TXEU algen konxe kel stória ma Jizus pregadu na un staka na meiu di dôs kriminozu. (Mat. 27:35-38) Má alguns algen ta kridita ma Bíblia ka sta izatu óras ki el ta fla ma dipôs korpu di Jizus priparadu i el podu na un sipultura. — Mar. 15:42-46.

Alguns algen ki ta kritika kes Ivanjélhu, ten dúvida si es ta dexaba pa un algen ki matadu tinha un ntéru normal sima na un sipultura. Má es ta kridita ma talvês es ta trataba kes kriminozu ki es mataba di manera diferenti. Jornalista Ariel Sabar splika na un revista a pamodi ki alguns algen ta pensa asi. El fla: ‘Prega un algen na krus éra un kastigu pa kes piór tipu di algen ki tinha na sosiadadi, i alguns studiozu ta faze trósa di kel ideia ma romanus ta dexaba kes algen li tinha un ntéru dretu.’ Kes romanu kreba pa kes kriminozu ki kondenadu pasaba pa un vergónha grandi, pur isu es ta dexaba ses korpu na staka pa animal brabu kume. Dipôs di kel-li kel ki restaba di kes korpu, es ta botaba na un vala.

Má arkiólogus fla ma kontise un kuza diferenti, peloménus ku alguns judeu ki kondenadu pa móre. Na 1968, es atxa osu di un ómi ki matadu na ténpu di apóstlus. Es atxa-l na un sipultura di un família di judeus pértu di Jiruzalen. Kes osu staba na un kaxa. Na meiu di kes osu staba un osu di kalkanhada. Es pregaba el na un tábua di madera ku un pónta di féru di 11,5 sentímetru. Ariel Sabar fla: ‘Kel kalkanhada ki éra di un ómi ki txoma Yehochanan da próva ki ta mostra pamodi ki kel stória na Ivanjélhus, ki ta fla ma Jizus nteradu na un sipultura, pode ser verdadi.’ Kalkanhada di Yehochanan é un izénplu di un ómi ki romanus prega na krus na ténpu di Jizus i ki es dexa pa judeus nteraba el.

Mésmu ku kel ki kalkanhada di Yehochanan ta mostra, simé ten ideias diferenti sobri na ki puzison ki Jizus pregadu na staka. Má ta fika klaru ma alguns kriminozu ki matadu tevi un ntéru i es ka botadu na un vala. Kel-li ta mostra klaru ma óras ki Bíblia ta fla ma korpu di Jizus podu na un sipultura, el ten razon. Próvas ta apoia kel ki Bíblia ta fla.

I más inportanti é ki Jeová dja flaba ma Jizus ta sérba nteradu na sipultura di un ómi riku, i ningen ka pode inpidi Deus di kunpri se palavra. — Isa. 53:9; 55:11.