ĨSOMO YA 5
Kĩeleelo kya Ngai kwa Nthĩ Nĩ Kyaũ?
1. Nĩkĩ Ngai woombie nthĩ?
Yeova anengie andũ onthe nthĩ. Nĩyo mũsyĩ witũ. Kwoou, mũndũũme na mũndũ mũka ma mbee, Atamu na Eva, mayaaũmbwa mekale ĩtunĩ nũndũ Ngai aĩ anoomba alaĩka mekalae kũu. (Yovu 38:4, 7) Kĩvathũkany’o na ũu, Ngai aiie mũndũ wa mbee nthĩnĩ wa valatiso nzeo yeetawa mũũnda wa Eteni. (Mwambĩlĩlyo 2:15-17) Yeova nĩwanengie mũndũ ũsu vamwe na nzyawa syake wĩkwatyo wa kũtanĩa thayũ tene na tene ĩũlũ wa nthĩ.—Soma Savuli 37:29; 115:16.
Mwambĩlĩlyonĩ, no mũũnda wa Eteni w’oka waĩ valatiso. Mũndũũme na mũndũ mũka ma mbee maaĩle kũsyaana mausũsye nthĩ. Ĩtina wa ĩvinda, maĩ makĩlye nthĩ yonthe vinya na kũmĩtw’ĩkĩthya valatiso. (Mwambĩlĩlyo 1:28) Nthĩ ndĩkaanangwa o na ĩndĩĩ. Ĩkeethĩawa mũsyĩ wa andũ ĩvinda yonthe.—Soma Savuli 104:5.
Ĩloele vitio yĩ na kyongo, Nĩkĩ Ngai Woombie Nthĩ?
2. Nĩkĩ nthĩ ti valatiso ũmũnthĩ?
Atamu na Eva mayaamwĩw’a Ngai na kwoou Yeova amaumya ũla mũũndanĩ. Valatiso nĩyaaiw’e, na vaiĩ mũndũ waatonya kũmĩtũngĩĩa. Mbivilia yaasya: “Nthĩ nĩnenganĩtwe kw’okonĩ kwa athũku.”—Yovu 9:24.—Soma Mwambĩlĩlyo 3:23, 24.
Yeova nũemetwe nĩkwĩanĩsya kĩeleelo kyake kya mbee kwa mũndũ? Aiie! Nĩ mwene vinya w’onthe. Ndatonya kũemwa. (Isaia 45:18) Akatuma andũ mekala ũndũ we wendaa mekale.—Soma Savuli 37:11, 34.
3. Valatiso ĩkatũngĩĩwa ata?
Valatiso ĩkatũngĩĩwa ĩvinda ya ũsumbĩki wa Yesũ e Mũsumbĩ ũũngamĩtw’e nĩ Ngai. Kaũnĩ wĩtawa Ali–Maketoni, Yesũ akatongoesya alaĩka ma Ngai na kũmananga onthe ala mamũleaa Ngai. Na ĩndĩ Yesũ aimũvingĩa Satani kwa myaka 1,000. Andũ ma Ngai maikanangwa nũndũ Yesũ akamatongoesya na kũmasũvĩa. Makatanĩa thayũ ũtakathela nthĩnĩ wa Valatiso kũũ nthĩ.—Soma Ũvuan’yo 20:1-3; 21:3, 4.
4. Mathĩna makathela ĩndĩĩ?
Ngai akaveta ũthũku ĩũlũ wa nthĩ ĩndĩĩ? Yesũ nĩwanenganie “wonan’yo” wa kwonany’a mũminũkĩlyo wĩ vakuvĩ. Maũndũ ala mekw’o ũmũnthĩ makaendeea no mamine andũ, namo meonany’a tũtwĩe nthĩnĩ wa “wĩanĩu wa ĩvinda yĩĩ.”—Soma Mathayo 24:3, 7-14, 21, 22.
Ĩla Yesũ wĩĩthwa asumbĩkĩte nthĩ kwa myaka 1,000 e ĩtunĩ, akavetanga mathĩna onthe. (Isaia 9:6, 7; 11:9) Yesũ akeethĩwa e Mũsumbĩ, na e Mũthembi Mũnene ũla ũkaveta naĩ sya ala mamwendete Ngai. Kwoou, kwĩsĩla Yesũ, Ngai akavetanga mowau, ũkũũ, na kĩkw’ũ.—Soma Isaia 25:8; 33:24.
5. Nũũ ũla ũkekala nthĩnĩ wa Valatiso ĩla yũkĩte?
Nthĩnĩ wa Nyũmba ya Ũsumbĩ, ũkakomana na andũ mamwendete Ngai na mekwenda kwĩmanyĩsya ũndũ matonya kũmwendeesya
Andũ ala mamwĩw’aa Ngai makekala Valatisonĩ. (1 Yoana 2:17) Yesũ atũmie aatĩĩi make makamanthe ala auu na maimamanyĩsya ũndũ matonya kwĩka metĩkĩlwe nĩ Ngai. Ũmũnthĩ, Yeova aendee kũmbany’a milioni sya andũ ala meĩkala Valatisonĩ ĩla ĩkethĩwa kũũ nthĩ. (Nzevania 2:3) Nthĩnĩ wa Nyũmba sya Ũsumbĩ sya Ngũsĩ sya Yeova, andũ nĩmamanyĩaw’a ũndũ matonya kwĩthĩwa me aũme aseo, iveti nzeo, na asyai aseo. Syana na asyai mathaithaa vamwe na mayĩmanyĩsya ũndũ ũvoo mũseo ũtonya kũmatethya.—Soma Mika 4:1-4.
