PÁRTI 5
Modi ki bu pode da dretu ku bus família
‘Nhos bisti di bondadi, umildadi, brandura i paxénxa.’ — Colossenses 3:12
Kazamentu ta kria un novu família. Nbóra bu ta kontinua ta ama i ta ruspeta bu mai ku bu pai, algen más inportanti na Téra é bu maridu ô bu mudjer. Pa alguns mai ku pai é difísil seta kel-li. Má, konsedjus di Bíblia pode djuda-u lida dretu ku kel situason li. Bu pode kontinua na pas ku bu mai ku bu pai, timenti bu sta sforsa pa ten un amizadi fórti ku bu novu família.
1 TRATA BUS FAMÍLIA KU RUSPETU
KUZÊ KI BÍBLIA TA FLA: ‘Onra bu pai ku bu mai’. (Efésios 6:2 ) Ka ta nporta kantu anu ki bu ten, sénpri bu debe onra i ruspeta bu mai ku bu pai. Lenbra tanbê ma ken ki bu sta kazadu ku el é un fidju, i el meste da se mai ku se pai atenson. ‘Amor é ka siumentu’, pur isu nunka ka bu xinti medu di amizadi ki bu maridu ô bu mudjer ten ku se mai ku se pai. — 1 Coríntios 13:4; Gálatas 5:26.
KUZÊ KI BU PODE FAZE:
-
Ivita izajera. Ka bu fla kuzas sima: “Bu família sénpri ta kritika-m”, ô “Bu mai nunka ka gosta di kuzas ki N ta faze”.
-
Tenta ntende pamodi ki bu maridu ô bu mudjer ta pensa di kel manera.
2 SER FIRMI ÓRAS KI MESTE
KUZÊ KI BÍBLIA TA FLA: ‘Ómi ta dexa se pai ku se mai i el ta djunta ku se mudjer, i es ta bira un karni sô.’ (Génesis 2:24 ) Mésmu óras ki bu kaza, bu mai ku bu pai pode xinti ma inda es é responsável pa bo. I es pode krê mete na bu kazamentu más di ki kel ki es debe.
Bo ku bu mudjer, nhos debe pâpia i disidi ti undi ki nhos mai ku nhos pai pode entra na nhos kazamentu. Dipôs nhos pâpia ku es má ku amor. Nhos pode pâpia klaru i dirétu, má ku ruspetu. (Provérbios 15:1 ) Umildadi, brandura i paxénxa pode djuda nhos ten un bon amizadi ku nhos família i kontinua ta ‘aguenta kunpanheru ku amor’. — Efésios 4:2.
KUZÊ KI BU PODE FAZE:
-
Si bu sta preokupadu pamodi nhos família sta mete na nhos kazamentu, pâpia ku bu maridu ô bu mudjer óras ki kuzas sta más kalmu.
-
Nhos disidi modi ki nhos ta trata kel asuntu li.