Paa pɩnaɣ ŋga, Yehowa Aseɣɖe Tɩnaa yaɣ ɛyaa miiliyɔɔwaa sakɩyɛ nɛ pa nɛ wɛ pɛkpɛndɩɣ nɛ palakɩ Yesu sɩm yɔɔ tɔzʋʋ sɔnzɩ. Palakɩ mbʋ se paña paɣtʋ ndʋ Yesu maɣmaɣ ɖʋwa yɔ. (Luka 22:19) Sɔnzɩ nzɩ sɩsɩɣnɩ-ɖʋ se ɖɩnɩɩ mbʋ pʋyɔɔ pɩɩcɛyaa kpem se Yesu ɛkpaɣ e-wezuu nɛ ɛlaa ɛyaa yɔɔ yɔ pɩ-taa. Sɩsɩɣnɩ-ɖʋ ɖɔɖɔ se ɖɩna ɛzɩma Yesu kɩlaʋ wazɩɣ-ɖʋ sɔnɔ nɛ ɛzɩma kɩkaɣ-ɖʋ wazʋʋ cee wayɩ yɔ.—Yohanɛɛsɩ 3:16.

 Paa ŋpɩzaa nɛ ŋwolo Yesu sɩm yɔɔ tɔzʋʋ sɔnzɩ ɖɩlaɖɛ pɩnaɣ kanɛ yaa ŋtɩpɩzɩ nɛ ŋwolo yɔ, ɛbɛ ŋpɩzɩɣ ŋla nɛ Yesu kɩlaʋ wazɩ-ŋ? Yesu wɩlaa se pɩpɔzʋʋ se ɖɩla nabʋyʋ nɛ pɩ-tɔm cɛyaa.

1.  1. Ðɩkpɛlɩkɩ nɛ ɖɩtɩlɩ Ɛsɔ nɛ Yesu. Yesu tɩmnɩ ɛ-Caa weyi ɛwɛ ɛsɔdaa yɔ nɛ ɛtɔ se: «Wezuu maatɛŋ kɛlɛ se pɛwɛɛ nɛ patɩlɩɣ-ŋ, ña Ɛsɔ toovenim tʋ kʋɖʋm koŋ, nɛ weyi ŋtiyi-i yɔ, Yesu Krɩstʋ.»—Yohanɛɛsɩ 17:3.

2.  2. Ðɩɖɔ tɔm ndʋ ɖɩkpɛlɩkɩɣ yɔ tɩ-yɔɔ. Yesu wɩlɩ kpayɩ kpayɩ se pɩwɛɛ se ɖɩlabɩnɩ tʋmɩyɛ tɔm ndʋ ɖɩkpɛlɩkɩɣ yɔ. Kɩɖaʋ nakʋyʋ yɔ: Ɛkɔwaɣ Pʋʋ yɔɔ tɔm yɔɔdʋʋ ñʋʋ lɛ, ɛsam mba payɩ ‘pewelisiɣ tɔm ndʋ ɛyɔɔdʋʋ yɔ nɛ pɔɖɔŋ tɩ-yɔɔ yɔ.’ (Luka 6:46-48) Ɛyɔɔdɩ alɩwaatʋ lɛɛtʋ taa se: «Ye ɩsɩm tɔm ndʋ nɛ ɩɖɔŋ tɩ-yɔɔ yɔ, ɩkɛ koboyaɣ tɩnaa.»—Yohanɛɛsɩ 13:17.

 Ŋsɔɔlaa se ŋkpɛlɩkɩ nɛ ŋtɩlɩ Ɛsɔ nɛ Yesu nɛ pɩkɩlɩ? Ŋsɔɔlaa se pawɩlɩ-ŋ mbʋ ɖeyi ɖeyi pɩwɛɛ se ŋla nɛ ŋɖɔ tɔm ndʋ ŋkpɛlɩkɩɣ yɔ tɩ-yɔɔ yɔ? Nʋmɔŋ weyi ɩ-yɔɔ ŋpɩzɩɣ ŋtɩŋna yɔ ɩ-taa nɩɩyɩ yɔ:

 Ðɩkpɛlɩkɩɣnɩ ɛyaa Bibl falaa, nɛ kpɛlɩkʋʋ mbʋ pɩsɩnɩ ɛyaa sakɩyɛ nɛ patɩlɩ tɔm ndʋ Bibl wɩlɩɣ yɔ nɛ pɔɖɔŋ tɩ-yɔɔ pe-wezuu caɣʋ taa.

