Kĩvathũkany’o na andũ onthe, Yesũ atwĩe ĩtunĩ e kyũmbe kya veva mbee wa kũsyawa kũũ nthĩ. (Yoana 8:23) Nĩwe woombiwe mbee nĩ Ngai, na nĩwatetheeisye kũmba syĩndũ ila ingĩ syonthe. No we e weka woombiwe nĩ Yeova ĩmwe kwa ĩmwe na kĩu nĩkyo kĩtumi wĩtĩtwe Mwana wa Ngai “ũla wasyaiwe weka.” (Yoana 1:14) Ĩngĩ, Yesũ aĩ Mũneeni wa Ngai, kwoou etawa “ĩla Ndeto.”​—Soma Nthimo 8:22, 23, 30; Akolosai 1:15, 16.

Ngai amũtũmie Mwana wake kũũ nthĩ kwa kũthamya thayũ wake kuma ĩtunĩ na kũũlikya ĩvunĩ ya mwĩĩtu Mũyuti weetawa Meli ũteesĩ mũndũũme. Kwoou, Yesũ ndaĩ na ĩthe wa kĩmũndũ. (Luka 1:30-35) Yesũ ookie kũũ nthĩ nĩ kana (1) amanyĩsye ũw’o ĩũlũ wa Ngai, (2) atũtĩie ngelekany’o ya ũndũ tũtonya kwĩka kwenda kwa Ngai o na ĩla twĩ mathĩnanĩ, na (3) anengane thayũ wake mwĩanĩu wĩthĩwe “wovosyo.”​—Soma Mathayo 20:28.

Wovosyo nĩ ndĩvi ĩla yumaw’a nĩ kana mũndũ athaw’e ndakoawe. (Kuma 21:29, 30) Kuma mwambĩlĩlyonĩ kĩyaĩ kĩeleelo kya Ngai mũndũ akũe na aikw’a. Twĩsĩ ũu ata? Ngai eeie mũndũ wa mbee, Atamu, ĩla wĩĩka kĩla Mbivilia ĩkĩtaa “naĩ,” akakw’a. Kwoou, kethwa Atamu ndaaĩka naĩ, ndethwa aakw’a. (Mwambĩlĩlyo 2:16, 17; 5:5) Kwosana na Mbivilia, kĩkw’ũ ‘kyalikile’ kũũ nthĩ kwĩsĩla Atamu. Kwoou,  Atamu atiĩa nzyawa syake syonthe naĩ na ĩtuvi ya naĩ, yĩla nĩ kĩkw’ũ. Twĩ na vata wa wovosyo nĩ kana ũtũvetee ĩtuvi yĩu twatiĩwe nĩ Atamu.​—Soma Alomi 5:12; 6:23.

Nũũ ũla waĩ atonya kũtũĩvĩa wovosyo wa kũtũthasya kuma kĩkw’ũnĩ? Ĩla twakw’a, twĩthĩawa twaĩvĩa mavĩtyo maitũ ene. Vaiĩ mũndũ ũte mwĩanĩu ũtonya kũĩvĩa mavĩtyo ma mũndũ ũngĩ.​—Soma Savuli 49:7-9.

Kĩvathũkany’o naitũ, Yesũ aĩ mwĩanĩu. Kwoou ndaĩ atonya kũkw’a kwondũ wa naĩ syake nũndũ ndaavĩtya. Ĩndĩ, Yesũ akwie nũndũ wa naĩ sya angĩ. Ngai oonisye andũ wendo mwingĩ vyũ kwa kũmũtũma Mwana wake akw’e kwondũ witũ. Ĩngĩ, Yesũ oonanisye nũtwendete kwa kwĩw’a Ĩthe wake na kũkw’a kwondũ wa naĩ sitũ.​—Soma Yoana 3:16; Alomi 5:18, 19.

Ĩloele vitio yĩ na kyongo, Yesũ Akwie Nĩkĩ?

Ĩla waĩ kũũ nthĩ, Yesũ nĩwavoisye awau, athayũũkya akw’ũ, na athũmũsya andũ kuma thĩnanĩ. Kwa nzĩa ĩsu nĩwoonanisye maũndũ ala ũkeka kwondũ wa onthe ala ewi ĩvinda yũkĩte. (Mathayo 15:30, 31; Yoana 5:28) Ĩla Yesũ wakwie, Ngai nĩwamũthayũũkisye na amũnenga mwĩĩ wa veva. (1 Vetelo 3:18) Na ĩndĩ Yesũ ekala kw’okonĩ kwa aũme kwa Ngai eteele nginya Yeova amũnenge ũkũmũ wa kũsumbĩka nthĩ yonthe. (Aevelania 10:12, 13) Ũmũnthĩ Yesũ nũsumbĩkĩte ĩtunĩ e Mũsumbĩ, na aatĩĩi make maendee kũmanyĩthya ũvoo ũsu mũseo ĩũlũ wa nthĩ yonthe.​—Soma Ndanieli 7:13, 14; Mathayo 24:14.

O mĩtũkĩ, Yesũ akatũmĩa ũkũmũ wake e Mũsumbĩ kũveta mathĩna onthe vamwe na ala mamaetae. Onthe ala mamũĩkĩĩa kwa kũmwĩw’a makatanĩa thayũ valatisonĩ kũũ nthĩ.​—Soma Savuli 37:9-11.