Kʋjɔŋ nɩɩyɩ mʋ ñɩm siŋŋ mbʋ pʋyɔɔ yɔ, weyi ɛ-cɔlɔ ɩlɩnaa yɔ, ɛkɛ ɛyʋ sɔsɔ nɔɔyʋ yaa weyi ɖɩwɛnɩ ñamtʋ ɛ-yɔɔ siŋŋ yɔ. Kʋjɔŋ nɩɩyɩ wɛɛ ɖɔɖɔ lɛ, paa ɩtɩlɩ pʋyʋ yɔ, ɩpɩzɩɣ ɩmʋ ñɩm siŋŋ ɖɛ-ɛzɩdaa, mbʋ pʋyɔɔ yɔ weyi ɛlabɩ-ɖʋ ɩ yɔ, ɛkɛ ɖɔ-hɔʋ taa tʋ kʋsɔɔlʋ nɔɔyʋ, yaa ɖa-taabalʋ weyi ɖɩtaɣ-ɩ liu siŋŋ yɔ. Jordan weyi ɖɩɩyɔɔdɩ ɛ-tɔm kajalaɣ ñʋʋ taa yɔ, mbʋ pɩɩwɛ ɛ-hɔɔlʋʋ taa. Ɛzɩma tɔm tʋnɛ, titukuuni Yesu kɩlaʋ?

Kajalaɣ lɛ, Bibl yɔɔdaa se: “Ɛsɔ tiyi ɛ-Pɩyalʋ ɛgbamɩyɛ ɛjaɖɛ yɔɔ se ɖɩwɛɛ ɛ-yɔɔ.” (1 Yohanɛɛsɩ 4:9) Lɩmaɣzɩyɛ ɖɩnɛ ɖɩ-yɔɔ Yesu kɩlaʋ mʋ ñɩm siŋŋ. Nɔɔyʋ tɩkɩlɩ Ɛsɔ sɔsɔtʋ. Ebree Keɣa maɖʋ nɔɔyʋ yɔɔdaɣ Ɛsɔ tɔm lɛ, ɛtɔm se: “Ñe-ɖeke na Kɩbaɣlʋ, Kɩlɩm, tataa cɩnɛ.” (Keɣa 82:18) Kʋjɔʋ nakʋyʋ ɛɛpɩzɩɣ nɛ kɩmʋ ñɩm nɛ pɩkpaɖɩ ŋgʋ kɩlɩnɩ Ɛsɔ Kɩlɩm cɔlɔ yɔ.

Nabʋlɛ lɛ, Ɛsɔ kɛnɩ “ɖa-Caa.” (Izaayii 63:16) Ɛzɩma tɩyɛ? Ɛnʋ hanɩ-ɖʋ wezuu. Pɩtasɩ lɛ, ɛcɔŋnɩ ɖɔ-yɔɔ camɩyɛ ɛzɩ caja kʋsɔɔlʋ cɔŋnʋʋ e-piya yɔɔ yɔ. Ɛsɔ yɔɔdaɣnɩ ɛ-samaɣ ŋga payaɣ se Efrayim yɔ lɛ, ɛtɔm se: “Efrayim kɛ man-pɩyalʋ weyi ɛmʋnɩ-m yɔ, yaa pɩɣa kʋsɔɔlaɣ . . . ɛcaɣ-m pʋtɔdɩyɛ.” (Yereemii 31:20) Lɩmaɣza ana ɖɔɖɔ Ɛsɔ wɛnɩ ɛ-sɛyaa yɔɔ sɔnɔ. Pɩtasɩna se ɛkɛ ɖa-Lɩzɩyʋ Ðoŋ Tɩŋa Tʋ lɛ, ɛkɛ ɖɔɖɔ Caja kʋsɔɔlʋ nɛ taabalʋ kɩbanʋ. Lɩmaɣzɩyɛ ɖɩnɛ ɖɩ-yɔɔ kʋjɔŋ weyi payɩ ɩlɩɣnɩ ɛ-cɔlɔ yɔ ɩmʋ ñɩm siŋŋ.

Kʋjɔŋ nɩɩyɩ mʋ ñɩm siŋŋ, mbʋ pʋyɔɔ yɔ, palabɩ-ɩ nɛ sɔɔlɩm. Weyi ɛlakɩ kʋjɔʋ nɛ sɔɔlɩm yɔ, ɛɛɖaŋʋʋ se pɛhɛyɩ-ɩ ɛ-camɩyɛ lakasɩ yɔɔ.

Sɔɔlɩm tuyini Ɛsɔ nɛ ɛlaa ɛ-Pɩyalʋ ɖɔ-yɔɔ. Bibl yɔɔdaa se: “Ɛzʋnɔ Ɛsɔ wɩlɩ-ɖʋ ɛ-sɔɔlɩm: Ɛsɔ tiyi ɛ-Pɩyalʋ ɛgbamɩyɛ ɛjaɖɛ yɔɔ se ɖɩwɛɛ ɛ-yɔɔ.” (1 Yohanɛɛsɩ 4:9) Pɩɩkɛnɩ kɩjɛyʋʋ Ɛsɔ se ɛlaa ɛ-Pɩyalʋ ɖɔ-yɔɔ yaa we? Aayɩ! Krɩstʋ kɩlaʋ kɛ ‘lootiye nɖɩ ɛlabɩ-ɖʋ falaa yem yɔ.’—Roma 3:24; ABT.

