Ingalan mungdan, Landan mare a masha grai htat ai shara re ai, Patdintan mare hta ngai hpe shangai ai. Dai hta anu, nye a kana masum hte arau nga wa ai. Awa gaw tsa ya re ai majaw, anhte hte nga dat, n nga dat sha re.

Ngai naw kaji ai shaloi anu gaw, shana shagu akyu hpyi chye hkra sharin ya ai. Shakawn Kungdawn laika sha lawm ai Chyum Laika buk kaji ngai kaw nga ai. Dai Chyum Laika ga si ni hpe mahkawn hkawn mai hkra ngai bai ka da ai. Ngai hti wa ai laika buk langai hta na ga yan langai hpe, nye myit hta galoi mung matsin nga ai. “Lani mi hta, hpawt ni ngu ai nga sana n re” da. Dai ga ni a majaw yup n lu ai sha, htawm hpang a lam myit hkrup ai. ‘Prat gaw n dai hta grau na lachyum nga na re. Nrai yang, hpa majaw asak hkrung taw ai ma?’ ngu na myit hkrup ai. Ngai n si mayu ai.

Nat hpaji hpe ngai grai myit lawm ai. Dai majaw, si mat ai ni hte ga shaga na matu ngai shakut ai. Jawng manang ni hte lup wa de sa ai. Nat hte seng ai video ni yu ai. Dai zawn galaw ai gaw myit kahpra hpa rai nna, hkrit hpa mung re.

Asak 10 ning kaw na kam ai hku galaw hpang wa ai. Hkayawm chye lu wa nna, yin kap mat ai. Hpang de gaw nanghpam tsi mung marawp wa ai. Asak 11 ning hta tsa chye lu nga sai. Tsa a namchyim hpe n ra tim, nang taw ai hpe gaw ra ai. Ka ai hte yungwi mahkawn ni hpe mung ngai ra sharawng ai. Dai majaw ayan ngu na daram, pati hte ka manawt poi ni sa ai. Shana hta nta kaw na lagu pru nna, nhtoi garai n htoi shi yang bai wa ai. Shani nga yang, masha gaw pu ba taw ai. Dai majaw jawng hprawng ai. Jawng lung yang mung, chyahkring mi hkring ai aten hta tsa chyaru lu ai.

Jawng lung ai hpang jahtum shaning hta, jawng laika hta lu ai masat gaw hpang jahtum de du mat ai. Ngai kam ai hku galaw taw ai hpe shawng nnan hta anu n sadi hkrup tim, jawng hta lu ai masat a majaw sadi hkrup mat nna ngai hpe grai pawt ai. Anu hte ga law ai majaw, ngai mung nta kaw na pru mat nna, nye a sumtsaw Toni hte sa nga ai. Shi gaw mara ni galaw ai, nanghpam tsi dut ai, grai mazut ai wa ngu na mying kaba ai. Asak 16 ning hta ma hkum kap wa nna kasha magam hpe lu wa ai.

Garai n hkungran shi ai ma kanu ni hte shanhte a ma ni a matu hpaw da ai nta hta nga ai shaloi, Yehowa Sakse langai hte shawng nnan lang hkrum wa ai. Asuya gaw dai nta na gawk langai hta ngai hpe nga shangun ai. Yehowa Sakse lahkawng gaw, kaga ma kanu ni kaw ayan sa chyai ai. Lani mi hta ngai mung, shanhte bawngban ai lam hta shang lawm ai. Yehowa Sakse ni shut ai lam hpe sakse madun na matu yaw shada nna shang lawm ai re. Raitim, shanhte gaw nye a ga san yawng hpe Chyum Laika kaw na asan sha mahtai jaw ya ai. Shanhte a tsawra myit hte sumnung ai lam hpe ngai grai ra mat ai. Dai majaw Chyum Laika hkaja na matu ngai myit hkrum kau ai.

Nau n na shi ai sha, nye a prat hpe galai shai shangun na lam nkau hpe Chyum Laika kaw na ngai chye wa ai. Naw kaji ai aten kaw na si na hpe hkrit wa tim, ya gaw bai hkrung rawt wa ai lam hte seng nna Yesu sharin ya ai lam hpe chye wa ai. (Yawhan 5:28, 29) Karai Kasang gaw ngai hpe lanu lahku ai lam hpe mung chye dat ai. (1 Petru 5:7) Laksan hku nna Yeremia 29:11 hta tsun da ai ga ni hpe ngai grai ra ai. Dai hta: “Yehowa ning nga ai: Nanhte a lam ngai myit ai hku, ngai chye nga nngai: nanhte hpe jahten na n rai; nanhte myit mada ai lam, htawm hpang e lu la hkra, ngwi pyaw ai hku hkrai ngai myit nga nngai” ngu tsun da ai. Ndai mungkan ntsa hta, tsawm htap ai masa lam hte htani htana asak hkrung na myit mada lam lu mai ai hpe ngai kam wa ai.​—Shakawn 37:29.

