We Ngai Nĩwĩw’aa Mboya Sitũ?
We waaĩsa kwĩthĩwa na nzika kana Ngai nĩwĩw’aa mboya syaku? Ethĩwa vailye ũu, manya kana ndwĩ weka. Andũ aingĩ nĩmamũvoyete Ngai ĩũlũ wa mathĩna me kĩvathũkany’o, ĩndĩ mathĩna asu maithelaa. Ũu nĩkwasya kana Ngai ndaũnganaa na mboya sitũ? Aiee! Mbivilia nĩtũĩkĩĩthĩtye kana Ngai nũtwĩthukĩĩasya yĩla twamũvoya kwa nzĩa ĩla yaĩlĩte. Ekai twone kĩla Mbivilia ĩwetete ĩũlũ wa ũndũ ũsu.
NGAI NĨWĨTHUKĨĨASYA.
“We ũla wĩw’aa mboya, mĩĩ yonthe ĩkooka kwaku.”—Savuli 65:2.
Andũ amwe maasya kana mavoyaa nĩ kana mew’e kavaa o na kau mayĩĩkĩĩaa kana mboya syoo nĩsyĩthukĩĩw’e. Ĩndĩ mboya ti o kĩndũ kya kũtũtetheesya twĩw’e kavaa yĩla twĩ thĩnanĩ. Vandũ va ũu, Mbivilia ĩtũĩkĩĩthasya kana “Yeova * e vakuvĩ na onthe ala mamwĩkaĩlaa, onthe ala mamwĩkaĩlaa na w’o. . . . O na akeew’a kũkaya kwoo, na kũmatangĩĩa.”—Savuli 145:18, 19.
Kwoou no tũĩkĩĩe vyũ kana Yeova Ngai nĩwĩthukĩĩasya mboya sya athaithi make. Atũĩkĩĩthĩtye atĩĩ: “Mũkeengaĩla, na mũkathi kũmboya, na ngamwĩthukĩĩsya.”—Yelemia 29:12.
NGAI NĨWENDAA ŨMUVOYE.
“Voyai na kĩthing’ĩĩsyo.”—Alomi 12:12.
Mbivilia ĩtwĩkĩaa vinya ‘tũvoye tũte kũeka,’ na ĩkasyoka ĩkatwĩa ‘kĩla ĩvinda tũendeee kũvoya.’ Kĩu kĩonany’a ũtheinĩ kana Yeova Ngai nĩwendaa tũmũvoye.—Mathayo 26:41; Aeveso 6:18.
Nĩkĩ wendaa tũmũvoye? Kwasũanĩa ũndũ ũũ: Nĩ mũsyai wĩva ũtenda kwĩw’a mwana wake aimũkũlya, “Tata, no ũndetheesye”? Vate nzika, ĩthe wa mwana ũsu nĩwĩthĩawa esĩ kĩla ũkwenda kana ũndũ ũkwĩw’a, ĩndĩ kwĩw’a aimwĩtya ũtethyo kũmũĩkĩĩthasya kana nũmũĩkĩĩe na nũmwendete. O ta ũu, yĩla twamũvoya Yeova Ngai, twĩthĩawa tũimwony’a kana nĩtũmũĩkĩĩe na nĩtũkwenda kwĩthĩwa na ngwatanĩo nake.—Nthimo 15:8; Yakovo 4:8.
NGAI NŨKŨTHĨNĨKĨAA MŨNO.
“[Mwiĩei] kwĩmakĩa kwenyu kw’onthe, nũndũ nũmũthĩnĩkĩaa.”—1 Vetelo 5:7.
Ngai endaa tũmũvoye nũndũ nũtwendete na nũtũthĩnĩkĩaa. Nĩwĩthĩawa esĩ mathĩna na mawĩmakĩo maitũ, na nĩwendaa kũtũtetheesya.
Mavinda onthe Mũsumbĩ Ndaviti nĩwamũvoyaa Yeova Ngai amũtetheesye, na nĩwamũtavasya kyonthe kĩla kĩũmũthĩny’a na ũndũ ũkwĩw’a. (Savuli 23:1-6) Ngai aĩ na woni mwaũ ĩũlũ wa Ndaviti? Nĩwamwendete mũno na nĩwasũngĩaa mboya syake. (Meko ma Atũmwa 13:22) O ta ũu, Ngai nĩwĩthukĩĩasya mboya sitũ nũndũ nũtũthĩnĩkĩaa.
“NĨNĨMWENDAA YEOVA, NĨKWĨTHĨWA NĨWĨW’AA WASYA WAKWA”
Isu nĩ ndeto sya mũandĩki ũmwe wa Savuli. Ndaĩ na nzika kana Ngai nĩweethukĩĩasya mboya syake, na kĩu nĩkyamũtethisye mũno. Ũndũ ũsu watumie ew’a e na ngwatanĩo nzeo na Ngai, na akwata vinya wa kũmĩanĩsya na mathĩna na mawĩmakĩo.—Savuli 116:1-9.
Tweethĩwa tũte na nzika kana Ngai nĩwĩw’aa mboya sitũ, tũkamũvoyaa kĩla ĩvinda. Kwasũanĩa ĩũlũ wa mwana-a-asa wĩtawa Pedro, ũla wĩkalaa ngalĩko ya ĩũlũ ya Spain. Kĩmwana kyake kyakwatie akisitendi kĩ na myaka 19 na kyakw’a. Ĩvindanĩ yĩu Pedro waĩ na kyeva kingĩ nĩwamũtulũĩlaa Ngai ngoo yake, na akamũvoya na kĩthing’ĩĩsyo amũkiakisye na aimũtw’ĩĩka. Veethĩiwe ata ĩtina wa ũu? Pedro aĩtye, “Yeova nĩwasũngĩie mboya syakwa kwĩsĩla ũkiakisyo na ũtethyo ũla nyie na kĩveti kyakwa twakwatie kuma kwa Aklĩsto ala angĩ kĩkundinĩ.”
Mavinda maingĩ mboya sitũ isũngĩawa kwĩsĩla ũtethyo na ũkiakisyo ũla tũkwataa kuma kwa anyanya maitũ
O na kau mboya iyaathayũũkya mwana woo, nĩsyatetheeisye Pedro na mũsyĩ wake kwa nzĩa mbingĩ. Mũka wake, María Carmen, aĩtye: “Kũvoya nĩkwandetheeisye kũmĩĩsya kyeva. Nĩneesĩ nesa vyũ kana Yeova Ngai nĩwangeleawa nũndũ yĩla namũvoya, neew’aa nakwata mũuo wa ngoo na kĩlĩko na ndyĩw’a nausya.”
Mbivilia vamwe na maũndũ ala andũ meyoneete, monanasya nesa vyũ kana Ngai nĩwĩthukĩĩasya mboya. Ĩndĩ o na vailye ũu, nĩtwaĩle kũmanya kana Ngai ndasũngĩaa mboya syonthe. Nĩkĩ Ngai ũsũngĩaa mboya imwe na ailea kũsũngĩa ingĩ?
^ kal. 5 Yeova nĩyo ĩsyĩtwa ya Ngai.—Savuli 83:18.
No Wendeewʼe Nĩ Ii
MŨSYAĨĨSYA
Ngai Nĩwĩthukĩĩasya Mboya Sitũ na Aitũsũngĩa?
Mbivilia nĩyonanĩtye kana Yeova nĩwĩthukĩĩasya mboya. Kwoou nithyĩ mũno mũno tũtonya kũtuma atwĩthukĩĩsya kana alea kũtwĩthukĩĩsya.
