Ĩvinda ĩkuvĩ mbee wa kĩkw’ũ kyake, Yesũ aisye: “Ũvoo ũũ mũseo wa ũsumbĩ ũkatavanw’a nthĩ yonthe wĩthĩwe ũkũsĩ kwa mbaĩ syonthe; na ĩndĩ mũminũkĩlyo ũkyũka.” (Mathayo 24:14) Ĩndĩ wĩa ũsu wa kũtavany’a nthĩ yonthe waĩ wĩanĩw’e ata? Kwa kũatĩĩa ngelekany’o ĩla Yesũ watũtiĩe ĩla waĩ kũũ nthĩ.​—Luka 8:1.

Tũtataa kũneena na andũ mĩsyĩ kwoo. Yesũ amanyĩisye amanyĩw’a make matavany’e ũvoo mũseo nyũmba na nyũmba. (Mathayo 10:11-13; Meko ma Atũmwa 5:42; 20:20) Atavany’a asu ma ĩvinda ya atũmwa nĩmaaĩiwe isio sya kũtavany’a. (Mathayo 10:5, 6; 2 Akolintho 10:13) O ta ũu ũmũnthĩ, wĩa witũ wa kũtavany’a ũtethaw’a kwa mũvango, na kĩla kĩkundi nĩkĩaĩawa kĩsio kĩna vala kyaĩle kũtavany’a. Mũvango ũsu ũtũtetheeasya kwĩanĩsya mwĩao wa Yesũ wa “kũtavya andũ, na kumya ũkũsĩ nesa vyũ.”​—Meko ma Atũmwa 10:42, NW.

Tũtataa kũneena na andũ kw’onthe kũla maĩ. Ĩngĩ, Yesũ nĩwaiie ngelekany’o ya kũtavany’a kũla kwĩ makomano ma andũ, ta ũtee wa ũkanga kana kĩthimanĩ kya ndũa. (Maliko 4:1; Yoana 4:5-15) Kwoou, o naitũ nĩtũneenaa na andũ ĩũlũ wa Mbivilia kw’onthe kũla tũtonya kũmakwatya​—nzĩanĩ, ndũnyũ, kũla andũ mathyũmũĩte, kana simũnĩ. Ĩla twakwata mwanya mũseo, nĩtũmatavasya ũvoo mũseo atũi, ala tũthũkũmaa namo, ala tũsomaa namo, na andũ ma mũsyĩ. Kĩthito kĩu kya kũtata kũtavany’a kĩla vandũ kĩtumĩte andũ milioni mbingĩ ĩũlũ wa nthĩ yonthe mew’a “ũvoo mũseo wa ũtangĩĩo.”​—Savuli 96:2, NW.

Nũkwona ta ve mũndũ ũtonya kũmũtavya ũvoo mũseo ĩũlũ wa Ũsumbĩ wa Ngai, na ũndũ ũvoo ũsu ũtonya kũmũtethya ĩvinda yũkĩte? Nĩwaĩle kũtavya angĩ ũvoo ũsu wa wĩkwatyo kwa mĩtũkĩ ũndũ vatonyeka!

• Nĩ “ũvoo mũseo” wĩva ũla no nginya ũtavanw’e?

• Ngũsĩ sya Yeova iatĩĩaa ata ngelekany’o ya Yesũ ya kũtavany’a?