O tondũ syĩtwa Nyũmba ya Ũsumbĩ yĩkwonany’a, ũndũ ũla wa vata wa Mbivilia ũmanyĩaw’a nyũmbanĩ ĩsu nĩ Ũsumbĩ wa Ngai. Ũsumbĩ ũsu nĩw’o waĩ kyongo kĩnene kya ũtavany’a wa Yesũ.​—Luka 8:1.

Nĩ vo ũthaithi wa w’o ũendeeaw’a. Nyũmbanĩ isu sya Ũsumbĩ nĩ vo wĩa wa kũtavany’a ũvoo mũseo ĩũlũ wa Ũsumbĩ ũvangĩawa. (Mathayo 24:14) Nyũmba sya Ũsumbĩ syĩthĩawa syĩ kĩvathũkany’o nthĩnĩ wa ũnene na mwakĩle. Syakwa kwosana na ũnene ũla waĩle na iyanakavaw’a ũndũ vataĩle, na mbingĩ sya syo itũmĩawa nĩ kĩkundi mbee wa kĩmwe. Myakanĩ ya mĩtũkĩ, nĩtwakĩte Nyũmba sya Ũsumbĩ ngili mbingĩ (nyũmba ta itano kĩla mũthenya) nĩ kana twĩanĩsye vata wa kwongeleka kwa ikundi na wongeleku wa atavany’a. Ũu ũtonyekete ata?​—Mathayo 19:26.

Syakawa na mĩvothi ĩla yumaw’a kwondũ wasyo. Mĩvothi ĩsu ĩtũmawa ovisinĩ wa ũvonge nĩ kana wĩthĩe ikundi no inengwe mbesa sya kwaka Nyũmba ya Ũsumbĩ kana kũmĩseũvya.

Syakawa nĩ andũ meyumĩtye mate kũĩvwa na me na wumo wĩ kĩvathũkany’o. Nthĩnĩ wa nthĩ mbingĩ, ve mũvango wa Ikundi sya Myako ya Nyũmba sya Ũsumbĩ. Timũ sya ala makaa na angĩ ala meyumĩtye niendaa kĩkundinĩ kĩmwe ĩtina wa kĩngĩ nthĩnĩ wa nthĩ ĩsu, o na niendaa kũndũ kũasa, nĩ kana itetheesye ikundi kwaka Nyũmba syoo sya Ũsumbĩ. Nthĩnĩ wa nthĩ ingĩ, Ana-a-asa ala maĩlĩte nĩmanyuvawa kũũngamĩa kwakwa na kũseũvw’a kwa Nyũmba sya Ũsumbĩ kĩsionĩ kĩla manengetwe. O na kau andũ aingĩ me na ũmanyi mwingĩ wa myako nĩmeyumasya matetheesye nthĩnĩ wa kĩla mwako ũendeee, andũ ala me kĩkundinĩ kĩla kĩkwakĩwa nĩmo meyumasya kwa wingĩ kũtetheesya mwakonĩ ũsu. Maũndũ asu onthe matonyethaw’a nĩ veva wa Yeova na kwĩyumya kwa andũ make kwa ngoo yonthe.​—Savuli 127:1; Akolosai 3:23.

• Nĩkĩ vala tũthaithĩĩa vetawa Nyũmba ya Ũsumbĩ?

• Nĩ kyaũ kĩtonyethasya kwakwa kwa Nyũmba sya Ũsumbĩ nthĩ yonthe?