Bibl wɩlaa se Izrayɛɛlɩ wiyaʋ Daviid kaacaɣ wezuu pɩnzɩ mɩnɩŋ 11 taa P.P.Y nɛ e-liɖe taa mba tɔ kewiyitu pɩnzɩ kudokiŋ sakɩyɛ. Ɛlɛ nabɛyɛ hɔm tɔm nɛ pɔyɔɔdʋʋ se Daviid tɔm kɛ mʋɖɛ nɛ ɛtaatɔ kewiyitu nɛ ɛna. Wiyaʋ Daviid kaacaɣ wezuu toovenim na?

 Pɩnaɣ 1993 taa, tɛtɛɛ ñɩm ñɩnɩyʋ weyi payaɣ se Avraham Biran nɛ ɛ-taabalaa palɩ kaʋ hɔɔlaɣ nakɛyɛ yɔɔ ɖenɖe payaɣ se Tel Dan Izrayɛɛlɩ nɛ hayo kiŋ nɛ pama kɩ-yɔɔ se «Daviid ɖɩɣa.» Pama tɔm natʋyʋ caanaʋ taa takayaɣ nakɛyɛ sɛm kʋnɔŋ taa nɛ pɩlakɩ pɩnzɩ mɩnɩŋ 9 taa P.P.Y. Pɩtʋʋ fɛyɩ se pɩɩkɛ tilimiye nɖɩ Arameya mba kaamawa nɛ pɔyɔɔdɩ ɛzɩma pawabɩ Izrayɛɛlɩ piya yɔ pɩ-tɔm yɔ.

 Tɔm ñʋʋ nakʋyʋ wɛ takayaɣ ŋga payaɣ se Bible History Daily taa nɛ kɩtɔŋ se:«Tɔm ndʋ pamawa se ‘Daviid ɖɩɣa’ yɔ nabɛyɛ pɩtʋʋ tɩ-yɔɔ . . . Paa mbʋ yɔ, Bibl taa tazɩyaa sakɩyɛ nɛ tɛtɛɛ ñɩm ñɩnɩyaa petisi tɔm ndʋ Tel Dan stela calɩ yɔɔdʋʋ nɛ pɩwɩlɩ se Daviid weyi ɛ-tɔm pɔyɔɔdɩ Bibl taa yɔ ɛɛkɛ wɩyaʋ yɔ tɩ-yɔɔ kɛlɛʋ yem. Nɛ Bibl taa tɔm ndʋ pañɩnaa nɛ palɩɩ tɩ-yɔɔ yɔ tɩ-taa lɛ, ndʋ kɛnɩ ndʋ tɩkpaɖa yɔ nɛ pɔyɔɔdɩ tɩ-tɔm takayaɣ ŋga payaɣ se BAR [Biblical Archaeology Review].»