Sakbay nga agtayab ti kulibangbang, masapul nga agbilag tapno pumudot dagiti maselna a makatulong iti panagtayabna. Ngem no naulep ti tangatang, umun-una a makatayab ti cabbage white a kulibangbang ngem iti dadduma a kulibangbang. Apay a maaramidna dayta?

 Panunotem: Sakbay nga agtayab ti adu a klase ti kulibangbang, agbilagda a nakaserra wenno nakaukrad dagiti payakda. Ngem sinan-V ti posision ti payak ti cabbage white a kulibangbang no agbilag. Ipakita dagiti research a tapno makaurnong a dagus ti kulibangbang iti umdas a pudot, masapul nga agarup 17 degrees ti anggulo wenno sinan-V laeng ti panagukrad ti payakna. Gapu iti dayta a posision, ti enerhia ti init ket agdiretso kadagiti masel iti barukongna nga usarenna nga agtayab.

 Dagiti researcher iti University of Exeter, idiay England, inadalda no kabaelanda a pasayaaten dagiti solar panel no tuladenda ti sinan-V a posision ti kulibangbang. Idi inaramidda dayta, ngimmato iti agarup 50 a porsiento ti mapatpataud nga enerhia.

 Nadlaw met dagiti researcher a nakasilsileng ti makinrabaw a payak ti kulibangbang. Idi tinuladda ti sinan-V a posision ti payakna ken ti kinasilengna, nakaaramidda kadagiti nalaglag-an ken nasaysayaat a solar panel. Gapuna, ni Professor Richard ffrench-Constant, a maysa kadagiti researcher, inladawanna ti cabbage white a kulibangbang kas “eksperto iti panagurnong iti enerhia ti init.”

 Panagkunam: Resulta kadi ti ebolusion ti sinan-V a posision ti payak ti cabbage white a kulibangbang? Wenno adda nangdisenio iti dayta?