MĨSOA YA MBIVILIA ĨELEETWʼE
Savuli 37:4—“Ĩtanyʼe Nthĩnĩ wa MWĨAĨI”
“Ĩtanʼye nthĩnĩ wa Yeova; nake akakũnenga [kĩla] ũvoyete na ngoo yaku.”—Savuli 37:4, The Bible in Kikamba, 1974.
“Ĩtanyʼe nthĩnĩ wa MWĨAĨI, nake akeanĩsya wendi wa ngoo yaku.”—Savuli 37:4, English Standard Version.
Kĩla Ĩandĩko ya Savuli 37:4 Yonanasya
Mũandĩki wa savuli athuthĩtye ala mamũthaithaa Ngai makwate ũtanu kwa kwĩthĩwa na ngwatanĩo nzeo vamwe na Ngai. Onthe ala matanĩaa ũnyanya ũsu no methĩwe mate na nzika o na vanini kana Yeova a Ngai akeanĩasya mawendi moo ala maseo.
“Ĩtanʼye nthĩnĩ wa Yeova.” O na ĩngĩ ndeto ii no ialyũlwe ta, “kwata ũtanu ũla mwingĩ vyũ nthĩnĩ wa Yeova,” “kwata ũtanu nthĩnĩ wa kũmũthũkũma MWĨAĨI,” kana “kwata ũtanu nthĩnĩ wa kĩla MWĨAĨI ũkwathĩte.” Kwa ũkuvĩ, tũkwataa ũtanu ũla mwingĩ vyũ yĩla twamũthũkũma Ngai ũla wa wʼo. (Savuli 37:4) Nĩkĩ tũkwasya ũu?
Ala mamũthaithaa Yeova monaa maũndũ ũndũ ũmonaa, o tondũ maeleetwʼe Mbivilianĩ. O vamwe na kwĩthĩwa mamwĩsĩ Ngai, nĩmethĩawa mesĩ kana nĩ ũndũ wa ũĩ kũmwĩwʼa. Nũndũ wa ũu, nĩmethĩawa na wasya mũseo wa ngoo, na nĩmevathanaa na mathĩna maingĩ ala maumanaa na kwĩka motwi mate maseo. (Nthimo 3:5, 6) Kwa ngelekanyʼo, maithataa kana makakwatwa nĩ kĩwĩu yĩla moona andũ me na ĩtomo kana mate aĩkĩĩku mailye ta maendeee nesa. (Savuli 37:1, 7-9) Andũ ma Ngai nĩmatanawʼa nĩ kũmanya kana o mĩtũkĩ nũkũmina ũsili wʼonthe ũte wa katĩ, na aiathima ala aĩkĩĩku nũndũ wa mwĩkalĩle woo mũseo. (Savuli 37:34) O na ĩngĩ, nĩmethĩawa na ũtanu mwingĩ kũmanya kana Ĩthe woo wa ĩtunĩ nĩwendeeawʼa nĩmo.—Savuli 5:12; Nthimo 27:11.
“Nake akakũnenga [kĩla] ũvoyete na ngoo yaku.” O na ĩngĩ ndeto ii no ialyũlwe ta, “akasũngĩa mboya syaku” kana “akaũnenga kĩla wĩ na vata vyũ nakyo.” Ũu ti kwasya kana Yeova akatũnengae o kyonthe kĩla twamwĩtya. O ta mũsyai mũseo, Yeova ethĩawa esĩ kĩla kĩseo vyũ kwondũ wa syana syake. Kwongela ũu, no nginya mboya sitũ, na mwĩkalĩle witũ, wosane na myolooto yake na kwenda kwake. (Nthimo 28:9; Yakovo 4:3; 1 Yoana 5:14) Yĩla veethĩwa vailye ũu, no tũmũvoye “ũla wĩwʼaa mboya” tũte na nzika o na vanini kana nũkũtwĩthukĩĩsya.—Savuli 65:2; Mathayo 21:22.