Yehowa Sakse ni gaw, ngai hpe jet ai tsawra myit madun ma ai. Shanhte a zuphpawng langai hpe shawng nnan lang sa lung ai shaloi, yawng gaw alum ala hte kap tau la ma ai. (Yawhan 13:34, 35) Church hta sa lung ai hte tsep kawp n bung ai. Yehowa Sakse ni gaw nye a masa lam hpe chye nga ninglen sharawng awng let hkap hkalum la ma ai. Ngai hpe aten jaw nna lanu lahku ai sha n-ga, ten sha ra ai karum shingtau lam ni hpe mung jaw ai. Tsawra myit hpring ai dingku kaw na nta masha langai zawn, ngai hkam sha ai.

Yehowa a tsang madang ni hte maren nga lu na matu, prat hpe galai shai ra ai lam Chyum Laika hkaja let chye wa ai. Raitim, hkayawm dawm kau na matu grai yak ai. Yungwi mahkawn nkau gaw, nanghpam tsi marawp mayu ai myit grau sharawt ya ai hpe ngai chye wa ai. Dai majaw madat nga ai yungwi mahkawn nkau hpe galai shai kau ai. Tsa n nang ai sha nga mayu ai majaw, tsa lu na matu gunglau ya ai pati ni, ka manawt poi ni sa ai hpe jahkring kau ai. Prat nnan hte nga lu na matu karum ya lu ai ni, kaja ai lam hpe shingkang ka-up ya lu na manang nnan ni hpe mung tam wa ai.​—Ga Shagawp 13:20.

Dai aten laman, Toni mung Yehowa Sakse ni hte Chyum Laika hkaja ai. Yehowa Sakse ni gaw, shi san ai ga san yawng hpe Chyum Laika hte mahtai jaw ai majaw, ndai gaw teng man ai tara re ngu ai hpe shi mung kam wa ai. Dai majaw, shi prat hkrun lam hpe grai galai shai kau ai. Grai mazut ai manang ni hpe kau da ai. Tara tawt lai ai lam ni n galaw sai, nanghpam tsi marawp ai akyang hpe mung dawm kau ai. Yehowa myit ra ai lam hpe lu mayu yang, akyang hten ai prat hkrun lam hpe galai shai ra ai lam, ma a matu ngwi pyaw simsa ai grup-yin hpe gawgap ya ra ai lam, an lahkawng yan chye wa ai. Dai majaw, 1982 hta an lahkawng hkungran kau ai.

Ngai galai shai mayu ai hte maren, prat hkrun lam hpe awng dang let galai shai wa ai ni a prat labau ni hpe Sin Langchyi hte Dum Hprang! * ni hta tam hti wa ai hpe naw dum ai. Shanhte a kasi a majaw ngai grai n-gun lu mat ai. Matut shakut nna galai shai na matu, asum n jaw na matu ra ai n-gun ni lu wa ai. Ngai hpe myit n daw mat na matu Yehowa Karai Kasang kaw ayan na akyu hpyi ai. 1982, July shata hta Toni hte ngai hkalup hkam wa ai.

Yehowa Karai Kasang hte hku hkau ni htep wa ai gaw, nye a prat hpe hkye ya dat ai re. An yan gaw, yakhkak htum aten ni hta Yehowa a karum shingtau lam hpe lu la wa ai. Yehowa hpe kamhpa chye na matu ndai mayak mahkak ni kaw na sharin la lu wa ai. Anhte a dinghku hpe Yehowa galoi mung karum madi shadaw ya nga ai hpe mung chye wa ai.​—Shakawn 55:22.

Yehowa hpe ngai chye chyang ai zawn, kasha yan hpe mung Yehowa a lam chye chyang wa hkra sharin ya lu ai majaw, ngai grai pyaw ai. Ya nga yang shanhte a ma ni mung, Karai Kasang hpe chye chyang nna rawt jat nga ai hpe mu lu ai majaw grai kabu ai.

Htawm hpang a lam, si ai lam ni hpe myit tsang nna, yup n pyaw ai baw tsep kawp n nga sai. An yan gaw Yehowa Sakse ni a nawku hpung ni hpang de bat mi hte bat mi sa kawan nna n-gun jaw na ahkang lu da ai. Yesu hpe kam yang, htani htana asak lu na lam kaga ni hpe sharin ya ai magam hta an lahkawng yan shang lawm nga ai.