“Nda kati ndi kula, chithu chingwe cha ka cha ndi simila kwazo cha ka ndi gwisana nacho wu yeletsa ku shanganila ngubo ne bangwe balume. Nda ka ndi kumbula kuti ya ka ili chimo koga chi nowo pinda, ngono na ngwenu ku yeletsa ikoko ku cha ndi tshwenya.”​—David, 23.

 David u Nkirisiti u no shaka ku shathisa Ndzimu. A u nga khona ku shingila Ndzimu ha ili kuti u no yeletsa ku shanganila ngubo ne bangwe balume? Dumbu Ndzimu u no zwihwa chini ne kwe ku shanganila ngubo kwe nlume ne nlume kene nkadzi nen?

•  Baibili ikatini?

•  A ko dwa kuti . . . ?

•  Ngono ku ingwi ha ili kuti . . . ?

 Mikhwa ye ku shanganila ngubo kwe nlume ne nlume kene nkadzi ne nkadzi i nga na i ka se fanane ku yenda ne ngwao kene ku dwa mu chibaka chingwe ku noti ku chingwe. Ngono kana Bakirisiti ha ba to laugwa ne chi no dumigwa ne bunji kene “titutudzigwa yeno na yeno nge phepo imwe ne imwe ye zwidiyo.” (Baefesiya 4:14) Pana ku thama be jalo, ba no teya zila ya ba no linga nayo mazwibato e ku shanganila ngubo kwe nlume ne nlume kene nkadzi ne nkadzi (kose ne mazwibato angwe koga) mu milayontewo ye Baibili.

 Nlayontewo we Baibili ne kwe ku shanganila ngubo kwe nlume ne nlume kene nkadzi ne nkadzi wa ka tambunuka. Dama le Ndzimu likati:

•  “Usitongolala ne nlume unthama nkadzi, kuthu kunoshimisa.”​—Lifitiko 18:22.

•  “Ndzimu wakaletja bathu ibabo kushinga zwithu zose zwe shambgwa zwinoyemugwa nge mimoyo yabo, . . . wakabaletjedzela mu njemulo dzabo dzinobhatisa shoni. Ne bakadzi babo bakashandulila yendiso yakawolobeleka ye kuwalilana kuna isakawolobeleka.”​—Baroma 1:24, 26.

•  “Musitjengedzeke, banowalilana kuzhe kwe ndobolo kene banothigamila midzimu kene phombgwe kene nlume unowalilana ne mmwe nlume kene nkadzi unowalilana ne mmwe nkadzi kene mbava kene magovu kene zwilaladzi kene, banotjinya bamwe mazina kene banotjebela, akuna wabo unowongina mu bushe gwe Ndzimu.”​—1 Bakorinta 6:9, 10.

 Dumbu, milayo ye Ndzimu i no shinga mu bathu bose, i nga dwa ili nlume u no yemula ku shanganila ngubo ne nngwe nlume kene nkadzi u noyemula ku shanganila ngubo ne nngwe nkadzi kene nlume e yemula ku shanganila ngubo ne nkadzi kene nkadzi e yemula ku shanganila ngubo ne nlume. Malebeswa wu kuti, nngwe ne nngwe wa ka fanila kuti a laule njemulo dzidze dzi nga thama kuti a be ne mazwibato a singa shathise Ndzimu.​—Bakolosa 3:5.

 A ko dwa kuti Baibili i no dumila ku bengiwa kwe dzi-gay?

 Aa. Malebeswa wu kuti, Baibili ha i to dumila kuti ku bengiwe bathu bangwe​—i nga dwa ili ba no shanganila ngubo ili nlume ne nlume nkadzi ne nkadzi kene nlume e yemula ku shanganila ngubo ne nkadzi kene nkadzi e yemula ku shanganila ngubo ne nlume. Pana kuti ijalo, i no ti dwa iti “gwisani kube ne mbakiso ne bathu bose,” ne ba ka be be chila ne zila ya ka tini. (Bahebera 12:14) Ndizoke ha ku zo lulwama ku tshwenya, ku benga, kene ku thama chingwe koga chi sa ka lulwama mu bathu ba no shanganila ngubo ili nlume ne nlume kene nkadzi ne nkadzi.

