Gagangay laeng a mabutengtayo a matay, isu a rumbeng a salaknibantayo ti biagtayo. (1 Corinto 15:26) Ngem ti di umiso a panagbuteng a naibatay iti palso a sursuro wenno an-anito ti mamagbalin kadagiti tattao nga ‘adipen iti intero a panagbiagda.’ (Hebreo 2:15) No maammuam ti kinapudno maikkat ti panagbutengmo iti ipapatay—panagbuteng a manglapped kenka a mangtagiragsak iti biag.—Juan 8:​32.

Ti kinapudno maipapan iti ipapatay

•   Awan puot dagiti natay. (Salmo 146:4) Dika rumbeng a kabuteng ti ut-ot ken tuok kalpasan ti ipapatay ta ti Biblia inyaspingna dayta iti pannaturog.—Salmo 13:3; Juan 11:11-​14.

•   Saannatay a madangran dagiti natay. Uray dagiti dati a naranggas a kabusor ket “inutil ken patay.” (Proverbio 21:16) Kuna ti Biblia a napukawen “ti gurada ken ti imonda.”​—Eclesiastes 9:6.

•   Ti ipapatay ket saan nga agnanayon a pagpatinggaan ti biagtayo gapu ta pagungaren ti Dios dagiti natay.—Juan 5:28, 29; Aramid 24:15.

•   Inkari ti Dios ti panawen nga “awanton ni patay.” (Apocalipsis 21:4) Maipapan iti dayta a tiempo, kuna ti Biblia: “Dagiti nalinteg tagikuaendanto ti daga, ket agtaengdanto nga agnanayon iti dayta,” saanton a pulos pagbutngan ti ipapatay.—Salmo 37:29.