Na kes primeru anu di nha vida, mi ku nha família ta moraba pértu di Leipzig, ki é un sidadi di Alimanha ki ta fika pértu di Repúblika Txeka i di Pulónia. Kantu N tinha 6 anu nu bai pa stranjeru pamodi trabadju di nha pai. Primeru nu mora na Brazil i dipôs na Ekuador.

Kantu N tinha 14, N mandadu pa Alimanha pa N ba mora na un skóla. Dja ki nha mai ku nha pai staba lonji na Mérka di Sul, N tevi ki prende dizaraska mi sô. Pur isu, N bira un algen ki ka gostaba pa ningen mandaba na mi. N ka ta preokupaba ku kuzê ki otus algen ta pensaba di nha atitudi.

Kantu N tinha 17 anu, nha mai ku nha pai volta pa Alimanha. Na komésu N ba mora ku es, má pamodi kel atitudi ki N tinha, N ka konsigi obi ku es más. Nton, N sai di kaza ku 18 anu.

N ka ta staba trankilu pamodi N ka tinha un obijetivu na vida. N analiza txeu organizason i stilus di vida diferenti. I N fika ku sertéza ma midjór kuza ki N pode fazeba éra konxe planéta Téra, ki é uma bunitu, antis ki ómis kaba ku el.

N sai di Alimanha, N kunpra un móta i N viaja pa Áfrika na el. Má lógu N tevi ki volta pa Europa pa N konpoba nha móta. Un dia, poku ténpu dipôs di kel-li, N staba bera-mar na Purtugal. É la ki N disidi fika ta viaja di barku envês di viaja di móta.

N djunta ku un grupu di jóvens ki staba ta pripara pa viaja na Osianu Atlántiku. É na kel grupu la ki N konxe Laurie, ki dipôs bira nha mudjer. Primeru, nu viaja pa kes ilha di Karibi. Dipôs nu para poku ténpu na Portu Riku i dipôs nu volta pa Europa. Nu krê atxaba un barku-a-véla pa nu bira-l un barku di motor, asi pa nu pode moraba na el. Má dipôs di três mês, nos planu ka da sértu pamodi N txomadu pa N sirbi na trópa di nha país.

N pasa un anu i três mês ta sirbi na barku di trópa di Alimanha. Na kel ténpu la, mi ku Laurie, nu kaza i nu kumesa ta faze planu pa viaja pa mundu interu. Poku ténpu antis di N bai pa trópa, nu kunpra un boti salva-vida stragadu. Timenti N staba na trópa, nu ba ta konpo-l ti ki nu bira-l na un barku-a-véla. Nos ideia éra mora na el i kontinua nos viaja pa mundu. Foi más ô ménus na kel ténpu dipôs ki N sai di trópa i antis di nu tirmina di konpo kel barku, ki Tistimunhas di Jeová kumesa ta studa Bíblia ku nos.

Na komésu, N ka ta atxaba ma N mesteba faze mudansa na nha vida. N staba kazadu i N ka ta fumaba más. (Efésios 5:5) Nos planu éra viaja pa mundu interu. Pur isu, N ta atxaba ma pasa vida ta odja kriason di Deus, ki é uma bunitu, di sertéza éra un kuza ki baleba péna.

Má na verdadi, N staba ta meste faze mudansas, prinsipalmenti na nha manera di ser. Mi éra txeu orgulhozu i N ta kunfiaba dimás na nha kabésa. Pur isu, N ta staba sénpri konsentradu na nha kapasidadi i na kes kuza ki N konsigi faze. N ta pensaba sô na nha kabésa.

Un dia N staba ta lé kel diskursu ki Jizus faze na monti, ki é txeu konxedu. (Mateus, kapítlus 5-7) Na komésu N ka ntende kuzê ki Jizus fla sobri ser filís. Pur izénplu, el fla ma kes algen filís é kes ki sta ku fómi i ku sedi. (Mateus 5:6) Má N ka ta ntendeba modi ki un algen ki meste algun kuza pode sta filís. Timenti N ba ta studa Bíblia, N da kónta ma Jizus staba ta fla ma nos tudu meste ten un amizadi ku Deus, i ma pa nu satisfaze kel nisisidadi li, primeru nu ten ki rekonhese ma nu meste ser amigu di Deus. É sima Jizus fla: ‘Filís é kes ki ten konsénsia ma es ten nisisidadi spritual’. — Mateus 5:3.

Dipôs ki nu kumesa ta studa Bíblia na Alimanha, nu muda pa Fransa i dipôs nu muda pa Itália. Pa tudu lugar ki nu ta baba, nu ta atxaba Tistimunhas di Jeová. N fika dimiradu ku amor ki es ta mostraba di verdadi i ku manera ki es éra unidu ku kunpanheru. N da kónta ma es éra própi un família na mundu interu. (João 13:34, 35) Ku ténpu, mi ku Laurie nu batiza i nu bira Tistimunha di Jeová.

Dipôs ki N batiza, N kontinua ta faze mudansa na nha manera di ser. Mi ku Laurie, nu disidi viaja na kósta di Áfrika i dipôs pasa na Osianu Atlántiku pa nu bai pa Mérka. Nu staba sô nos dôs na kel barku pikinoti, na meiu di kel mar uma grandi. É la ki N da kónta ma mi é ka éra nada dianti di nos Kriador, kel Algen Más Grandi. N tinha txeu ténpu livri pamodi na meiu di mar ka tinha txeu kuza di faze. Pur isu, N pasa txeu ténpu ta lé Bíblia. Stória di vida di Jizus na Téra mexe txeu ku mi. El éra un ómi perfetu, el tinha kapasidadis alén di kel ki N pode imajina, má simé nunka el ka txoma atenson pa se kabésa. Jizus ka ta konsentraba sô na se kabésa, má el ta konsentraba na se Pai ki sta na Séu.

Kantu N pensa na izénplu di Jizus, N da kónta ma N mesteba poi Reinu di Deus na primeru lugar na nha vida, envês di N tenta adora-l di nha manera. (Mateus 6:33) Kantu mi ku Laurie txiga na Mérka, nu disidi mora la i konsentra na nos adorason pa Jeová.

Antis, N ta kunfiaba sô na nha kabésa i txeu bês N ta fikaba ku dúvida si N staba ta toma bons disizon. Má gósi, N atxa kel midjór fonti di sabedoria ki ten, ki ka ta fadja i ki ta gia-m na kaminhu sértu. (Isaías 48:17, 18) Tanbê, gósi N ten un obijetivu na vida, ki é adora Jeová i djuda otus algen prende sobri el.

Mi ku Laurie nu ten un kazamentu más fórti pamodi nu ta sigi konsedjus di Bíblia. I nu abensuadu ku un fidju-fémia bunita ki konxe i ki ta ama Jeová.

Kel-li ka krê fla ma tudu kuza na nos vida sénpri kóre dretu. Má ku ajuda di Jeová nu sta disididu na nos adorason i nunka nu ka krê dizisti i nen para di kunfia na el. — Provérbios 3:5, 6.