PÁRTI 9
Adora Jeová djuntu ku bu família
‘Adora Kel ki faze Séu ku Téra’. — Apocalipse 14:7
Sima bu prende na es bruxura, Bíblia ten txeu konsedju ki pode djuda-u, abo ku bu família. Jeová krê pa bu ser filís. El promete ma si bu poi se adorason na primeru lugar ‘tudu kes otu kuza bu ta dadu.’ (Mateus 6:33 ) El krê pa bu ser se amigu di verdadi. Uza tudu xansi ki bu ten pa bu bira amigu di Deus. Kel-li é un priviléjiu más grandi ki un algen pode ten. — Mateus 22:37, 38.
1 BIRA MÁS AMIGU DI JEOVÁ
KUZÊ KI BÍBLIA TA FLA: ‘“N ta ben ser un pai pa nhos, i nhos ta ben ser nhas fidju, matxu ku fémia”, é si ki Jeová fla.’ (2 Coríntios 6:18 ) Deus krê pa bu bira más se amigu. Orason é un di kes manera di faze kel-li. Jeová ta konvida-u pa bu ‘faze orason sénpri.’ (1 Tessalonicenses 5:17 ) El krê sabe bus preokupason i kuzê ki bu ta pensa. (Filipenses 4:6 ) Óras ki bu ta faze orason djuntu ku bu família, es ta odja modi ki Deus é bu amigu.
Alén di pâpia ku Deus, bu meste obi-l. Bu ta pode faze kel-li óras ki bu ta studa se Palavra i publikasons ki ten bazi na Bíblia. (Salmo 1:1, 2 ) Pensa txeu na kuzê ki bu sta prende. (Salmo 77:11, 12 ) Tanbê, bu ta obi ku Deus óras ki bu ta sisti tudu runion. — Salmo 122:1-4.
Un otu manera di bira más amigu di Jeová é óras ki bu ta pâpia ku otus algen sobri el. Sima bu ta ba ta faze kel-li bu ta xinti más se amigu. — Mateus 28:19, 20.
KUZÊ KI BU PODE FAZE:
-
Tra ténpu pa lé Bíblia i faze orason tudu dia.
-
Nhos dexa nhos amizadi ku Deus ser más inportanti pa nhos família di ki diverson i diskansu.
2 PRUVETA DRETU DI BU ADORASON NA FAMÍLIA
KUZÊ KI BÍBLIA TA FLA: ‘Nhos ser amigu di Deus i el ta ser nhos amigu.’ (Tiago 4:8 ) Bu meste faze un prugrama pa adorason na família i sigi-l sénpri. (Génesis 18:19 ) Má, ten otus kuza ki bu meste faze. Deus debe faze párti di bu vida tudu dia. Bu família pode ten un amizadi más fórti ku Deus, óras ki es ta pâpia sobri el ‘xintadu na kaza, óras ki es sta anda na strada, na óra di deta i na óra di labanta.’ (Deuteronómio 6:6, 7 ) Sta disididu na ser sima Juzué ki fla: ‘Ami ku tudu algen di nha kaza, nu ta sirbi Jeová.’ — Josué 24:15.
KUZÊ KI BU PODE FAZE:
-
Faze un prugrama ki sénpri bu ta sigi i di manera ki el ta djuda kada algen di bu família na kel ki es meste.
