ZWE BAZWADZI
8: Chilakidzilo
CHA KU NO DWA
Bazwadzi ba no chila ne zila ya ka tambunuka ba no chila ku yendidzana ne cha ba no diya. Ha ti lakidzila, ha u nga tole kuti ngwana uwo a be ne malebeswa ha a nga ku hwa u ti, “U ndwe u ti ha ndipo,” ha u singa shake lebeleka ne nthu u li mile pa nkoba.
“Ndebo ya ka wolobegwa i noti ‘Thama cha ndi no ku budza, ku si cha ndi no thama.’ Ngono nkumbulo iwoyo ha u to shinga mu bana. Ba no nga zwiponchi zwi no mwa chingwe ne chingwe cha ti no leba ne cha ti no thama, ngono ba no pelela be ti budza kuti cha ti no thama ha chi to yendidzana ne cha ti no diya.”—David.
NLAYONTEWO WE BAIBILI: “Iwe ngono, u no diya bamwe, u ti ba si kwibe, apa iwe u no kwiba kene?”—Baroma 2:21.
INI KU FANILA
Bana ne bathu baptshwa dumbu ba no zwidiya mu bazwadzi babo ku pinda mu nthu nngwe ne nngwe koga—ku shanganyila ne bakhwinya babo. Ku no dwa kuti ndiwe nthu we kutanga ku tungamila bana babo zwibuyanana—ha i li kuti, u no ba diya cha u no thama.
“Ti nga leba chingwe ka njinji koga ti be ti zwibuzwa kuti apa ngwana wa ka teedza, ngono ha ti singa thame cha ti no leba, ngwana u no bona. Bana ba no yela njele chingwe ne chingwe cha ti no thama, nenguba ti singa kumbule kuti kwa ka jalo.”—Nicole.
NLAYONTEWO WE BAIBILI: “Koga butjenjedu gu no dwa pezhugwi . . . a guna . . . butjengedzi.”—Jakuba 3:17.
CHA U NGA THAMA
Yela njele mazwibato awo. U no lingilila maedziso a ka tini? U no bata nkhwinya uwo we ndobolo ne bana babo chini? Bakhwinya babo i bathu ba ka tini? Apa u no alakanila bangwe? Ha ti tambunuka koga, apa u nga shaka kuti bana babo ba zwibate ne zila ya u no zwibata nayo?
“Imi ne Nlume wangu ha ti to shaka bana bedu be zwibata ne zila ya ti singa chile nayo.”—Christine.
Kumbila mazwibatigwa ne kwe milandu iyo. Bana babo ba no ziba kuti ha u zo zwilizanila. Ha u ti “U ndi zwibatigwe” ha ku fanila—mu nkhwinya uwo we ndobolo ne bana babo—u no wobe u ba diya ku thembeka ne ku zwiyesa pasi.
“Ko sheteka kuti bana bedu ba ti hwe ha ti duma kuti ti nlandu, ne ku kumbila mazwibatigwa mu milandu yedu. Ha ti singa thame ti jalo,ba wo zwidiya ku sumbika milandu yabo.”—Robin.
“Se bazwadzi, bana bedu ba no zwidiya kwazo mu tili, ngono zila ya ti no zwibata nayo ndiyo chithu chikulu cha ti nacho ne kuti ba no chi bona mu zwibaka zose. Ku nga fanidzanyiwa ne buka i no gala ya ka zhugwa, i na thutho i no gala i diyiwa koga.”—Wendell.