Mĩsoa Ĩla Ĩthyũlũlũkĩte Savuli 37:4
Savuli ya 37 yaandĩkiwe nĩ Mũsumbĩ Ndaviti ũla waĩ wa Isilaeli ya tene. Aandĩkie savuli ĩsu aatĩanĩsye nthoo ũndũ iatĩanĩaa, kana ũndũ voemu iandĩkawa. b
Kaingĩ Ndaviti nĩweekawa maũndũ mate ma ũsili wa katĩ. Nĩwaaĩlĩte kwĩkala evithĩte nũndũ Mũsumbĩ Saulo vamwe na angĩ nĩmamũmanthaa mamũae. (2 Samueli 22:1) Ĩndĩ o na vailye ũu, mavinda onthe Ndaviti nĩwamwĩkwatĩtye vyũ Ngai wake. Ndaviti nĩweesĩ kana Yeova ndakalea kũmasilĩla ala athũku. (Savuli 37:10, 11) O na ethĩwa makoonekaa ta maendeee nesa o ta “nyũnyi ila nziũ” kana nyeki, mũthya maikalea kũma.—Savuli 37:2, 20, 35, 36.
Savuli ya 37 nĩvathũkanĩtye kĩla ala maatĩĩaa mĩao ya Ngai makakwata, na kĩla kĩkakwata ala matamĩatĩĩaa. (Savuli 37:16, 17, 21, 22, 27, 28) Kwoou savuli ĩsu nĩtũtetheeasya kũkwata ũĩ na kwĩthĩwa andũ ma mũthemba ũla Ngai wendeeawʼa nĩwʼo.
Ĩloele vitio ĩĩ nguvĩ wone maelesyo makuvĩ ma ĩvuku ya Savuli.
a Ĩsyĩtwa ya Ngai ya kĩthyomo kya Kĩevelania yĩkothaa kũalyũlwa ta Yeova kĩthyomonĩ kya Kĩkamba. Nĩ kana ũmanye nĩkĩ Mbivilia mbingĩ itũmĩaa ĩsyĩtwa ya ũnene Mwĩaĩi vandũ va ĩsyĩtwa ya Ngai, sisya kĩlungu kĩ na kyongo, “We Yeova Nũũ?”
b Nzĩanĩ ĩsu ya kũandĩka, mũsoa wa mbee kana mĩsoa yĩana ũna ya mbee yambĩĩaa na nthoo ya mbee ya Kĩevelania, na mĩsoa ĩla yĩatĩĩe ĩyambĩĩa na nthoo ya kelĩ, na iithi iatĩanĩe oou. Kũandĩka kwa nzĩa ĩsu nĩkũtonya kwĩthĩwa kwatetheeasya andũ kũlilikana savuli ĩsu.
No Wendeewʼe Nĩ Ii
MŨSYAĨĨSYA
We Ngai Nĩwĩw’aa Mboya Sitũ?
Mbivilia nĩtũĩkĩĩthĩtye kana Ngai nũtwĩthukĩĩasya yĩla twamũvoya kwa nzĩa ĩla yaĩlĩte.
MOMANYĨSYO MA VATA MA MBIVILIA
Nĩ Ũndũ Ũtonyeka Kũtwʼĩka Mũnyanya wa Ngai?
Kwa myaka maana maingĩ, andũ nĩmethĩĩtwe mayenda kũmũmanya Mũmbi woo. Mbivilia no ĩtũtetheesye tũkatwʼĩka anyanyae ma Ngai. Ũnyanya ũsu wambĩĩaa na kwĩmanyĩsya ĩsyĩtwa ya Ngai.
MOMANYĨSYO MA MBIVILIA
Syĩndũ sya Kũũtetheesya Wĩmanyĩsye Mbivilia
Nyuva syĩndũ sya kwĩmanyĩsya Mbivilia ila iũkũtetheesya wĩthĩwe wĩ mwĩanĩe na ũitanĩa.
MOMANYĨSYO MA MBIVILIA
Ambĩĩa Kwĩmanyĩsya Mbivilia Naitũ
Ambĩĩa kwĩmanyĩsya Mbivilia na mwalimũ waku vate ndĩvi.
