Géra di Armajedon é últimu géra entri Deus i kes govérnu di ómi. Kes govérnu li i kes ki ta apoia-s ta fika kóntra Deus mésmu gósi pamodi es ta nega obi ku govérnu di Deus. (Salmo 2:2) Géra di Armajedon ta ben kaba ku tudu kes govérnu di ómi. — Daniel 2:44.

 Palavra ‘Armajedon’ ta parse sô un bês na Bíblia na Apocalipse 16:16. Kel profesia li ta fla ma kes ‘reis di tudu téra’ ta djuntadu ‘pa kel géra di grandi dia di Deus, Tudu-Poderozu’, ‘na kel lugar ki na ebraiku ta txomadu di Armajedon.’ — Apocalipse 16:14.

 Kenha ki ta bai géra na Armajedon? Jizus Kristu ta ben ser líder di trópas na Séu, ki ta ben luta kóntra kes inimigu di Deus i es ta ben ganha. (Apocalipse 19:11-16, 19-21) Kes inimigu di Deus ta inklui kes ki ta fika kóntra el i ki ka ta ruspeta-l. — Ezequiel 39:7.

 Armajedon é un géra ki ta ben kontise na Orienti Médiu? Nau. Armajedon ka ta ben kontise sô na un lugar, envês di kel-li el ta ben kontise na Téra interu. — Jeremias 25:32-34; Ezequiel 39:17-20.

 Armajedon (ô na ebraiku Har Meghiddohnʹ) siginifika ‘Monti Mejidu’. Mejidu éra un sidadi ki ta fazeba párti di tiritóriu di Israel. Stória ta pâpia di alguns géra inportanti ki kontise la i Bíblia ta pâpia di alguns di kes géra. (Juízes 5:19, 20; 2 Reis 9:27; 23:29) Má Armajedon ka pode ser kel lugar undi ki Mejidu ta fikaba, pamodi ka ten ninhun monti grandi la i nen kes lugar planu di Jizreel, ki ta fika pértu di Mejidu, ka ta txiga pa kebe tudu kes algen ki ta luta kóntra Deus. Nton, Armajedon é un géra na mundu interu ki tudu kes governanti ta djunta pa últimu bês pa luta kóntra govérnu di Deus.

 Modi ki géra di Armajedon ta ben ser? Nu ka sabe modi ki Deus ta ben uza se puder, má el pode uza kuzas ki el uza na pasadu sima pédras di granizu, tremor di téra, txuba fórti, lumi ku inxofri, raiu di séu i duénsas. (Jó 38:22, 23; Ezequiel 38:19, 22; Habacuque 3:10, 11; Zacarias 14:12) Alguns inimigu di Deus ta ben fika na meiu di konfuzon ki es ta mata kunpanheru, má na fin es ta ben da kónta ma é Deus ki sta luta kóntra es. — Ezequiel 38:21, 23; Zacarias 14:13.

 Armajedon ta ben ser fin di mundu? El ka ta ben ser fin di nos planéta, pamodi Deus da-nu Téra pa nu vive na el pa tudu ténpu. (Salmo 37:29; 96:10; Eclesiastes 1:4) Armajedon tanbê ka ta ben kaba ku tudu algen na Téra. Envês di kel-li, el ta ben salva ‘un monti di algen’ ki ta sirbi Deus. — Apocalipse 7:9, 14; Salmo 37:34.

 Bíblia ta uza palavra ‘mundu’ pa pâpia di Téra, má tanbê alguns bês el ta uza kel palavra li pa pâpia di kes algen na Téra ki é kóntra Deus. (1 João 2:15-17) Nton, Armajedon é ‘fin di mundu’ di algen mau. — Mateus 24:3, Traduson di Rei Jaime.

 Ki ténpu ki Armajedon ta ben kontise? Jizus pâpia di ‘grandi tribulason’ ki ta kaba na géra di Armajedon, i el fla: ‘Sobri kel dia i kel óra ningen ka sabe, nen anjus na Séu, nen Fidju, má sô Pai ki sabe.’ (Mateus 24:21, 36) I Bíblia ta mostra ma Armajedon ta ben kontise duránti prezénsa di Jizus ki kumesa na anu 1914. — Mateus 24:37-39.