Tagelda n Ṛebbi d yiwet n lḥukuma yellan deg igenni. Aţ-ţuɣal deg wemkan n lḥukumat nniḍen meṛṛa, yerna aţ-ţexdem lebɣi n Ṛebbi, ama deg igenni ama ɣef lqaɛa. Wagi d lexbaṛ yessefṛaḥen s ṣṣeḥ! Lɛibad ḥwaǧen leḥkem n lɛali; Tagelda n Ṛebbi a sen-tefk ayen i ssaramen. Aţ-ţesdukkel imezdaɣ meṛṛa n lqaɛa.​—Ɣer Danyil 2:44; Matta 6:9, 10; 24:14.

Yal tagelda tesɛa agellid-is. Yahwa yerra Mmi-s, Ɛisa Lmasiḥ, d agellid n Tgelda-s.​—Ɣer Aweḥḥi 11:15.

Wali bidyu D acu i ţ-ţagelda n Ṛebbi?

Mmi-s n Ṛebbi d Agellid ikemlen axaṭer yelha yerna yeţdafaɛ ɣef wayen yelhan. (Matta 11:28-30) Uyerna, seg igenni ara d-yeḥkem ɣef lqaɛa. Yesɛa ihi tazmert akken ad iɛiwen imdanen. Mbeɛd ḥeggu-ines, yuɣal s igenni; yeqqim ɣer tama tayeffust n Yahwa, yeţṛaǧu melmi ara yuɣal d Agellid. (Iɛebṛaniyen 10:12, 13) Mi gɛedda kra n lweqt, yerra-t Ṛebbi d Agellid n Tgelda-s.​—Ɣer Danyil 7:13, 14.

D yiwet n terbaɛt n wid iţţusemman ‘imqeddsen’ ara iḥekmen akk-d Ɛisa deg igenni. (Danyil 7:27) Imqeddsen imezwura i geţwaxtaṛen, d imceggɛen unṣiḥen n Ɛisa. Ar ass-a, Yahwa irennu-d ɣur-sen irgazen ţ-ţlawin unṣiḥen nniḍen. Am Ɛisa, ḥyan-d si lmut s lǧeţţa n ṛṛuḥ.​—Ɣer Yuḥenna 14:1-3; 1 Ikurintiyen 15:44.

 Ɣer taggara, acḥal n lɛibad ara yalin s igenni? Ɛisa iǧaweb-ed: “taqeḍɛit tamecṭuḥt.” (Luqa 12:32) Ad ilin di 144 000 yid-sen; ad ḥekmen ɣef lqaɛa nutni akk-d Ɛisa.​—Ɣer Aweḥḥi 14:1.

Tagelda n Ṛebbi tbedd deg useggas 1914. * D acu-ţ lḥaǧa tamezwarut i gexdem Ɛisa asmi i guɣal d Agellid? Iḍegger-ed Cciṭan d leǧnun-is ɣer lqaɛa. Cciṭan, seg wakken yerfa mliḥ, yessker ccwal di ddunit meṛṛa. (Aweḥḥi 12:7-10, 12) Seg yimiren, ţziden lehmum ɣef lɛibad. Lgirrat, laẓ, lehlakat akk-d zzelzlat llan d “limaṛa” i d-iţbegginen belli ur teţɛeṭṭil ara Tgelda n Ṛebbi aţ-ţeḥkem ɣef lqaɛa.​—Ɣer Luqa 21:7, 10, 11, 31.

Tagelda n Ṛebbi tesdukkel, s leqdic n uberreḥ, aṭas n yemdanen i d-yekkan si tmura n ddunit meṛṛa. D imelyan n yergazen ţ-ţlawin yesɛan annuz i gqeblen ad uɣalen ddaw n leɛnaya n Tgelda-yagi i geţwellih Ɛisa. Tgelda n Ṛebbi aţ-ţḥareb ɣef yemdanen-agi, asm’ara tessenger ddunit-a ideg i neţɛici. Ihi, wid yebɣan ad sfaydin s lbaṛakat ara d-tawi Tgelda, ilaq-asen ad xtiṛen Ɛisa d Agellid w’a t-ḍuɛen.​—Ɣer Aweḥḥi 7:9, 14, 16, 17.

Deg wazal n 1 000 iseggasen n leḥkem, Tagelda-yagi aţ-ţesseḍru ayen i geqsed Ṛebbi i yemdanen si tazwara. Lqaɛa kamel aţ-ţuɣal d Lǧennet. Ɣer taggara, Ɛisa ad yerr Tagelda i Baba-s. (1 Ikurintiyen 15:24-26) Yella walbeɛḍ iwumi tebɣiḍ aţ-ţhedṛeḍ ɣef Tgelda n Ṛebbi?​—Ɣer Ahellil 37:10, 11, 29.