Ɛbɛ yɔɔ Ɛsɔ labɩ-ɖʋ Lootiye nɖɩ? Bibl lɩzɩ pɩ-taa se: “Mbʋ pɩwɩlɩɣ se Ɛsɔ sɔɔlɩ-ɖʋ yɔ, mbʋ yɔ se: Ðɩɩkɛ kɩwɛɛkɩm laɖaa lɛ, Krɩstʋ sɩ ɖɔ-yɔɔ sɩm.” (Roma 5:8) Ɛsɔ wɛnɩ sɔɔlɩm siŋŋ, pʋyɔɔ ɛlabɩ mbʋ pɩwazɩɣ ɛyaa mba pɛwɛnɩ ɛjandʋ, kɩlabɩm nabʋyʋ fɛyɩ pɔ-yɔɔ nɛ pɛkɛ ɖɔɖɔ kɩwɛɛkɩm laɖaa yɔ. Ðɩtɩmʋna se Ɛsɔ ɛwɩlɩ-ɖʋ sɔɔlɩm mbʋ, nɛ ɖɩɩkaɣ pɩzɩɣ kpa se ɖɩhɛyɩ-ɩ pɩ-yɔɔ. Kʋjɔʋ sɔsɔʋ ŋgʋ ɛlabɩ-ɖʋ yɔ, kɩwɩlɩɣ se ɛ-sɔɔlɩm mbʋ pɩ-wayɩ fɛyɩ.

Kʋjɔŋ nɩɩyɩ mʋ ñɩm siŋŋ, mbʋ pʋyɔɔ weyi ɛ-cɔlɔ ɩlɩnaa yɔ, ɛlabɩ kɩlaŋ sakɩyɛ pʋcɔ nɛ ɛpɩzɩ ɛlabɩ-ɩ. Ye nɔɔyʋ etisi faaa nɛ ɛkpaɣ mbʋ pɩmʋ ñɩm siŋŋ ɛ-ɛzɩdaa nɛ ɛlabɩ-ŋ kʋjɔʋ yɔ, kʋjɔʋ ŋgʋ kɩwɛʋ ŋgee kpem ñɛ-ɛzɩdaa, mbʋ pʋyɔɔ yɔ weyi ɛlabɩ-ŋ kʋ yɔ, ɛla kɩlaŋ sakɩyɛ.

Ɛsɔ cɛlɩ “ɛ-Pɩyalʋ ɛgbamɩyɛ.” (Yohanɛɛsɩ 3:16) Ɛha-ɖʋ weyi ɛmʋ ñɩm siŋŋ ɛ-ɛzɩdaa yɔ. Alɩwaatʋ sakɩyɛ ndʋ Ɛsɔ kpaɣ nɛ ɛlɩzɩnɩ wondu yɔ, tɩ-taa ɛ nɛ Yesu palabɩnɩ tʋmɩyɛ, nɛ pʋyɔɔ lɛ, Yesu kɔm nɛ ɛkɛ “e-leleŋ pʋyʋ.” (Aduwa 8:30) Yesu kɛnɩ Ɛsɔ “Pɩyalʋ kʋsɔɔlʋ” nɛ “Ɛsɔ weyi paanaɣ-ɩ yɔ ɛ-lɛzʋʋ.” (Koloosi 1:13-15) Pa-taabalɩyɛ nɖɩ, ɖɩ-wayɩ fɛyɩ.

Paa mbʋ yɔ, Ɛsɔ “tɩfɛɛ ɛ-Pɩyalʋ ɛgbamɩyɛ.” (Roma 8:32) Yehowa ha-ɖʋ weyi ɛsɔɔlɩ ɛ-tɔm pɩdɩɩfɛyɩ yɔ. Kʋjɔʋ ŋgʋ, kɩ-labʋ pɔzɩ-ɩ kɩlaŋ sakɩyɛ.

Kʋjɔŋ nɩɩyɩ mʋ ñɩm ɖɛ-ɛzɩdaa mbʋ pʋyɔɔ yɔ, ɩcɔŋnɩ ɖa-kɩcɛyɩm sɔsɔm nabʋyʋ ɖeɖe. Ye ñe-wezuu ɛwɛ kaɖɛ naɖɩyɛ taa nɛ pama-ŋ kɔyɛ naɖɩyɛ, ɛlɛ ŋfɛyɩnɩ liidiye se ŋyabɩ-ɖɩ nɛ nɔɔyʋ tisi faaa nɛ ɛyabɩ-ŋ ɖɩ, ɛzɩma pɩlakɩ-ŋ? Pɩtʋʋ fɛyɩ se kʋjɔʋ ŋgʋ kɩmʋʋ ñɩm siŋŋ ñɛ-ɛzɩdaa, yaa we?

