Saping mung a sinna dingdung kaw nga ai Galisha mare na nu yan wa madu ai hkauna mare hta, ngai hpe shangai wa ai. An nau ni marai 8 nga ai hta ngai gaw nambat 4 wa re. Anhte hta ngwi pyaw ai dinghku lu da ai. Dai aten hta, Saping mung hta dinghku langai kaw, yawm htum marai langai hpe Hkristan jawng (sh) ma ma jawng de sa ma ai. Anhte a dinghku hta gaw an nau ni marai 3 hpe sa dat ai.

Ngai asak 13 ning hta, ashawng nga ai Metdarit mare na ma ma jawng sa ai. Ma ma jawng gaw hkan sa tara ni, akyu hpyi ga ni hte shadawn sharam lam ni sha nga nna hku hkau ai lam hpa n nga ma ai. Jahpawt jau jau nawku akyu hpyi ai shara hta, nawku ku na matu zup hpawng ra tim, myit maju jung n mai ai. Ngut yang mung, Latin ga hte sha shakawn mahkawn hkawn nna, Mar poi galaw ai. Ngai hpa mung n chye na ai. Dai majaw, Karai Kasang hte tsan gang wa ai ngu na hkamsha wa ai. Ma ma jawng hta nga ai aten ni gaw, zim zam rai nna sha aten htum mat ai. Ashawng hte hkrum yang pyi atsawm n lu shaga ai. Ma ma ni gaw anhte yawng hpe lusha sha ngut ai hpang, minit 30 sha ga shaga na ahkang jaw ai. Ngwi pyaw ai anhte a dinghku hte tsep kawp shai ai. Garen gari ai ngu hkamsha nna hkrap wa ra ai aten ni mung nga ai.

Karai Kasang hte tsan gang ai ngu hkamsha tim, asak 17 hta ma ma byin wa ai. Myit mada da ai zawn ma ma byin wa tim, dai gaw Karai ra sharawng ai lam rai ai kun, n rai ai kun ngu na ntsen ai myit nga hpang wa ai. Dai zawn ntsen ai myit nga ai ni gaw ngarai lu chye ai ngu nna ma ma ni tsun tim, ntsen ai myit ni naw nga dingyang re. Yesu Hkristu pyi masha ni hte kaga ga n nga ai sha, sharin achyin ya ai, karum ya ai hte amu law wa ai hpe ngai chye da ai. (Mahte 4:​23-​25) Asak 20 ning du wa ai shaloi hta gaw, ma ma matut galaw na lam hpe ngai n lu myit mat sai. Mauhpa gaw ma ma matut galaw na matu n teng sai nga yang, jawng kaw na lawan pru mat ai gaw kaja ai ngu na ma ma jawng up tsun ai. Ngai na majaw kaga ni mung myit galai shai mat na hpe tsang ai majaw rai na re. Dai majaw, ngai mung ma ma jawng kaw na pru wa ai.

Ngai nta de du ai shaloi, nu yan wa gaw ngai hpe n pawt ai. Raitim, mare hta bungli n nga ai majaw, nye kanau lasha nga ai Jamani de htawt nga ai. Shi gaw kaga mungdan de du ai Saping Kumyunit uhpung hta myit rawt let magam gun nga ai. Bungli masha ahkaw ahkang lu na matu hte, num ni mung maren mara ahkaw ahkang lu na matu shakut nga ai shanhte ni hte arau nga lu ai majaw ngai grai myit pyaw ai. Dai majaw, ngai mung Kumyunit hpung shang byin wa nna, hpang hta hpung shang da ai marai langai hte dinghku de ai. Kumyunit laili laika ni hpe hkan garan ai, n-gun madun poi hta shang lawm ai gaw lachyum nga ai bungli galaw nga ai re ngu na hkamsha ai.