 A ko dwa kuti Bakirisiti ba ka fanila lamba milawo i no dumila ku lalana kwe nlume ne nlume kene nkadzi ne nkadzi?

 Baibili i no lakidza kuti nlayontewo we ndobolo we Ndzimu u no shaka kuti nlume u ngompela a lobolane ne nkadzi u ngompela. (Matewu 19:4-6) Ne kwa kajalo, dzindebeleko dze milayo ye bathu ne kwe ku lalana kwe nlume ne nlume kene nkadzi ne nkadzi dzo amana ne khani ye chipolotiki, ngono isi ne kwe mazwibato. Baibili ino dwa Bakirisiti kuti ba si nginikane ne khani dze chipolotiki. (Johani 18:36) Ndizoke, ha ba to lebelekela kene lamba milayo ya goromente ye kwe ku lalana kwe nlume sa iye kene nkadzi sa iye kene mazwibato e ku lalana kwe nlume ne nlume kene nkadzi ne nkadzi.

 Ngono ku ingwi ha ili kuti ngwenu wale nthu u na mazwibato e ku lalana ne nlume ne nlume kene nkadzi ne nkadzi? A nthu wa ka jalo u nga shanduka?

 Ee. Dumbu, bangwe mu century ye kutanga ba ka thama be jalo! Shule kwe ku leba kuti bathu ba na mazwibato e ku lalana kwe nlume ne nlume kene nkadzi ne nkadzi ha ba to ngina mu Bushe gwe Ndzimu, Baibili i no leba iti: “Bamwe benyu bakatongobe bakajalo.”​—1 Bakorinta 6:11.

 A ku dwa kuti bathu ba ka be ba misa mazwibato e ku lalana kwe nlume ne nlume kene nkadzi ne nkadzi ha ba chi na njemulo dze mazwibato abo a ntolo? Aa. Baibili ikati: “Makaambala mbumbiko tshwa inothamiwa tshwa nge luzibo mu tjifano tje mbumbi wayo.” (Bakolosa 3:10) Ku shanduka i ndongoloso i no dwilila mbeli.

 Ngono ku ingwi ha ili kuti nthu ungwe u no shaka chila ne milayo ye Ndzimu u chi na njemulo dze ku lalana kwe nlume ne nlume kene nkadzi ne nkadzi?

 Koga se njemulo ingwe ne ingwe, nthu u nga shalula ku thama kuti isi kule kene ku i thama. Chini? Baibili ikati: “Tungamigwani nge Meya, kuti ndizo musishathise njemulo dze tjinyama.”​—Bagalatiya 5:16.

 Elanjele kuti ndimana ha ito ti nthu ha to be njemulo dze chinyama. Ngono, ha a na ndongoloso ye ku zwidiya Baibili kakale e tembezela, u nga khona kuti a be ne masimba e ku lamba njemulo dza ka jalo.

 David, wa legwa ha ti simulula, wa ka bona kuti ichecho malebeswa​—kwazokwazo ha a sina ku budza bazwadzi babe be Bakirisiti ne kwe mathatha a ka a ka lingisana nawo. Akati: “Nda ka nda dusiwa ntolo u no lema kwazo mu mathudzi angu, ngono ha ndi be nda ka ba budza ne kwe mathatha gwangu ndi na makole a no pinda 10, ndi ngabe nda ka shatha kwazokwazo.”

 Ha ti chila ne milayo ya Jehova to pelela ta ka shatha kwazo. To duma kwa ka pelela kuti “ina malebeswa, inoshathisa moyo,” ne kuti “kuyilondolodza kuna mbuzilo hwulu.”​—Pisalema 19:8, 11.