“Tɩtɩm taa Aɖam yɔɔ ɛyaa kpeekpe sɩkɩ, Krɩstʋ yɔɔ pakaɣ ɖaɣnʋʋ wɛʋ pe-kpeekpe.” (1 Kɔrɛntɩ 15:22) Ðɩkɛ Aɖam sayɩnaa nɛ pʋyɔɔ lɛ, ɖa-taa paa weyi “sɩkɩ.” Ða-maɣmaɣ ɖɩɩpɩzɩɣ nɛ ɖɩlɩzɩ ɖa-tɩ kɩdɛkɛdɩm nɛ sɩm po-yomiye taa, ɖɩñɔɔzɩ ɖa nɛ Ɛsɔ ɖɛ-hɛkʋ taa nɛ ɖɩwɛɛnɩ ɛhʋyɛ kɩbanɖɛ. Ɛzɩma ɖɩkɛ kɩwɛɛkɩm laɖaa yɔ pʋyɔɔ lɛ, ɖɩɩpɩzɩɣ nɛ ɖɩla nɛ ɖa-maɣmaɣ yaa nɔɔyʋ ‘ɖaɣnɩ wɛʋ’ yaa hiɣ wezuu. Bibl ñɩɣ niye tɔm ndʋ tɩ-yɔɔ nɛ kɩtɔ se: “Ɛyʋ ɛɛpɩzɩɣ ɛya ɛ-maɣmaɣ ɛ-ñʋʋ yaa ɛhɛyɩ Ɛsɔ mbʋ pɩɩya ɛ-ñʋʋ yɔ; pɩkpaɖɩ mbʋ ɛyʋ pɩzɩɣ yabʋ yɔ, sɔnɔ nɛ cee ɛɛpɩzɩɣ.” (Keɣa 48:8, 9) Pɩpɔzʋʋ kpem se pasɩnɩ-ɖʋ, mbʋ pʋyɔɔ yɔ, ɖa-taa nɔɔyʋ ɛɛpɩzɩɣ nɛ ɛya ɛ-maɣmaɣ ɛ-ñʋʋ. Ðɩfɛyɩnɩ ɖoŋ nɩɩyɩ.

Ɛzɩma Yehowa sɔɔlɩ-ɖʋ siŋŋ yɔ, pʋyɔɔ lɛ, etisi faaa nɛ ɛhɛyɩ “kɩmɩyɛ” se pɩsa nɛ ‘ɖɩɖaɣnɩ wɛʋ’ yaa ɖihiɣ wezuu pɩtɩŋnɩ Yesu yɔɔ. Ɛzɩma tɩyɛ Yesu kɩlaʋ hɛyɩ kɩmɩyɛ? “Ɛ-Pɩyalʋ Yesu calɩm ñalɩɣ  ɖa-kɩwɛɛkɩm kpeekpe.” Toovenim, pɩtɩŋnɩ Yesu calɩm yɔɔ lɛ, papɩzɩɣ pekpeɣu-ɖʋ ɖa-kɩwɛɛkɩm nɛ ɖihiɣ ɖɔɖɔ wezuu maatɛŋ cee wayɩ. (1 Yohanɛɛsɩ 1:7; 5:13) Ɛlɛ ɛzɩma tɩyɛ Yesu kɩlaʋ kaɣ wazʋʋ ɖɛ-ɛyaa kʋsɔɔlaa mba pasɩba yɔ? “Ðenɖe sɩm tɩŋnɩ ɛyʋ nɔɔyʋ yɔɔ nɛ pɩkɔɔ yɔ, mbʋ ɖɔɖɔ ɛyʋ nɔɔyʋ yɔɔ femtu tɩŋɩɣnɩ se pɩkɔɔ.”—1 Kɔrɛntɩ 15:21. *

Yesu kɩlaʋ kɛ kʋjɔʋ ŋgʋ kɩwɛ ŋgee yɔ, mbʋ pʋyɔɔ yɔ, kɩlɩnɩ Ɛsɔ Kɩlɩm cɔlɔ, sɔɔlɩm tuyini-i nɛ ɛlabɩ-ɖʋ kʋjɔʋ ŋgʋ, nɛ ɛla ɖɔɖɔ kɩlaŋ sakɩyɛ pʋcɔ nɛ ɛlabɩ-ɖʋ kʋ. Wiɖiyi nɔɔyʋ tɩlabɩ-ɖʋ kʋjɔʋ nakʋyʋ nɛ kɩkpaɖɩ Yehowa kʋjɔʋ kʋnɛ. Pɩtasɩ lɛ, kʋjɔʋ nakʋyʋ ɛɛpɩzɩɣ nɛ kɩcɔnɩ ɖa-kɩcɛyɩm ɖeɖe, ɛzɩ Yesu kɩlaʋ ŋgʋ kɩlɩzɩ-ɖʋ kɩdɛkɛdɩm nɛ sɩm yomiye taa yɔ. Toovenim, kʋjɔʋ nakʋyʋ ɛɛpɩzɩɣ nɛ kɩmʋ ñɩm nɛ pɩkpaɖɩ Yesu kɩlaʋ.