Ɛzɩma Yehowa Aseɣɖe Tɩnaa sɔɔlɩ Ɛsɔ nɛ ɛyaa lalaa yɔ, mbʋ seɣtiɣni-wɛ se powolo nɛ posusi Bibl taa tɔm ɛyaa tɩŋa, pɩkpɛndɩnɩ ɛyaa mba paatɛm-wɛ heyuu se “pɩtɩkɛdɩnɩ-m” yɔ. (Maatiyee 22:37-​39) Sɔɔlɩm mbʋ ɖɩwɛnɩ Ɛsɔ yɔɔ yɔ, piseɣtiɣ-ɖʋ se ɖɩña ɛ-Pɩyalʋ paɣtʋ nɛ ɖɩlɩzɩ aseɣɖe kpayɩ kpayɩ. (Tʋma Labʋ 10:42; 1 Yohanɛɛsɩ 5:3) Pɩsa nɛ ɖɩla tʋmɩyɛ nɖɩ camɩyɛ lɛ, ɖiwokini Ɛsɔtɔm ɛyaa nɛ ɖɩlɛlɩɣ ɛzɩ caanaʋ taa nayaa kaalabʋ yɔ. (Yereemii 25:4) Ðɩsɔɔlɩ ɛyaa mba pɔcɔ-ɖʋ nɛ pata yɔ, pʋyɔɔ ɖɩñakɩ pana se ɖisusi-wɛ “Kewiyaɣ tɔm kɩbandʋ” ndʋ tɩkɛ ñʋʋ yabɩtʋ tɔm yɔ; nɛ ɖisusuu-tʋ ɛyaa mba ɖɩɩtɛm-wɛ katʋʋ nɛ peheyi-ɖʋ se tɩtɩkɛdɩnɩ-wɛ yɔ.​—Maatiyee 24:14.

 Ðɩsɩ nzɩ sɩ-taa ɖiiwoba nɛ ɛyaa tɩmʋ-ɖʋ camɩyɛ yɔ, ɖoŋ ɖoŋ, ɖɩpɩsɩɣ sɩ-taa lɛ ɛyaa mʋʋ-ɖʋ camɩyɛ. Ɛbɛ yɔɔ? Iyele nɛ ɖɩyɔɔdɩ lɩmaɣza naadozo tɔm.

•   Ɛyaa ɩɩcakɩ ɖoli kʋɖʋm.

•   Ðɩɣa ŋga ka-taa nabɛyɛ kizi ɖɔ-tɔm yɔ, ka-taa mba lalaa mʋʋ ɖɔ-tɔm camɩyɛ.

•   Ɛyaa lɛɣzɩɣ wɛtʋ. Ɛjaɖɛ yɔɔ lakasɩ yaa mbʋ pɩtalɩ ɛyʋ nɔɔyʋ e-wezuu caɣʋ taa yɔ, pɩpɩzɩɣ piyele nɛ ɛna se pɩpɔzʋʋ-ɩ fezuu taa wondu nɛ ɛpaɣzɩ ñɩnʋʋ se ewelisi Bibl taa tɔm. (Maatiyee 5:3) Halɩ ɛyaa mba pakaɖɩɣnɩ-ɖʋ yɔ, papɩzɩɣ pɛlɛɣzɩ pa-laŋa ɛzɩ apostoloo Pɔɔlɩ kaalabʋ yɔ.​—1 Timootee 1:​13.

 Paa mbʋ yɔ, ɖɩɩkpaɣ nɔɔyʋ nɛ ɖoŋ se ɛmʋ ɖɔ-tɔm. (1 Pɩyɛɛrɩ 3:​15) Ɛsɔ sɛtʋ nʋmɔʋ taa lɛ, ɖɩnawa se paa ɛyʋ weyi lɛ, ɛ-maɣmaɣ ɛkpakɩɣnɩ ɛ-lɩmaɣza.​—Wayɩ Wayɩ Paɣtʋ 30:19, 20.