma nu fika ofendidu sen razon. Bíblia ta fla: ‘Ka bu ofende faxi, pamodi fika ofendidu é sinal ma algen é tolu.’ — Eclesiastes 7:9, nóta di rodapé.

Kuzê ki pode djuda-u púrdua

1.   Lenbra kuzê ki siginifika púrdua. Púrdua ka krê fla ma bu ta konkorda ku kel kuza mariadu ki kel algen faze-u ô ma bu ta finji ma nada ka kontise. Má púrdua siginifika ma bu ka ta guarda rankor.

2.   Rekonhese kes bon rezultadu di púrdua. Si bu ka fika xatiadu i nen bu ka guarda rankor, kel-li ta djuda-u fika kalmu, ta midjora bu saúdi i ta djuda-u fika más filís. (Provérbios 14:30; Mateus 5:9) Más inportanti inda, lenbra ma si bu krê pa Deus purdua-u, bu ten ki púrdua otus algen tanbê. — Mateus 6:14, 15.

3.   Poi na lugar di otus. Nos tudu é inperfeitu. (Tiago 3:2) Nu ta fika kontenti óras ki otus algen ta purdua-nu. Pur isu, nu debe púrdua otus tanbê. — Mateus 7:12.

4.   Ser ikilibradu. Óras ki nu ten ki lida ku un éru pikinoti ki algen faze-nu, nu pode aplika kel konsedju di Bíblia li: ‘Nhos kontinua ta suporta kunpanheru’. — Colossenses 3:13.

5.   Aji faxi. Envês di dexa raiba toma kónta di bo, sforsa pa bu púrdua kel algen más rápidu ki bu ta konsigi. — Efésios 4:26, 27.