Raitim, ngai myit bai daw wa ai. Kumyunit ni gaw shanhte tsun ai hte maren n galaw ai ngu na hkamsha wa ai. 1971 hta, anhte hpung kaw na ramma nkau gaw, Hparanhpawk mare hta nga ai Saping Sumtsan Kasa Rung hpe wan sa nat ai shaloi, nye a hkamsha lam gaw teng ai ngu na grau kam wa ai. Saping mung na uphkang ai lam hte seng ai n tara ai lam ni hpe ninghkap mayu ai majaw wan nat ai raitim, shanhte a nju ndawng ai lam hpe dai hku madun ai gaw shut ai ngu na ngai shadu ai.

Kasha magam hpe shangai ngut ai hpang, Kumyunit zuphpawng ni hpe matut n lung sai ngu na nye madu wa hpe tsun ai. Manang ni gaw annu ni hpang n sa chyai mat ai. Ngai grai garen wa ai. Hpa a majaw asak hkrung nga ai hpe chye mayu wa ai. Masha uhpung uhpawng hpe rawt jat hkra galaw ai gaw, gaja wa akyu nga ai kun?

1976 hta, nye nta de Saping amyu masha Yehowa Sakse yanla du wa ai. Shanhte jaw ai Chyum Laika laili laika ni hpe ngai hkap la dat ai. Lahkawng lang ngu na sa chyai ai shani hta, ngai chye mayu ai yakhkak jamjau lam, n tara ai lam hte n rap ra ai lam ni hte seng ai lam ni hpe san la ai. Ngai san ai ga san shagu hpe Chyum Laika hte mahtai jaw ya ai majaw grai mau mat ai. Dai majaw, Chyum Laika hkaja na matu hkap la dat ai.

Nnan hta gaw Chyum Laika lam chye na matu daram sha hkaja ai re. Yehowa Sakse ni a nawku htingnu hta zuphpawng sa lung ai. Dai aten an hta ma lahkawng rai sai. Sakse Hkam ni gaw anhte hpe sa shaga ya ai. Zuphpawng hta mung ma ni hpe yu karum ya ai. Dai hku nna Sakse Hkam ni hte ngai hkau wa ai.

Dai pyi, nawku htung hte seng nna ntsen ai myit ni naw nga dingyang re. Saping mung hta nga ai nye a nta masha ni de sa chyai ai shaloi, wa jau re ai nye wa bawk gaw Chyum Laika matut n sharin na matu dip n-gun jaw wa ai. Raitim, Saping mungdan hta nga ai Sakse Hkam ni gaw, ngai hpe grai karum ya wa ai. Shanhte mung Jamani hta nga ai Sakse Hkam ni zawn sha, nye a ga san ni hpe Chyum Laika hte mahtai jaw ya ai. Dai majaw, Jamani de bai du ai shaloi Chyum Laika matut hkaja na matu dawdan kau ai. Nye madu wa gaw Chyum Laika matut n hkaja mat tim, ngai chyawm gaw matut hkaja wa ai. 1978 hta hkalup hkam la nna, Yehowa Sakse langai byin wa ai.

Tup hkrak tengman ai Chyum Laika machye machyang a majaw, prat hte seng ai yaw shada lam hte, lam matsun ni hpe atsawm chye wa ai. Ga shadawn, 1 Petru 3:1-4 hta madu wa ni a “hkang ai hku hkan” na matu, “hkrit kamyin ai myit hte hkan” na matu hte “Karai Kasang a man e hpu ging ai, myit masin” hpe shalat na matu madu jan ni hpe n-gun jaw da ai. Dai hpaji jaw ga ni gaw ngai hpe kaja ai Hkristan madu jan hte kaja ai kanu byin wa shangun ai.

Ya nga yang Yehowa Sakse byin ai 35 ning rai sai. Karai a magam gun nga ai mungkan grup nta masha langai byin lu ai sha n-ga, kashu kasha 5 hta 4 mung ngai hte arau Karai a magam gun nga ai majaw ngai grai kabu ai.