•   Wolo jw.org yɔɔ hɔɔlʋʋ Yele nɛ nɔɔyʋ sɩnɩ-ŋ nɛ ŋkpɛlɩkɩ Bibl taa nɛ ŋna tɔm lɛɛtʋ pɩlɩɩnɩ Bibl kpɛlɩkʋʋ ɖʋtʋ ndʋ tɩ-yɔɔ.

•   Cɔnɩ video Pɩkɛdɩnɩ-ɖʋ se ŋsɔɔlaa se ŋkpɛlɩkɩ Bibl nɛ ŋna ɛzɩma Yehowa aseɣɖe tɩnaa kpɛlɩkɩɣnɩ ɛyaa Bibl yɔ.

 Yehowa Aseɣɖe Tɩnaa kpeɣliɣ tam nabʋlɛ kpɩtaʋ taa pe-kediɣzisi lona wena payaɣ-yɛ se Kewiyaɣ kpaamɩŋ yɔ ɩ-taa. Kediɣzisi nzɩ sɩ-taa, patazɩɣ Bibl taa nɛ panaɣ ɛzɩma papɩzɩɣ nɛ palabɩnɩ kɩ-wɩlɩtʋ tʋmɩyɛ pe-wezuu caɣʋ taa yɔ.

 Paa weyi ɛpɩzɩɣ nɛ ewolo kediɣzisi nzɩ sɩ-taa. Pɩtɩcɛyɩ se ŋkɛ Yehowa Aseɣɖe Tʋ pʋcɔ nɛ ŋwolo. Pɩlɩɩnɩ wɛtʋ ndʋ tɩwɛ mi-egeetiye taa yɔ tɩ-yɔɔ lɛ, papɩzɩɣ paya-ŋ se ŋwolo kediɣzisi Kewiyaɣ kpaaŋ taa yaa ŋtɩŋnɩ visioconférence yɔɔ nɛ ŋlabɩ-sɩ.

•   Cɔnɩ video Ɛbɛ palakɩ Kewiyaɣ Kpaaŋ taa? nɛ ŋna ɛzɩma Yehowa aseɣɖe tɩnaa lakɩ pe-kediɣzisi yɔ.

•   Wolo jw.org yɔɔ hɔɔlʋʋ Yehowa Aseɣɖe Tɩnaa kediɣzisi taa nɛ ŋna Kewiyaɣ kpaaŋ ŋgʋ kɩñɔtɩnɩ-ŋ yɔ.

 Ŋpɩzɩɣ nɛ ŋna intɛrnɛɛtɩ lone ɖɩnɛ ɖɩ-yɔɔ tɔm ñʋŋ nɛ videowaa sakɩyɛ mba pasɩɣnɩ-ŋ nɛ ŋkpɛlɩkɩ tɔm sakɩyɛ Yesu wɩlɩtʋ yɔɔ nɛ ŋna ɖɔɖɔ mbʋ pʋyɔɔ ɛ-kɩlaʋ tɔm cɛyaa yɔ.

 Kɩɖaʋ nakʋyʋ yɔ: Pɩsa nɛ ŋna ɛzɩma ɛyʋ kʋɖʋm sɩm pɩzɩɣ nɛ pɩya ɛyaa miiliyɔɔwaa sakɩyɛ ñʋʋ lɛ, kalɩ tɔm ñʋŋ «Jésus sauve : comment ?» nɛ «Ɛbɛ yɔɔ Yesu tɔɔ kʋñɔŋ nɛ ɛsɩ?» yaa cɔnɩ video Ɛbɛ yɔɔ Yesu sɩba?